“Giulia ma le Mafuie,” Uo, Aokuso 2024, 4–5.
Giulia ma le Mafuie
O le tuneva o le po, ma sa gatete le potu o Giulia!
O lenei tala na tupu i Italia.
“Giulia! Marco! O mai i lalo mo le afiafi faaleaiga!” Sa valaau atu ai Ma i luga o fasitepu.
“Ua ou alu atu!” Sa toe valaau mai ai ia Giulia.
Sa sau o ia i le fogafale i lalo. Ina ua uma le tatalo, sa vaai Giulia ua aumai e ona matua atofaafafa, meaai, vai, ma isi sapalai.
“O a nei mea?” Sa fesili atu ai Giulia.
“O loo tatou faia se mea taua mo le afiafi faaleaiga,” o le tala lea a Pa. “Sa i ai ni nai mafuie laiti talu ai nei. Tatou te mananao ia saunia ina nei oo mai se mafuie e telē atu. O le a tatou faia ni ato mo faalavelave faafuasei.”
Sa tilotilo atu Giulia i lona tuagane, o Marco. Sa popole lava o ia. Sa ia lagonaina muamua ni lūlū laiti. Ae o le mafaufau i se mafuie tele na fefe ai o ia.
Sa uu e Ma le lima o Giulia. “Aua e te popole. O le a tatou faia le mea sili tatou te mafaia e saunia ai, ma o le a fesoasoani mai le Alii ia i tatou. Ae tatou te le’i faia ni ato, sei o tatou faitauina nisi o mau.”
Sa faitauina e ona matua se tala mai le 3 Nifae. Sa i ai se afa tele ma afi ma mafuie a o le’i asiasi atu Iesu Keriso i Amerika. Sa lagona e tagata le fefe ma le faanoanoa. Ae na fetalai Iesu o le a Ia faamaloloina ma faamafanafanaina i latou o e omai ia te Ia.
“Sa faamanuia e Iesu Keriso tamaiti laiti taitoatasi,” o le tala lea a Pa. “Na te silafia ma alofa ia te oulua uma e pei lava ona Ia alofa ia i latou.”
O tusitusiga paia na lagona ai e Giulia le toafimalie ma le toafilemu. Sa ia te ia le faatuatua o le a faamafanafanaina o ia ma lona aiga e le Tama Faalelagi.
A o latou faia ato, sa ta’u atu e Ma ia i laua le mea e tatau ona la faia pe a oo mai se mafuie. “Alu ifo i se eria o loo taalaelae po o lalo o se laulau malosi. Ona ufiufi lea o lou ulu ma lou ua i ou lima. Nofo i le mea o loo e i ai seia uma le gatete.”
Sa faataitai e Giulia le tala a Ma. Sa fiafia o ia ua latou saunia. Afai e oo mai se mafuie, o le a latou maua mea latou te manaomia.
I ni nai vaiaso mulimuli ane, sa lagona e Giulia le luluina o lona potu i le tuneva o le po. Sa nofo o ia i luga o lona moega. Sa gatete pea le potu. O se mafuie!
I le taimi muamua, sa ia lagona le fefe. Ona ia tilotilo atu lea i lana Tusi a Mamona i luga o lana laulau i autafa o lona moega. Sa ia mafaufau i le ala na folafola atu ai e Iesu Keriso o le a ia faamafanafana tagata i Amerika. Na oo mai se lagona filemu ia te ia.
Sa manatua e Giulia le mea na ta’u atu e Ma ia te ia e fai. Sa faananati atu o ia i lalo o lana kesi, ma ufiufi lona ulu ma lona ua i ona lima. Ina ua uma le gatete, sa tamoe atu o ia i le potu a ona matua.
“O seki oe?” O le fesili lea a Ma. Sa fusi mau e ona matua ia Giulia ma Marco. Na fusi atu foi e Marco o ia.
“Ioe, o loo o’u seki! Sa ou iloa le mea e fai,” o le tala lea a Giulia. Ona ia vaaia lea o loimata i foliga o lona tuagane. Sa fefe o ia, e pei lava ona sa i ai o ia.
Ou te iloa le mea o le a fesoasoani ia te ia, sa ia mafaufau ai. Sa aumai e Giulia lana Tusi a Mamona ma tatala i se ata o le Faaola.
“Vaai, Marco. E mafai e Iesu ona faamafanafana i tatou, e tusa lava pe tatou te fefefe.” Sa fusi e Giulia lona tuagane. “O le a lelei mea uma.”
Ata na tusia e Marina Pessarrodona