“Wari Bokis,” Fren, Septemba 2024, 36–37.
Wari Bokis
Olivia i bin tingting tumas abaot ol wari blong hem.
Stori ia i hapen long USA.
Olivia i hariap i kamaot long klasrum blong hem bifo skul i finis. Hem i traem blong no luk long ae blong eniwan.
Tedei i fas dei blong Olivia blong kasem tritmen blong dokta long saed blong tingting. Mama blong hem i eksplenem se bae hem i go luk wan dokta we bae i helpem hem long ol wari blong hem. Olivia i wari tumas. Samtaem hem i filim se hem i wari tumas mekem se i had blong hem i silip o gat wan gud taem wetem ol fren blong hem.
Olivia i go insaed long long trak wetem mama mo slakem hem i go daon long jea blong hem.
“?Yu Oraet?” Mama i askem.
Olivia i no ansa blong smol taem. “?From wanem mi mas go luk dokta?”
Mama stat blong draev. “Papa long Heven i givim ol dokta long yumi blong helpem yumi. I olsem we Hem i givim long yumi ol narafala samting blong helpem yumi, olsem ol fren mo ol skripja. ?Yu yu tingbaot skripja jen we yumi mekem?”
Olivia i agri. Mama i bin helpem hem blong faenem ol skripja ves we i bin helpem hem wetem ol wari blong hem. Long wanwan ves, mama i raetem wea ples blong faenem nekis wan. Taem Olivia i wari long naet, bae hem i talem wan prea mo faenem wan long ol ves insaed long skripja. Afta hem bae i ridim ol narafala ves long jen ia kasem taem we hem i silip.
Taem we Olivia mo Mama i wokbaot i go insaed long ofis blong dokta, Dr. Posy i introdiusum hemwan. Hem i askem Olivia abaot ol filing blong hem. Olivia i talem long hem smol abaot ol wari blong hem.
“Plante pipol oli gat wan samting we oli singaotem wari,” Dr.Posy i talem. “Oli stap wari plante olsem yu stap mekem. Be yu save mekem sam samting blong helpem yu blong filim se yu no wari tumas. ?Yu save traem wan blong mi?”
Olivia i lukluk ol sus blong hem mo i agri.
Dr. Posy i givim long Olivia wan smol bokis. “Hemia i wan wari bokis. Hem i kipim ol wari blong yu i sef i stap, mekem se yumi no stap tingbaot olgeta.”
Olivia i tantanem bokis long han blong hem. Hem i no luk olsem wan samting we i spesel.
“Nekis taem yu filim se yu fraet, raetem daon wari blong yu long wan pis pepa mo putum insaed long bokis ia,” Dr. Posy i talem. “Afta jusum wan taem blong openem bokis evri dei blong wari taem. Sapos yu yu stap wari abaot eni samting bifo wari taem, talem, ‘mi no nid blong tingbaot hemia naoia.’”
“OK,” Olivia i talem. Dr. Posy i helpem hem blong raetem ol bigfala wari blong hem, mo Olivia i pusum olgeta i go insaed long bokis ia.
Sam taem afta long dei ia, wan long ol wari blong Olivia i kam long maen blong hem. I stap insaed long wari bokis, hem i talem long hemwan. Mi save wari long hem afta. Hem i traem blong stop blong tingting long hem. Hem i pleplei wetem brata blong hem.
Long taem blong go long bed, Olivia filim fraet smol. Naet taem i taem we ol wari blong hem i plante. Hem i putum wari bokis mo ol skripja blong hem long saed blong bed mo singaotem mama.
“?Sapos i no wok?” hem i askem.
Mama i haggem hem. Bae yumi gohed blong traem. Papa long Heven bae i helpem yu faenem ol narafala wei blong help.”
Olivia i sakem hed blong agri. “Ating bae mi sud raetemdaon hemia tu blong wari bokis tu.”
“Gudfala tingting,” Mama i talem. Hem i talem wan prea wetem Olivia. Hemia i mekem Olivia i harem gud smol.
Wan smol taem afta mama i ofem ol laet, wan wari i kam long maen blong Olivia. Hem i onem smol laet blong hem. Hem i raetem daon wari ia mo putum insaed long bokis ia blong afta. Hem i talem wan narafala prea blong askem Papa long Heven blog givim kamfot long hem.
Afta hem i openem olgeta skripja blong hem mo lukaotem wan ves we hem i kalarem long skripja jen blong hem. Faswan hem i faenem i Aesea 41:10. “Yufala i no fraet, from mi mi stap wetem yufala.”
Long saed blong ves ia mama i raetem “Doktrin mo Ol Kavenan 6:36.” Olivia i lukaotem skripja ia mo i ridim laod. “Lukluk long mi long evri tingting blong yutufala; no gat tu tingting, no fraet.”
Olivia i filim pis. Hem i save se bae hem i tingting long plante moa wari. Be Papa long Heven i givim long hem plante samting blong i helpem hem i harem moa gud. Hem i bin ansa long ol prea blong hem. !Mo hemia i hapen plante taem!
Ol pikja droing oli kam long Jennifer Naalchigar