“O Se Opo mo José,” Uo, Aokuso 2024, 30–31.
O Se Opo mo José
Na iloa e Atamu e tatau lava ona ia lototele.
Na tupu lenei tala i Polivia.
“Ha! E te le iloa se mea!” Sa tusi e Fabricio lona tamai lima ia Jose ma ata.
Sa faauu Atamu. Faatoa fai atu lava e José se fesili i le faiaoga. Sa le manaia le taufaalili atu o Fabricio ia te ia mo lena mea.
“Fabricio, ua lava lena,” o le tala lea a le faiaoga.
Sa tilotilo atu Atamu ia José. Sa sioa ifo o ia i lana api, e pei na te le’i faalogo ia Fabricio.
Sa fou José i le latou aoga. I le taimi muamua, sa leai se tasi na talanoa ia te ia. Ona amata lea e nisi o tamaiti ona taufaalili ia te ia. Sa latou valaau o ia i igoa i taimi uma ma talie atu ia te ia. Sa lagona e Atamu e tatau ona ia fesoasoani ia José, ae na te le’i iloaina lava se tala e fai atu.
Ma le isi, sa foliga lelei lava José. Sa foliga mai o le taufaalili sa le’i faalavelave ia te ia.
Na toe liliu atu Atamu i lana tusi. Sa i ai se suega tele o le matematika o loo latalata mai, ma sa tatau ona ia taulai atu i ai.
I le aso o le suega, sa faia e Atamu le mea sili na te mafaia, ae sa faigata! Sa popole o ia i lona togi. Ae a pe afai e le pasi?
O le aso na sosoo ai, sa tu ai lo latou faiaoga i luma o le potu ma se faaputuga pepa.
“Ua ia te a’u togi o a outou suega,” na ia fai atu ai ia i latou. “O le toatele o outou e i ai le avanoa e faaleleia atili ai, ae o nisi o outou sa lelei tele.”
Sa amata ona ia faitauina leotele togi a tamaiti aoga taitasi. O le tele o togi sa matuai maualalo lava. Sa faatalitali ma le naunautai Atamu mo lona igoa.
“Atamu,” o le tala lea a le faiaoga. “Valusefulu.”
Sa le talitonu Atamu. Sa pasi o ia. Sa ataata lapoa o ia.
Ona faitau lea e le faiaoga o le togi a José.
“Tasi le selau,” sa ia fai atu ai, leotele ma manino. “O se togi atoatoa.”
Na tu i luga Fabricio. “E leai!” sa ia ee atu ai. “Sa kopi Jose!”
“Ioe!” o le tala lea a se isi tamaitiiti. “Na te le iloa se mea. Atonu na ia kopi i se tasi.”
Sa auai atu i ai isi tamaiti aoga. Sa taumafai Jose e ta’u atu ia i latou e le’i kopi, ae latou te le’i faalogo. Sa taumafai le faiaoga e ta’u atu ia i latou e filemu, ae latou te le faalogo foi ia te ia.
“Kopi!” sa ee atu ai se tasi.
“Pepelo!” o le tala lea a se isi tagata.
Sa tatavale le fatu o Atamu. Sa ia le iloa po o le a le mea a fai. Sa ia tilotilo atu ia José. O le a lelei o ia, a ea? Sa to’a lava José i taimi uma.
Sa sioa atu José i lana kesi e pei ona ia faia i taimi uma. Ona amata lea ona tagi.
Sa le toe feei isi tamaiti, ma sa filemu le potu. Na pau lava le mea na mafai ona faalogo i ai Atamu o le leo o José o tagi. Sa ia iloa e le mafai ona ia nofo pea i le taimi lenei. Sa tatau ona lototele o ia. Sa ta’u atu e le Agaga Paia ia te ia e fesoasoani ia Jose.
Na tu i luga Atamu. Sa vaavaai atu isi tamaiti ia te ia a o ia savali atu ia Jose. Sa le iloa lava e ia se tala e fai atu. O lea sa ia punou ifo ai i lalo ma fusi mau José.
“Aua e te popole,” sa ia musumusu atu ai a o ia popoina le tua o José. “Aua e te popole.”
E le’i umi ae o mai foi isi tamaiti e fusi José. E oo lava ia Fabricio na sau ma faamalie atu. E le’i umi ae tutu le vasega atoa faataamilo ia José e faamalie ma faafiafia o ia.
“Matou te alolofa ia te oe, José!” o le tala lea a se tasi.
“O oe e sili ona lelei i le matematika!” o le tala lea a le isi.
Sa solo ese e José ona loimata ma ataata. Sa ataata foi Atamu. O le agalelei na manaomia ai le lototele, ae sa matuai aoga lava.
Ata na tusia e Shawna J. C. Tenney