“Tali le Faasaua i le Alofa,” Uo, Aokuso 2024, 38.
Tusia e You
Tali le Faasaua i le Alofa
O lo’u igoa o Matilda, ma ou te sau mai Chile. Talu mai lava le siitia atu i se isi atunuu, ua ou matauina mai iisi tamaiti ua ese a’u mai ia i latou. Sa latou talie i lo’u lauulu kelikeli, o le lanu o o’u mata, o o’u fulufulu mata, e oo lava i le lanu o lo’u pa’u. Ua latou lau mai lo’u auleaga ma faavasivasi ma ua oo lava ina fai mai ia te a’u ou te mativa aua e ese o’u foliga nai lo isi tagata uma.
Ua aoaoina a’u e lo’u tina e tali atu i le faasaua ma se ataata. Fai mai o ia i le tele o taimi, o tagata e faasaua e faanoanoa pe o loo ola ma se mea e faatiga ia i latou. Sa ia aoaoina foi a’u e le o so’u sese, ma o le ese o se mea lelei ma matagofie. Na foafoaina e le Atua ituaiga o mea eseese i le lalolagi e pei o laau, nofoaga, ma tagata. E le afaina pe faape’i o tatou foliga vaaia tau ina ia i ai so tatou loto lelei.
Talu ai na aoaoina a’u e lo’u tina i lena mea, o taimi uma lava e sauaina ai a’u, ou te mafaufau i ai ma talanoa i le tagata o loo faia ni tala leaga. Ou te taumafai e taofi le faafitauli. I se tasi taimi na ou ta’u atu ai i se tasi o le vasega o le fai atu o tala leaga e uiga i isi e mafai ona tiga tele. Sa ou fai atu na te le iloa le mea e tupu i isi i o latou loto pe a latou faalogo i mea leaga e uiga ia i latou lava ona o le ese. Talu mai lena aso, e le’i toe ulagia a’u e lena tamaitiiti i le vasega, ma o lea ua ma uo.
Ou te manatu o le auala na aoao ai a’u e lo’u tina e tali atu ai i le faasaua o le auala sili lea. Sa ia aoaoina a’u e tali le faasaua i le alofa, e pei ona ono faia e le Atua. Ou te taumafai lava e fesili ifo ia te a’u lava ia, “O le a se mea o le a faia e Iesu Keriso i lenei tulaga?” Ua fesoasoani lenei mea ou te latalata atili atu ai i lo tatou Tama Faalelagi.