“Stap Leftemap Tingting blong Tugeta Tim,” Fren, Septemba 2024, 30– 31.
Stap Leftemap Tingting blong Tugeta Tim
Jayne i mekem fes blong hem i nogud. !Hem i no wantem blong narafala tim blong win!
Stori ia i hapen long Saot Korea.
Jayne i kakae ol las nudel blong hem. Mmmm. !I tes naes tumas!
“!Yumi plei Yut Nori!” Angkel Ji‑Ho i talem.
!Hem i taem ia bakegen blong yia! Famli blong hem i stap selebretem Jusok, Fasin blong talem tangkyu long Korea. Tedei famli blong Jayne i kam tugeta mo kakae plante kaekae mo plei Yut Nori tugeta. Yut Nori i fevret gem blong Jayne.
Evriwan i sidaon long wan sekol long flo. Jayne i lukluk raon. ?Wanem tim nao hem i wantem blong stap long hem? Hem i muv mo sidaon narasaed long Angkel Ji‑Ho. “!Mi wantem stap long tim blong yu!” hem i talem. “!Bae yumi winim evri man!”
Angkel Ji‑Ho i laf. “Wetem yu long tim blong mifala, bae yumi gat wan gudfala janis blong win!”
Mama blong Jayne putum gem bod ia long medel blong sekol. Jayne i helpem hem blong putum aot ol pis long gem bod. Oli pasem fo stik long tim we bae i go faswan.
Kasen blong Jayne Ana i go faswan. Hem i sakem ol stik i go antap. Ol stik ia oli foldaon mo i soem hamas spes nao tim bae i muv long gem bod. Evri fo stik oli lukluk i kamdaon, we i minim se Ana i gat wan Yut! Mekem se hem i muvum tim blong hem i go fored fo spes mo hem i gat wan moa janis blong plei bakegen.
Be Ana i no stap long tim blong Jayne.
Jayne i foldem han blong hem mo i harem nogud. “Mi hop se bae hem i no sakem gud,” hem i talem slo long angkel Ji-Ho.
“!Stap Glad!” Angkel Ji‑Ho i talem. “Gem i jes stat nomo.” Hem i givim wan smael blong leftemap tingting blong Jayne.
Afta nambatu raon blong Ana blong sakem stik, tim blong Jayne i sakem stik. Be oli no muvum ol stik blong olgeta olsem tim blong Ana i mekem.
Evri taem wanwan tim i plei, famli memba blong Jayne oli glad mo laf. Jayne i stap wajem ol gem pis i muv raon long bod. Evriwan i stap gat wan gud taem.
Evriwan be Jayne. Tim blong hem i stap lus.
Naoia i taem blong Jayne i plei. Hem i sakem ol stik i go antap, be wan nomo i lukluk i kam daon. Tim blong hem i muvum pis ia wan taem nomo i go fored.
Jayne i foldem ol han blong hem. “Mi nomo wantem plei!” hem i singaot. “Mi wantem mifala blong win.”
Sek nomo, evriwan i stap kwaet. Taem hem i lukluk i kam antap, famli blong hem i stap lukluk hem. I luk olsem, oli sek blong luk hem i kros tumas.
Fes blong Jayne i filim hot. Hem i harem nogud se hem i no hapi long famli blong hem. Hem i no stap kros olsem ia. Hem i stanap blong aot long sekol.
Angkel Ji-Ho i putum han antap. “Yu no nid blong aot,” hem i talem. “Blong stap win i no evri samting. Traem blong gat gud taem nomo.
“Okei.” Jayne i sidaon bakegen. Hem i wantem gat wan gud taem olsem evriwan. Hem i pulum wan longfala win mo wajem kasen blong hem Ben i sakem ol stik ia.
“!Naes wan. Ben!” Angkel Ji‑Ho i talem. Hem i saon olsem se hem i hapi tumas.
Jayne i lukluk Angkel Ji-Ho wetem ol ae i open bigwan. !Hem i stap glad from nara tim! Maet hemia from wanem hem i stap gat wan gud taem.
Taem nekis janis i kam, Jayne i disaed blong glad from evriwan tugeta saed blong tim. Angkel Ji‑Ho i talem tru. Blong stap win i no evri samting. Jisas i save helpem hem blong stap hapi from ol famli memba blong hem iven sapos hem i lus.
Taem we hem i taem blong Ana, Jayne i smael long hem. !Gud lak! Yu save mekem hemia.
Long narasaed sekol, Ana i smael i kambak. Jayne i filim wom insaed. Hem i stap gat wan gud taem!