O Le Mana Sili

Saunia e Peresitene Russell M. Nelson

Sii mai le “Ua Toetu Keriso; O Le Faatuatua ia te Ia O Le A Aveesea ai Mauga,” Liahona, Me 2021, 101–4.

I nai tausaga ua mavae, sa ma asia ai ma Sister Nelson Samoa, Toga, Fiti, ma Tahiti. O na motu taitasi sa tetele ai timuga mamafa mo ni aso. Sa anapopogi tagata o le au paia ma tatalo ina ia puipuia a latou sauniga na faia i fafo mai le timu.

I Samoa, Fiti, ma Tahiti, o le taimi lava na amata ai sauniga, na uma ai le timu. Ae i Toga, sa le’i taofia le timu. Ae e 13,000 le Au Paia faatuatua na vave ona omai i ni itula ae le’i amataina ina ia maua se nofoa. Sa latou faatalitali ma le onosai i se timuga faifai pea. Ona latou saofafai lea i se fonotaga ma le susu tele.

Tagata o loo saofafai i ofu lotu ma ofu faatimu

Sa matou vaaia le faatuatua malosi i lona faatinoga i na tagata taitoatasi o ia motu—o le lava o le faatuatua e taofi ai le timu, ma le faatuatua e onosaia ai le lē muta o le timu.

O luitau i o tatou olaga e lē aveesea i taimi uma i le auala ma le taimi tatou te mananao ai. Ae o lo tatou faatuatua o le a tuleia i taimi uma i tatou i luma. O lo outou faatuatua o le a fesoasoani ia te outou e liliu ai luitau i le tuputupu a’e ma avanoa.

O le faatuatua ia Iesu Keriso o le mana sili lea ua avanoa mo i tatou i lenei olaga. E mafaia mea uma ia i latou o ē talitonu.

Faatupuina o Lou Faatuatua

E pei lava ona mafai ona tatou fesoasoani i se fatu ia tuputupu a’e e ala i le tuuina atu o le la susulu, vai, ma le eleele lelei, e mafai foi ona tatou faia mea e fesoasoani ai ia tuputupu a’e lo tatou faatuatua! Valivali vaega taitasi o le ata ma faitau mea e mafai ona e faia e faatupulaia ai lou faatuatua.

Aoao e uiga ia Iesu Keriso ma Lana talalelei i le aiga, i le lotu, ma i tusitusiga paia.
Tatalo ma ole atu mo se fesoasoani ia iloa ai le mea moni.
Tausi poloaiga ma faia filifiliga lelei e fesoasoani ia te oe e latalata atili atu ai i le Tama Faalelagi.

Itulau valivali o iai le la, o se ao e timu, ma se laau o loo ola mai le palapala