“Uso E Faavavau,” Uo, Iuni 2024, 14–15.
Uso Ee Faavavau
“O le taimi o le malumalu!” Sa musumusu atu Roy a o la savavali atu i totonu.
O lenei tala na tupu i Zimbabwe.
“Ou te fia vaai i le malumalu. Ou te ulu i ai i se aso,” na usu ai Ryan.
“Ulu i ai nei!” o le tala lea a le uso matua o Ryan o Roy.
Sa gaugau e Tina ni lavalava ma tuu i totonu o se ato malaga. “O le a tatou amata i le asō, ae o le a alu ai aso e lua tatou te taunuu ai i le malumalu i Aferika i Saute,” o lana tala lea.
Sa umi se taimi na faatalitali ai Ryan ma lona aiga e o i le malumalu. Ma o lea la ua oo i le taimi! O le a latou o mo se vaiaso atoa.
“Tina, toe faamatala mai ia i maua e uiga ia Tawananyasha,” o le tala lea a Roy.
Sa ataata atu Tina i lana fanau tama. “O Tawananyasha o le lua uso matua. Sa maliu o ia ina ua na o le tasi lona tausaga. Ae o ia lava o se uso ia te oulua, e pei lava o Tafadzwa ma Tatenda. Ma te alolofa ma Papa i o ma atalii uma e toalima.”
Sa ataata Ryan a o ia mafaufau ia Tawananyasha. Sa manaia le lagona o le iloa sa alolofa o latou matua ia i latou uma.
“O le mafuaaga lena ua tatou o ai i le malumalu,” o le tala lea a Tina. “Ina ia faamauina faatasi o se aiga e faavavau!” Sa ia sipi le ato malaga. “Ia o loa e aumai tou mea. Ua oo i le taimi o le malumalu!”
Sa fesoasoani Roy ia Ryan e ave a latou ato malaga i fafo. Sa faatasi atu Papa ia i laua, ma sii atu se pusa o meaai na saunia e Tina mo le malaga. Sa amoina foi e Tafadzwa ma Tatenda a la ato. E le’i umi ae amata ona savavali atu le aiga atoa i le lotu. Sa faatali mai se pasi mo i latou iina e ave i latou i le malumalu.
Sa oso Ryan i luga o le pasi ma nofo i autafa o Roy. E toatolu isi foi aiga mai le latou uarota sa utaina foi le pasi. Ina ua nonofo tagata uma i o latou nofoaga, sa malaga atu le pasi i le malaga umi i le malumalu.
Sa tilotilo atu Ryan ma Roy i fafo o le faamalama. O le vaitau timuga, o lea sa lanu meamata ma matagofie ai mea uma. Sa latou pasia faatoaga ma maketi i magaala e faatau atu ai e tagata tamato, fa’i, ma pateta. Sa latou vaaia foi manukī i luga o le auala! Sa mafaufau Ryan po o a isi manu o ona lalafi i le mutia ma laau uumi.
E le’i umi ae liua le ao i le po, ma sa alu pea le pasi. O se tietiega umi lava, ae sa le’i faitio Ryan ma Roy. Sa moe Ryan ma mafaufau, O le taimi o le malumalu!
A o latou taunuu atu i le aai, sa vaavaai atu tagata uma sa i luga o le pasi i fafo o faamalama. O ai o le a muamua iloa atu le malumalu?
“Lale!” Sa fai atu ai Roy.
Mulimuli ane, na oo i le taimi e o ai i totonu o le malumalu. “O le taimi o le malumalu!” Sa musumusu atu ai Roy ia Ryan a o la savavali atu i totonu. Na latou sui i ni ofu papae. Ona nonofo lea o tama i totonu o se potu faatalitali faatasi ma isi tamaiti mo sina taimi.
E le’i umi ae ave e se tagata faigaluega agalelei o le malumalu ia tamaiti e faatasi ma o latou matua. Sa latou savavali atu i totonu o se potu sa i ai se laulau malῡ i le ogatotonu mo tagata e tootutuli ai. Sa ta’ua o se fatafaitaulaga.
“Susu maia i le potu o faamauga,” o le tala lea a le tagata faigaluega i luma o le potu. “O le asō o le a ou faaaogaina ai le perisitua e faamau faatasi ai aiga taitasi e faavavau.”
Sa vaavaai atu Ryan ma Roy a o faamauina isi aiga e toatolu. Ona oo lea i le taimi o latou.
Sa tootutuli faatasi Ryan ma ona uso ma ona matua faataamilo i le fatafaitaulaga. Sa valaaulia e le fai faamauga se tasi o a latou uo e fai ma sui o Tawananyasha. Sa tilotilo atu Roy ia Tina ma Papa a o tuu ona lima i luga o o la’ua lima. Sa ia vaaia loimata o tafe ifo i alafau o Tina, ae sa ataata tele o ia.
Ina ua uma le faamauga, sa fusi e Ryan ia Tina. “Ua outou foliga e pei o ni agelu,” sa ia musumusu atu ai i ona atalii.
“E pei o loo faatasi se agelu ma i tatou,” na musumusu atu ai Roy. “O loo i ai se lagona faapitoa i lo’u loto.”
“Ma a’u foi,” o le tala lea a Ryan. Sa ofoofogia le i ai i totonu o le malumalu ma lona aiga e faavavau!
Ata tusi na saunia e Rachel Hoffman-Bayles