“O Se Tausaga Fou Luna Fiafia,” Uo, Fep. 2024, 30–31.
O Se Tausaga Fou Luna Fiafia
O le tele o lo matou aoao e uiga i lo matou aiga, o le malosi foi lena o le a avea ai i matou.
O lenei tala na tupu i Meleisia.
Sa faalogo Claire i le gogolo o le falai i’a i le umukuka a o la taaalo ma lona uso laitiiti. A o kukaina e Tina ma Tama le taumafataga o le afiafi mo le Tausaga Fou Luna, sa faafoliga Claire ma Chloe o le tarako o le faafiafiaga.
Sa ata Chloe ina ua savali patapatatu atu Claire i lona potu i lana ufi foliga tarako ma le ofutino lanumumu. Sa ofu mumu tagata uma i le asō. I le Tausaga Fou Luna, o le lanumumu o lona uiga o le a e fiafia ma malosi. Sa fiafia Claire i tu ma aga masani o le Tausaga Fou Luna a lona aiga!
“Tina, pe o le a tatou talanoa ia Tinamatua ma Tamamatua nei?” Sa fesili atu ai Claire ina ua alu Chloe i le moega mo sina moe puupuu. E masani lava ona latou faamanatuina ma Tinamatua ma Tamamatua. Ae ua latou nonofo i le taimi nei i se atunuu ese.
“Ioe. O le a tatou valaau atu ia i la’ua pe a uma le meaai o le afiafi,” o le tala lea a Tina. Sa ia soloina ona lima i luga o lona talipalapala lanumumu. “E te manao e fesoasoani mai ia te a’u e fai ni kuki?”
Sa lue atu le ulu o Claire ma oso i luga o le nofoa i tafatafa o le laulau. Sa ia ta’eina ma le faaeteete fuamoa i totonu o se pesini tele.
A o tao kuki, sa fesoasoani Claire ia Tama e seti le laulau. Sa la tuuina i fafo ia ipu mafolafola faapitoa e i ai ni mamanu mananaia i luga mo aso fiafia. Ona tuu lea e Claire ata o Tinamatua, Tamamatua, ma isi tagata o le aiga i luga o le laulau. O le faatulagaina o ata na fesoasoani e lagona ai e pei ua latou faatasi uma.
E le’i umi ae sasala le manogi o kuki pata i le umukuka. Ua oo i le taimi e aai ai! Sa saofafai faataamilo Claire, Chloe, ma o la matua i le laulau.
Sa fai e Claire le tatalo. “Faafetai i Lau Afio mo se isi tausaga e faatasi ai ma lo’u aiga.” Ina ua uma ona fai mai tagata uma amene, sa tuu e Claire se polo araisa piipii i lona gutu ma ataata. Sa ese le manaia!
Ina ua uma le meaai o le afiafi, sa aumai i fafo e Tama ni teutusi lanumumu se lua. O le isi lea tu masani. O lona uiga e i ai manuia i le tausaga fou. “Tasi mo Claire ma le tasi mo Chloe,” o le tala lea a Tama. Sa lulu e Claire le teutusi latalata i lona taliga. Sa faalogo o ia i tupe siliva o loo tatagi i totonu.
“Faafetai lava,” o le tala lea a Claire i ona matua. “O lea la ua mafai ona tatou valaau atu Tinamatua ma Tamamatua?”
“Ioe!” Na fai atu ai Tama. Sa ia setiina lana telefoni i luga o le laulau, ma sa faatumulia le lau i foliga ataata o Tinamatua ma Tamamatua. Sa talotalo atu Claire ma Chloe.
“Talofa, Tinamatua! “Talofa, Tamamatua! Sa fai atu ai Claire. “Ua matua matou misia lava oulua!”
“Ua ma misia foi outou. O a mai outou?” Na fesili mai ai Tinamatua. Sa talanoa Claire ma i la’ua mo se taimi umi lava.
Ina ua uma ona talanoa Claire ma Tinamatua ma Tamamatua, sa fesili atu Tina ia i la’ua e uiga i tagata e le’i iloa e Claire.
“Tina, o ai na tagata?” Sa fesili atu ai Claire ina ua uma ona latou faatofa atu ia Tinamatua ma Tamamatua.
“O i latou o nisi o tagata o le tatou aiga. O loo ou aoaoina o latou igoa ma tala ina ia mafai ona ou faaaofia ai i latou i la tatou talafaasolopito o aiga,” o le tala lea a Tina.
Sa mafaufau Claire i lena mea. “O le a le talafaasolopito o aiga?”
“O le taimi tatou te aoao ai e uiga i o tatou aiga atoa,” o le tala lea a Tama a o a’e Chloe i luga o ona vae. “O le tele o lo tatou aoao e uiga i o tatou aiga, o le tatou malolosi foi lea.”
Sa luelue le ulu o Claire. “E mafai ona e faamatala mai ia te a’u ia tala?”
“Ioe!” Sa aapa atu Tina i le isi itu o le laulau ma piki i luga le tusiata o ata o le aiga. Sa ia su’e atu i se ata tuai e lanu uliuli ma pa’epa’e. “O le tama lea o le tama o le tama matua a Tama. Sa ola i ni tausaga ua leva lava. Ae e mafai ona tatou lagona le latalata atu ia te ia pe a tatou aoao e uiga i lona olaga.”
Sa tilotilo Claire i ata a’o faamatala e Tina ma Tama ia te ia tala. A o ia faalogo, sa lagona lona fiafia. Sa le manaomia ona ia latalata atu i lona aiga i taimi uma e lagona ai lo latou alolofa. Sa ataata o ia. Sa o se Tausaga Fou Luna lelei tele.
Ata na tusia e Hannah Li