“O le Suega mo le Agalelei,” Uo, Aokuso 2024, 36–37.
O le Suega mo le Agalelei
Aisea o le a agalelei ai Melanie i se tasi na taufaalili ia te ia?
O lenei tala na tupu i Taiwan.
Sa tamoe Melanie i le saoasaoa na ia mafaia i le isi itu o le malae taalo o le aoga. E toatolu tamaiti o lana vasega sa na o ni nai laa na muamua atu ia te ia. Sa toeitiiti lava o latou i ai i le laina lea na faailogaina ai le “eria saogalemu.”
Sa ia faaloaloa atu lona lima. Sa ia tuleia malosi ona vae. Mulimuli ane, sa ia tapēina le toalua o i la’ua i le taimi tonu lava!
“Maua oe!” Na fai atu ai Melanie. Sa talie ana uo a o la palasi ifo i le eleele.
“E te masau,” o le tala lea a Jia a o manava o ia i totonu ma fafo.
Na toeitiiti lava foi tapē e Melanie ia Jonny. Ae sa ia misi o ia.
Sa tusi atu Jonny ia te ia ma ata. “Tuai tele!” Ona ia valaau atu lea o se igoa ia te ia.
Sa faauu Melanie. Sa agaleaga tele Jonny ia te ia! Sa le fiafia ai o ia.
Ina ua tuua le aoga, sa nofo Melanie i le laulau o le umukuka. Sa fai ana meaaoga faatasi ma lona uso matua. Ae sa le mafai ona taofia lona mafaufau i le tala a Jonny.
“Liv, o le a sau mea e fai pe a agaleaga se tasi ia te oe?” Sa fesili atu ai Melanie.
Sa tilotilo atu Liv ia te ia. “Sa agaleaga se tasi ia te oe?”
Sa luelue le ulu o Melanie. “O se tamaitiiti i le aoga. E taufaalili o ia ia te a’u i taimi uma!”
Sa tuu i lalo e Liv lana penitala. E ese le faigata o lena mea. Ou te faamalie atu.” Sa ia faalagolago i tua ma piilima. “Atonu e mafai ona e faia se mea manaia mo ia.”
Sa faanunumi le isu o Melanie. “O se mea manaia?” Sa le’i malie tele lena mea i le faalogo.
“Ioe!” Sa luelue le ulu o Liv. “Afai e te lelei ia te ia, atonu o le a toe lelei mai foi o ia. Na e faataitaia lena mea?”
Na lūlū le ulu o Melanie. Sa le’i mautinoa lelei e ia i lenei manatu. Aisea o le a lelei ai o ia i se tasi e agaleaga mai?
I lena po, sa faia ai e Melanie se tatalo. “Tama Faalelagi, faamolemole faamanuia mai Jonny ia agalelei teisi mai ia te a’u.” Sa taofi o ia. Sa toe mafaufau foi o ia i le tala a Liv. “Ma faamolemole fesoasoani mai ia te a’u e saili se auala ou te agalelei ai foi ia te ia. I le suafa o Iesu Keriso, amene.”
Ae o le a se mea lelei e mafai ona ia faia?
I ni nai aso mulimuli ane, sa o faatasi le vasega a Melanie i se savaliga sopo. Sa tele ni laau lanumeamata tetele ma ni auvai mananaia i luga o le alasopo.
Ina ua oo i le taimi mo se malologa ma se taumafataga o le aoauli, sa aai faatasi Melanie ma ana uo. Ona ia matauina lea o Jonny o nofo i lalo o se laau. Sa na o ia lava. Atonu e mafai ona ou faasoa atu la’u meaai ia te ia, sa ia mafaufau ai.
Sa savali atu Melanie ia Jonny ma nofo i lalo. “Malo, Jonny.”
Sa tilotilo mai Jonny i luga ia te ia. “Malo.”
“E te manao i se kuki?” sa ia fesili atu ai.
Sa ia tuuina atu se tasi o ana kuki ia Jonny. Sa ia aveina ma ataata. “Faafetai.”
“Na e fiafia i le tatou savaliga sopo?” sa ia fesili atu ai.
“Ioe. Sa seki lava le alalaupapa na tatou sopoia.” Sa ia uina lana kuki. “Mmm. E manaia mo’i lava.”
“Faafetai! Sa ou faia ma lo’u tina ma lo’u uso.
Sa faauma faatasi e Melanie ma Jonny le la ’aiga o le aoauli. Sa la talanoa e uiga i se taaloga kata sa la fiafia uma i ai. Sa fai si malie o Jonny. Sa tele ina la talie. Sa sili atu le fiafia o Melanie i lenei mea nai lo le taimi na ia taufaalili ai ia te ia.
“E te fia taalo i se taaloga?” Sa fesili atu ai Jonny a o latou mulimuli atu i isi tagata uma i lalo o le ala savali sopo.
Sa lue atu le ulu o Melanie ma ataata. “Ioe!”
Sa la auauai e feosofi i le va o maa i le taimi atoa o le savaliga sopo. Sa matua fiafia tele ai Melanie. Ina ua uma le savaliga sopo ma ua oo i le taimi e alu ai i le fale, sa faanoanoa o ia e faatofa atu.
“Ta taaalo i lena taaloga kata i le vaiaso lea,” o le tala lea a Jonny.
Sa luelue le ulu o Melanie. “Ia ua lelei! Fa, Jonny!”
Sa talotalo faatofa atu Melanie ma ataata. O Jonny e le o toe pei o le tamaitiiti lea na taufaalili ia te ia. O le taimi nei, o ia o lana uo.
Ata na tusia e Skylar White