“Disasta blong Dat,” Fren, Septemba 2024, 4–5.
Disasta blong Dat
?Daniel i strong inaf blong talem trutok?
Stori ia i hapen long USA.
Daniel i leftemap lid long bokis blong ol pleiplei blong apu man blong hem mo lukluk i go insaed. Ol kasen blong hem oli kam tugeta blong lukluk. Oli laekem blong pleplei tugeta long haos blong apu man!
Insaed i gat plante olfala pleplei we mama blong Daniel mo anti blong hem oli stap pleplei long hem taem oli ol smol pikinini.
“?Wanem ol samting ia? Kasen blong Daniel, Noa i poen i go long sikis sansaen, dat blong bifo blong plei aotsaed long gras . En blong olgeta i sap mo i gat ol kalkala flag—sam red mo sam yelo.
Daniel i pikimap wan. “Mama blong mi i stori long mi abaot ol samting ia,” hem i talem. “Yu putum wan wil aotsaed long gras. Afta yumi wanwan i sakem ol samting ia i go antap mo traem blong mekem olgeta i foldaon insaed long wil ia.”
“!I naes tumas!” Noa i talem. Hem i stap ron finis i go long yad blong rere long gem ia.
I no long taem afta Daniel mo ol kasen blong hem oli stap sakem ol dat ia raon long yad blong apu man. Daniel i laekem taem ol dat ia i fas strong long gras.
“Mi ting se mi sakem blong mi i hae moa bitim blong yu,” kasen blong Daniel, Lily i talem.
Ol pikinini oli laf mo sakem ol dat blong olgeta i go hae moa.
Afta Daniel i gat wan aedia. Hem i talem, “!Mi save se mi save sakem blong mi i flae tru long rod we trak i stap pak long hem mo i go insaed long wil!” Hem i ron i go narasaed rod we trak i pak long hem mo sakem strong dat ia.
Dat ia i flae antap, be i no foldaon stret long gras. Be i foldaon long niufala trak blong Anti Robilyn wetem wan laod noes THUD.
“!O no!” Noa i singaot.
Daniel i pikimap dat. Trak i ben bigwan long ples we dat i foldaon long hem.
Ol pikinini oli lukluk olgeta wetem fraet. Afta, oli no talem wan samting, oli lego ol dat blong olgeta long gras mo ron i go insaed.
Long aftenun ia, evriwan oli go long trak blong olgeta mo go long haos. Anti blong Daniel i luksave ples ia we i ben ia long trak blong hem. “?Wanem i hapen?” hem i askem.
Bel blong Daniel i hevi. Hem i no talem wan samting. Hem i klaem i go insaed nomo long trak mo tata long ol kasen blong hem.
Taem oli stap draev i gobak long haos, Daniel i sidaon kwaet long jea biaen. Hem i traem blong ridim buk blong hem. Be hem i no save tingting nomo. Hem i no filim gud long wanem i hapen. Hem i save se blong stap ones i stret samting blong mekem. !Be blong talem trutok tu bae i nogud! Bae mama mo papa blong hem bae tufala i kros long hem. Anti blong hem tu.
Afta Daniel i tingbaot fevret skripja hiro blong hem. Daniel insaed long OlTesteman we oli sakem hem i go long hol blong ol laeon from hem i jusum wanem i raet. Hem i stap strong. Maet Daniel tu i save stap strong.
“?Ei, mama?” Daniel i talem. “Mi sakem dat blong gras, mo i fas long trak blong Anti Robilyn mo i ben. Hem i rong blong mi.”
Mama i lukluk hem long fored glas blong trak. Hem i no kros olsem we Daniel i tingting long hem. “Tangkyu blong talem trutok,” hem i talem.
Daniel i pulum gud win. “Mi save ringim Anti Robilyn taem yumi kasem haos?” hem i talem. “Mi wantem talem sore. Mo bae mi wokhad blong kasem mane blong pem blong fiksim trak blong hem.”
Mama i smael. “Hemia wan gudfala tingting.”
Hevi filing long bel i lus, mo Daniel i filim pis. Hem i bin strong inaf blong talem trutok. From Jisas Kraes, hem i save sakem sin mo mekem ol samting i stret.
Pikja droing i kam long Josh Talbot