“Boring Dei blong Patrik,” Fren, Septemba 2024, 10–11.
Boring Dei blongPatrik
Ol bigfala brata blong Patrik oltaem oli bisi blong spenem taem wetem hem.
Stori ia i hapen long USA.
Patrik i stap lukluk i go antap long siling taem hem i stap lei daon long bed. Hem i boring. Hem i bin ridim ol animol buk blong hem, jiamjiam long trampolin, ronron long baeskel blong hem raon long rod blong haos blong hem. ?Wanem nao hem i save mekem naoia?
Patrik i stanap i wokbaot i go long rum blong bigfala brata blong hem Daniel. “?Bae yu save pleiplei wetem mi?” Patrik i askem.
“Sore mi no save. Mi mas stadi,” Daniel i talem. Hem i no iven lukluk nomo i kam, ae blong hem i stap nomo long buk we hem i stap ridim.
Patrik i harem nogud. Daniel oltaem i stap stadi. ?Hem i no save spel smol?
Okei. Daniel i bisi, be Patrik i save askem nara brata blong hem, Simion. “Mi les. ?Bae yu save pleiplei wetem mi?” Patrik i askem.
“No, i no tedei. Bae mi go aot wetem ol fren.” Simion i putum jaket mo wokbaot i go aotsaed long doa long fored.
!Patrik i kros tumas! !Hat blong hem i pam moa kwik! Ol bigfala brata blong hem oltaem oli bisi blong pasem taem wetem hem. Hem i ron i go long bedrum blong hem mo i sarem doa strong.
!I no stret olsem! Patrik i talem.
Hem i stanap strong mo jiam i go long bed blong hem. Hem i filim se jes blong hem i hevi. !Hem i boring tumas! Be hem i kros tumas blong tingting long wanem bae hem i mekem.
Afta hem i tingabaot wan samting hem i lanem long skul. Tija blong hem i tijim olgeta se blong stap pulum gud ol win, i save helpem olgeta i filim kwaet.
Hem i talem, “I had blong fiksim wan samting taem yu kros.” Sapos tingting blong hem i stap daon, Patrik bae i save tingting long wan wei blong faenem wan ansa long boring problem ia.
Mekem se Patrik i pulum bigfala win. Afta hem pulum wan moa bakegen. Afta, sam moa bakegen, jes blong hem i nomo hevi. Be hem i no save wanem blong mekem yet.
Hem i sidaon mo i lukluk long pikja blong Jisas Kraes long wol blong hem. ?Wanem nao Hem i wantem Patrik blong mekem?
Patrik i go daon long ol ni blong hem. Hem i talem, “Papa long Heven , plis helpem Daniel taem hem i stap stadi. “Helpem Simion blong gat wan gud taem wetem ol fren blong hem. Mo plis helpem mi blong mi no stap boring.”
Taem Patrik i finis blong prea, hem i gat wan aedia. Hem i ron i go long rum blong Daniel.
“Daniel, taem yu finis, ?yumitu save pleplei tugeta?”
Daniel i karemaot ae blong hem long buk mo lukluk klok long wol. “Mi save spel blong 30 minit. Afta yumi save go aotsaed. ?Yu wantem mekem hemia?”
“!Yes!” Patrik i smael mo i ron i gobak long rum blong hem. Hem i faenem wan animol buk abaot ol taega we hem i laekem blong lukluk long hem. Afta hem i stap ridim buk ia, hem i pleplei wetem ol blok. Sam taem i pas, mo hem mo Daniel i wokbaot i go long ol bus kolosap long haos blong olgeta.
“Yu wantem blong pleplei ol man blong faet long spes o ol man blong wokbaot long bus. Daniel i askem.
“Mi no wantem save. Mi glad nomo se yumi save spenem taem tugeta. Hemia i moa gud bitim we yu stap boring,” Patrik i talem.
Daniel i smael. “Okei, be pleplei wetem yu hem i moa gud bitim taem we mi stap stadi blong wan tes.
Patrik i harem se hem i glad tumas taem hem mo Daniel i wokbaot fo leg long gras. Mekem tingting blong hem i go daon i helpem hem i tingting moa klia mekem se hem i save faenem ansa long ol problem blong hem. Mo Papa long Heven i helpem hem blong kam moa olsem Jisas Kraes. Long en blong hem, hem i wan gudfala dei.