“Ang Kaigmat sa Yawa batok sa Kaalam sa Dios: Dili Makalupig,” Alang sa Kalig-on sa mga Kabatan-onan, Peb. 2021, 16–19.

Dali, Sunod Kanako

Ang Kaigmat sa Yawa batok sa Kaalam sa Dios: Dili Makalupig

Ni David A. Edwards

Mga Magasin sa Simbahan

Makakat-on kamo kon unsay nakat-unan ni Joseph Smith: ang kaalam sa Dios kanunay nga modaug sa katapusan.

batan-ong lalaki nga nangapkap diha sa gabon

Ang usa ka panghitabo nga kanunay giistoryahan gikan sa sayong bahin sa kasaysayan sa Simbahan naghisgot sa pagkawala sa 116 ka pahina sa manuskrito sa Basahon ni Mormon. Duha ka rason nga atong i-istorya kanunay ang sugilanon niini nga hitabo mao ang: (1) direktang may kalabutan kini sa duha ka pagpadayag sa Doktrina ug mga Pakigsaad (mga seksyon 3 ug 10), mao nga kanunay kining hisgutan sa atong pagtuon sa kasulatan; ug (2) ang mahangturon nga mga leksyon nga nakat-unan ni Joseph Smith gikan niini nga mga kasinatian makatabang kanato sa daghang mga paagi karon.

Usa niadto nga mga leksyon gitudlo sa Ginoo niini nga mga pulong: “ang akong kaalam labaw pa ka gamhanan kay sa kaigmat sa yawa” (Doktrina ug mga Pakigsaad 10:43). Gusto sa Ginoo nga mosalig kita Kaniya. Kon atong buhaton, makaangkon kita og mas dakong panabut, kalig-on, ug kalinaw.

Kasinatian ni Joseph Smith

Human nga nawala ang 116 ka pahina, ang Ginoo misulti kang Joseph Smith nga dili hubaron pag-usab kana nga bahin sa bulawang mga palid, tungod kay ang dautan nga mga tawo nagplano sa paglingla sa mga tawo pinaagi sa pagpakita sa kalainan tali sa duha ka hubad. Apan mga siglo ang milabay, ang Ginoo misulti ni Nephi sa paghimo sa gagmay nga mga palid ug misulti ni Mormon sa paglakip niini sa iyang rekord. Mao nga si Joseph nakasugod pag-usab sa paghubad gikan didto, ug kita adunay Basahon ni Mormon karon. (Tan-awa sa Doktrina ug mga Pakigsaad 10; 1 Nephi 9; Mga Pulong ni Mormon.)

bulawan nga mga palid ug Basahon ni Mormon

Ang yawa ug kadtong kinsa miserbisyo sa iyang mga katuyoan miandam og usa ka maigmat nga laraw, apan napugngan kini sa kaalam sa Ginoo.

Ang Kaigmat sa Yawa

Ang kaigmat sa yawa adunay daghang matang, apan usa ka sukaranan nga mensahe sa luyo niini daw mao ang “Ayaw og tuo.” Kini mao ang labing unang gipanghingusgan nga mensahe sa kaaway ngadto sa mga anak ni Adan ug ni Eva human nga ang ilang mga ginikanan mitudlo kanila sa plano sa kaluwasan (tan-awa sa Moises 5:13). Ug kini mao ang sama nga mensahe diha sa sentro sa iyang maliputon nga mga plano karon.

Unsa man ang dili gusto sa yawa nga inyong tuohan? Aw, sa tinuod lang, bisan unsa nga tinuod o maayo. Kon mahimo niya nga dili kamo motuo sa reyalidad sa Langitnong Amahan, ni Jesukristo, sa plano sa kaluwasan, sa mga kasulatan, sa mga sugo, sa Pagpahiuli, sa mga propeta, nan nagmalampuson siya. Dayon mas sayon na ang pagdala kaninyo sa pagnunot ngadto sa nagkalain-lain nga mga tintasyon ug pagpalayo kaninyo sa kamatuoran, paghinulsol, ug kahimayaan.

Ug sa unsang paagi nga siya makadala kaninyo sa dili pagtuo? Pinaagi sa pagtanom og kahadlok, walay kasiguroan, ug pagduha-duha diha sa inyong hunahuna.

Usa ka Ehemplo Karon

Sama pananglit, karon (sama lang sa panahon ni Joseph Smith) ang mensahe sa yawa sa dili pagtuo nakatutok pag-ayo kang Joseph Smith ug sa iyang buhat isip ang propeta sa Pagpahiuli. Ang mga tawo mosulay sa pagdani kaninyo nga si Joseph Smith dili propeta ug ang Basahon ni Mormon dili tinuod. Kon magsiksik kamo sa online, mahimong makakuha kamo og impresyon nga adunay daghang ebidensya batok sa Propeta ug sa iyang buhat. Apan kini usa ka maigmat nga paglingla.

Sama nga ang mga tawo gusto nga modaut ni Joseph Smith sa iyang panahon ug andam nga mamakak ug manglingla aron sa pagbuhat niini, adunay mga tawo karon nga patutukan lamang kaninyo ang koleksyon sa dili kompleto o gituis nga mga kamatuoran mahitungod sa Propeta o sa Basahon ni Mormon. Dili sila gusto nga makasabut kamo sa tibuok kamatuoran; gusto nila nga maglunang kamo sa pagduha-duha.

Tulo ka Matang sa Tambag

Si Elder D. Todd Christofferson sa Korum sa Napulog Duha ka mga Apostoles mihatag niining tulo ka matang sa tambag alang sa pagtuon mahitungod kang Propeta Joseph Smith: “Pagmapailubon, ayaw pagpakataphaw, ug ayaw ibaliwala ang Espiritu” (“The Prophet Joseph Smith” [debosyonal nga pakigpulong sa BYU–Idaho, Sept. 24, 2013], byui.edu/devotionals).

Pagmapailubon. Ang Ginoo kanunay nga mopanalangin kanato tungod sa atong pailub ug hugot nga pagtuo. Kon kita mapailubon ug magpadayon sa pagtuo, ang unsay dili klaro kasagaran mahimong mas klaro paglabay sa panahon. Ug ang pipila ka “ebidensya” nga gidala sa mga tawo batok sa Propeta karon mahimong itambog ugma tungod sa bag-o nga ebidensya nga magsupak niini.
Ayaw pagpakataphaw. Kon kita ganid sa atong mga pagtuon, makalikay kita nga matanggong sa tinuyo nga limitado, negatibong panan-aw sa laing tawo ug motan-aw sa mas lapad nga istorya mahitungod sa Propeta—sa mga kamatuoran ug sa konteksto niini. Atong makita nga ang mga bunga sa iyang buhat hilabihan ka maayo.
Ayaw ibaliwala ang Espiritu. Kon maminaw kita sa mga hunahuna, mga pag-aghat, ug mga pagbati nga moabut gikan sa Espiritu, makabaton kita og mas kompleto nga mga himan alang sa pag-angkon ug pagsabut sa kamatuoran. Ug kita makapadayon ug motubo sa espirituhanong paagi bisan kon wala kanato ang tanang mga tubag sa atong mga pangutana.

Ang Kaalam sa Dios

Ang kaalam sa Dios mas labaw gayud kay sa kaigmat sa yawa. Bisan kon wala kita masayud sa tanan nga mga rason nga nagpaluyo sa mga sugo sa Ginoo, makasalig gihapon kita Kaniya ug sa Iyang mga propeta.

Si Nephi wala masayud nganong ang Ginoo misugo kaniya sa paghimo sa gagmay nga mga palid. Wala siya masayud kabahin sa 116 ka pahina ug sa mga plano sa pagdaut ni Joseph Smith 2,400 ka tuig sa umaabut. Apan si Nephi nasayud nga kini “alang sa usa ka maalamon nga katuyoan diha [sa Ginoo],” ug siya nasayud nga siya makasalig Kaniya (tan-awa sa 1 Nephi 9:5–6).

Karon, makasalig usab kita sa Ginoo, bisan kon wala kita masayud sa tanan nga mga rason nga nagpaluyo sa tambag nga Iyang gihatag kanato pinaagi sa Iyang mga propeta. Mahimo kitang magpadayon sa pagtuo ug pagbaton og hugot nga pagtuo diha ni Jesukristo ug sa Iyang pinili nga propeta sa Pagpahiuli, nga si Joseph Smith, bisan kon wala matubag ang atong tanang pangutana. Makasalig kita sa tukmang panahon sa Ginoo. Makapadayon kita sa pagbaton og paglaum, bisan kon ang atong mga hagit ingon og makahadlok ug makaugtas.

Mahimo nato kining tanan tungod kay, bisan unsa pa man, kon ang maigmat nga mga laraw sa yawa isangka batok sa kaalam sa Dios, dili kini makalupig. Ang kaalam sa Dios kanunay nga mopatigbabaw.