“Saens Projek,” Fren, Septemba 2024, 18–19.
Saens Projek
Papa long Heven i wantem yumi blong gohed blong stap traem.
Stori ia i hapen long USA.
Bradley i sakem wan nara kap blong sanbij insaed long baket blong hem. !Hem i nidim blong gat plante!
Bae i no long taem bae spesel dei blong saens blong skul blong hem i tekem ples. Bradley i stap mekem wan model we bae i soem olsem wanem wan taetol wef i wok. Hem i lanem se taetol wef hem i ol bigfala wef blong wota we etkwek i tekem ples long solwota i mekem i hapen. Hem i wantem projek blong hem blong i stret evriwan. !Ating bae hem i winim wan praes!
Taem we baket long hem i fulap, Bradley i karem sam stik. Afta hem i faenem wan plastik kontena mo sam smolsmol pleplei haos long rum andanit long haos.
Bradley i kapsaetem sanbij i go insaed long kontena ia blong mekem graon. Wetem kea hem i putum ol haos mo ol tri. !Nekis gudfala pat blong hem nao hem i wota! Taem i kapsaetem i go insaed, hem i save pusum wan pis katen tru long wota blong mekem wef.
Afta hem i mekem wan bigfala mistek. Hem i putum tumas wota insaed. Ol haos oli fulap long wota—mo hem i no mekem wan wef yet. Wetwet sanbij ia i kam sofsof evriwan.
Bradley i singaot long mama we i stap long kijin. “?Wanem nao bae mi mekem? Mi putum tumas wota insaed.”
“Hemia i ORAET. Yu save stat bakegen,” mama i talem. “Bae yumitu mekem tugeta mo meserem smolsmol evri taem.”
“Okei.” Bradley i hangem hed blong hem mo go aotsaed mo karem moa sanbij.
Long taem ia tufala mesarem gud stret amaon blong wota mo kapsaetem i go insaed. Bradley i muvum katen mo wajem ol wef i fas long sanbij. !I wok!
Nekis wan Bradley mo mama i wok long posta blong hem. Hem i stat blong raetem sam toktok abaot taetol wef. Be ol toktok ia oli no fit insaed long pej ia.
“Mi no wantem raetem evriwan bakegen!” Bradley i talem. Hed blong hem i stat blong i soa.
Yumi no nid blong raetem evriwan bakegen,” mama i talem. “Yumi save talem bakegen long sam toktok nomo we bae i save fit long pej ia.
Bradley i harem nogud. Posta blong hem i no luk nating olsem we hem i wantem. “Mi no wantem mekem samting ia. Bae i no luk naes sapos ol toktok oli no stap stret gud.”
“Blong lan hem i had.” Mama i haggem hem. “Samtaem bae yumi save mekem ol mistek. Be impoten samting i blong yumi no givap. Papa long Heven i wantem yumi blong gohed blong stap traem. Bae yumi spel smol mo finisim long moning.”
Long nekis moning, tufala i flatem posta blong hem. Hem i no stret evriwan, be Bradley i filim gud smol long hem.
Spesel dei blong saens i kam. Mama i dropem Bradley long skul. “Tingbaot,” hem i talem, “yu wok had long projek blong yu mo lanem plante samting. Mo hemia wanem i impoten.”
Bradley i karem saens projek blong hem i go long bigfala bigfala haos blong spot. Insaed long haos ia i fulap long ol projek mo ol posta. Evriwan long klas fo oli stap sidaon mo wet from taem blong olgeta blong soem projek blong olgeta.
I no longtaem i taem blong Bradley. Hat blong hem i pam hariap taem hem i wokbaot i go long fored. ?Wanem bae i hapen sapos evri samting i go rong?
Bradley i muvum katen tru long wota mo soem long ol jaj olsem wanem ol wef oli kam kasem long graon.
“?Wanem nao i mekem ol bigfala wef ia long solwota oli girap?” wan long ol jaj i askem.
“Ol bigfala wef oli girap tru long.” Maen blong Bradley i go emti. “!Mi no save tingbaot! Be mi save talem sam samting abaot taetol wef.” Hem i ridim evri samting long posta blong hem.
Afta skul Bradley i klaem go insaed long trak wetem projek blong hem.
“?Projek i go olsem wanem?” Mama i askem.
“I no olsem we mi wantem.” Bradley i smael “Be mi traem bes blong mi mo mi gohed blong traem.
Ol pikja droing oli kam long Adam Koford