Talofa mai Polivia!

Aoao e uiga i fanau a le Tama Faalelagi i le lalolagi atoa.

O Polivia o se atunuu i Amerika i Saute. E silia ma le 12 miliona tagata e nonofo ai iina!

Gagana

O Polivia e silia ma le 30 gagana aloaia! O le toatele o tagata e tautatala faaSipaniolo. O isi gagana masani o le Quechua, Aymara, ma le Guaraní.

¡Jallalla!

O lona uiga o le “Talofa, tagata uma!” i le Quechua ma le Aymara.

Tagata Fesoasoani i Solofanua Tositosi [Zebra]

O le aufaigaluega talavou i le aai o La Paz e oofu o ni solofanua tositosi ma fesoasoani i tagata e sopoia ma le saogalemu le auala. Latou te asiasi foi i tamaiti i aoga ma falemai.

Malumalu e Tolu

O le malumalu muamua o Polivia na faapaiaina i le 2000 i Cochabamba. E lua isi malumalu o loo faagasolo, i La Paz ma Santa Cruz!

O Meaola o le Vaomatua

O se vaega o le vaomatua o le Amasone o loo i Polivia. E fai ma nofoaga mo le tele o meaola, e aofia ai koke [macaws], faiaga [sloths], ma ’ota [otters] lapopoa.

Gaoioiga

Faatagata Masima

O Polivia o loo i ai se folaga masima aupito tele i le lalolagi. Saeu le 1 le ipu masima, 2 ipu falaoamata, ma le ¾ ipu vai mafanafana seia oo ina maua le paluga. Ona mamanu lea o le paluga i lau lava faatagata masima!

Fua o le Kuka

P’esque de Quinua

O nisi tagata Polivia e aai i polesi kinoa [quinoa] mo le malutaeao. O se tasi lea o faiga e mafai ona e faataitai i ai!

1. Fufulu 1 ipu kinoa pa’epa’e (po o le araisa). Tuu i se ulo faatasi ma le 4 ipu vai. Tunu ia pupuna ona faavaivai lea i ai le afi mo le 15 minute.

2. Sasaa ese le vai. Lomi le kinoa agai i autafa o le ulo i se sipuni.

3. Toe faavaivai le ola a le afi. Tuufaatasi le 2 ipu susu, 1 le sipuni ai o le pata, ma le 1/3 ipu sisi ua uma na olo seia oo ina matala faatasi. Faamanogi i le masima ma le kumino [cumin].

Ia mautinoa e i ai se tagata matua e fesoasoani atu!

Ata na tusia e Natalie Briscoe