“O Le Tama’i Meleni,” Uo, Aokuso 2024, 40–41.
O Le Tama’i Meleni
Pe sa i ai se mea e mafai ona faia e Weston e fesoasoani ai ia Nate?
O lenei tala sa tupu i le ISA.
Sa taalo Weston i fafo ae taunuu atu loa ma se taavale ma se veni fesiitai tele i le fale i le isi itu o le auala. E toatele tamaiti na feosofi mai le taavale. O se tasi o i latou o se tamaitiiti sa foliga mai e pei o le matua o Weston.
Sa tamoe Weston i totonu o lona fale. “Tina, Tama! O se aiga fou ua siitia mai!”
Sa ea ane i luga tamā mai se poloketi sa galue ai. “Manaia tele lena.”
“Ou te fia feiloai ia i latou,” o le tala lea a Weston. “E mafai ona ta o faatasi?”
“Ioe!”
Sa savavali atu Weston ma Tama i le isi itu o le auala i le fale o lo latou tuaoi fou. Ina ua la tu’itu’i, sa sau se tamaitai i le faitotoa. O le tamaitiiti e tupulaga ma Weston sa tu i ona tua.
Sa talotalo atu Weston. “Talofa, O a’u o Weston. O ai lou igoa?”
Sa laa ese atu le tamaitiiti mai tua o lona tina. “O a’u o Nate.”
“Pe e te fia taalo i lo’u fale?” Sa fesili atu ai Weston.
Sa tilotilo atu Nate i lona tina.
“E mafai ona e alu,” o lana tala lea. “Tau lava o lou i ai i le fale i le taimi mo le taumafataga o le afiafi.”
Ina ua uma lena, sa taaalo Weston ma Nate toetoe lava o aso uma. Sa matuai fiafia lava o ia i le i ai o sana uo fou. Sa la tietie i uila, aau i le vaitaele, ma taaalo auvaa i le paka. O nisi taimi e taalo ai foi Weston i le fale o Nate. Sa agalelei le aiga atoa o Nate!
I se tasi aso, na ma’i tigaina ai le tamā o Nate. Sa tatau ai ona alu o ia i le falema’i. Sa faasolo ina leaga ma sili atu ona leaga le ma’i. Sa popole tele Nate ma lona aiga.
Sa popole foi Weston. Sa anapopogi ma tatalo tagata uma i le lotu mo le tamā o Nate. Sa anapogi foi Weston. Sa faamoemoe o ia mo se vavega. Ae na maliu le tamā o Nate.
A o faagasolo aso, sa vaai Weston i le faanoanoa tele o Nate ma lona aiga. Sa manao o ia e faafiafia i latou. Sa savali atu o ia i le isi itu o le auala ma tu’itu’i atu i le faitotoa o Nate.
“Ou te le fia taalo inei,” o le tala lea a Nate.
“Oi, ia ua lelei,” o le tala lea a Weston. Pe sa i ai se mea e mafai ona ia faia e fesoasoani ai ia Nate?
Sa alu Weston i le fale ma maua ai Tina. “E le manao Nate e taalo,” o lana tala lea.
“O se mea faigata lena.” Sa fusi mau o ia e Tina. “O nisi taimi pe a faanoanoa tagata, latou te manaomia sina taimi na o i latou.”
Sa luelue atu le ulu o Weston. “Ou te matea afai e oti lo’u tamā, o le a ou le lagonaina foi le fia taalo.”
Ae sa manao pea Weston e fesoasoani ia Nate ma lona aiga ia maua se lagona lelei. Sa i ai sona manatu. “O fea o i ai le seleulu?” na ia fesili atu ai. “Ou te fia avatu ia Nate se mea mai le tatou togalaau!”
Sa alu Weston i tuafale ma saili se mea e avatu i lana uo. Sa ia tilotilo atu i le palapala lea sa latou totoina ai ni karoti. Ae e le’i matua lelei. Sa ia saili i laau aina ae sa na o lala na maua.
Ona tilotilo lea o Weston i lalo o ni vine ma ni laulaau lapopoa. Sa ia tulei ese ni nai laulaau ma maua ai se tamai meleni meamata o loo ola a’e i luga o le vine. O le meleni lea sa ia totoina ma fuiina e ia lava!
Talosia ae fiafia Nate ma lona aiga i meleni. Na tipi e Weston mai le vine ma aveina i totonu. Ona ia tusia lea o se faamatalaga e o faatasi ai ma lana meaalofa.
Ina ua uma le kata, sa faatu ma le faaeteete e Weston le meleni ma le kata i luma o le fasitepu o le faitotoa a Nate. Ona ia faatatagi lea o le logo o le faitotoa ma toe tamoe i le fale i le vave na te mafaia ai. Ou te faamoemoe latou te fiafia i ai, o le mafaufau lea o Weston.
Mulimuli ane, sa vaaia e Weston le aiga o Nate i se papakiu o le pitonuu.
“O se meleni silisili ona manaia lena!” O le tala lea a le tuafafine o Nate.
“Matou te le’i mautinoa muamua po o le a le la mea.” Sa ataata Nate. “Sa matou manatu o se popo ese lava!”
“Faafetai lava mo le meaalofa matagofie,” o le tala lea a le tina o Nate.
Sa lagona e Weston le mafanafana i totonu a o fusiina o ia e Nate. Sa le mafai ona ia aveesea le faanoanoa o lana uo, ae e oo lava i sina tamai meleni e mafai ona fesoasoani e aumai ai se ataata.
Ata na tusia e Greg Paprocki