“Tumau Malolosi Faatasi,” Uo, Fep. 2024, 32.
Uo i le Uo
Tumau Malolosi Faatasi
Mai se faatalanoaga ma Diana Evelyn Nielson ma Olivia Kitterman.
Ata na tusia e Ola Szpunar
Sa ou nofo i Iapani i lo’u tuputupu a’e. O lo’u aiga na auai i le lotu Puta, e pei o le tele o aiga iina. I se tasi aso, sa ou feiloai ai i faifeautalai mai Le Ekalesia a Iesu Keriso o le Au Paia o Aso e Gata Ai. Sa ou maua se lagona faapitoa e uiga ia i laua. Sa ou fia avea e pei o i laua.
Ina ua ou auai i le Ekalesia, e na o le toatasi le isi tamaitiiti aoga i la’u aoga o se tagata o le Ekalesia. O le avea ai ma se tasi o na o i laua, sa faigata. O nisi o a’u uo mai le aoga na faia ni filifiliga leaga, ma sa latou mananao ou te faia foi ia lava mea e tasi. Sa ou tauivi e filifili le mea tonu.
Sa ou le toe alu i le lotu mo le fa masina. Ae o Aso Sa uma lava, e valaau mai ai a’u uo mai le lotu ma fesili mai, “O a mai oe?” Sa fesoasoani ia te a’u. I se tasi taeao sa ou maua ai se lagona malosi. Na ou iloaina sa manaomia ona ou alu i le lotu i lena aso. O lea sa ou alu ai. Talu mai lena aso, sa le toe taofia lo’u alu i le lotu. Sa ou filifili e tumau i luga o le ala o feagaiga.
A e nofo i se mea e tau le toatele ai ni tagata o le Ekalesia, e mafai ona lagona ai le tuuatoatasi. O le faia o ni uo lelei e mafai ona faigata. O le tuuatoatasi e mafai ona faigata ai ona ola i le talalelei. Ae e mafai ona e maua lau lava molimau e fesoasoani ia te oe ia tumau malosi ai. Ua ou aoaoina foi o le i ai o ni uo i le lotu e lagolago atu ia te oe e fesoasoani moni lava.
Afai e te lagona le tuuatoatasi, ia taulai atu i le mulimuli ia Iesu Keriso. Suesue pea i tusitusiga paia, fai tatalo, ma alu i le lotu. O le a faaitiitia lou lagonaina o le tuuatoatasi ona o loo faatasi le Atua ma oe.