“Kamo ang Bayani sa Inyong Kaugalingong Istorya,” Alang sa Kalig-on sa Kabatan-onan, Peb. 2021, 8–11.
Kamo ang Bayani sa Inyong Kaugalingong Istorya
Litrato gikan sa Getty Images
Kon maghunahuna ko sa kabatan-onan ug mga young adult sa Simbahan ni Jesukristo, mobati ko og dakong kalumo diha kaninyo. Kon maghunahuna ko kaninyo, makita nako ang akong kaugalingon!
Sa dihang batan-on pa ko, nagbarug ko diha tungod sa koral sa usa ka internasyonal nga airport ug nagtan-aw niadtong maanindot kaayong mga eroplanong manglupad.1 Ang paglupad ug ang pagtugpa usa ka milagroso nga talan-awon. Usa ka butang nga nakatandog kanako! Gusto kaayo ko nga makasulod sa cockpit sa usa niadtong maanindot nga mga eroplano ug mobati sa kanindot sa paglupad gikan sa yuta, mosaka ibabaw sa mga panganod, ug mobiyahe ngadto sa bag-ong kapunaw-punawan.
Apan kana ba nga damgo posible? Wala ko natawo nga adunahan. Ang akong pamilya kaduha nahimong refugee, nga nakadala lang og unsay among mabitbit. Giisip ako sa uban nga usa ka taga gawas [outsider]. Samtang ang ubang mga bata nagdula uban sa ilang mga higala, ako kinahanglang mogahin sa akong kahapunon ug mga katapusan sa semana sa pagtrabaho diha sa among negosyo sa pamilya nga maglabada, kasagaran isip usa ka tighatud.
Nagsulti ko niini tungod kay ang pipila kaninyo lagmit naghunahuna usab kon ang inyong mga damgo mahimo ba kaha nga matinuod. Nasabtan nako unsa ang inyong gibati. Kon makabalik ko sa panahon ug makasulti nianang batang lalaki kinsa nagbarug sa pikas habig sa koral nga nangandoy alang sa mas maayong kaugmaon, ako moingon:
“Dili kini sayon, apan makahimo ka niini. Mamaayo ra ang tanan diha nimo. Ang panaw mahimong puno sa mga hagit, Dieter. Apan ang panlimbasug mismo makapausab kanimo ngadto sa tawo nga gusto nimong mahimo. Paningkamot og maayo. Pagmakanunayon. Tutuki ang mga butang nga imong mausab, dili kaayo ang mga butang nga dili nimo mausab. Pagbaton og hugot nga pagtuo. Pagbaton og paglaum. Salig sa Dios. Hibaloi nga kon imong buhaton ang imong bahin, ang mga butang mamaayo ra.”
Mao usab kini ang akong tambag kaninyo karon.
Kamo ang Bayani sa Inyong Kaugalingong Istorya
Minahal kong mga higala, sukad sa ako gayud nga pagkabata ganahan kaayo ko og mga istorya sa pagpanimpalad. Kadaghanan niadtong mga istorya pagasugdan sa usa ka tawo kinsa adunay problema. Magkadako ang problema, mas magkulba hinam ang istorya. Ug ang wala mahibaloi sa maong karakter mao nga ang mga butang magkagrabe pa! Magkangil-ad pa kini og maayo, sa pagkatinuod, nga ang bayani mahimong magsugod nga mobati nga siya dili gayud makabuntog sa mga hagit nga iyang giatubang.
Ingon niini, hangtud nga adunay espesyal nga butang nga mahitabo sa ilang kinabuhi, sama sa usa ka kasaligan nga tawo o usa ka tinubdan sa kaalam mopakita aron sa pagtabang kanila nga makaangkon og igong kahibalo ug panabut aron makahimo og bag-ong plano. Ang nahabilin sa istorya mao kon giunsa sa bayani sa pagsunod ang plano ug buntugon ang mga kalisdanan nga nakigbatok kaniya.
Sa miaging kinatibuk-ang komperensya, namulong ko mahitungod ni Bilbo Baggins—usa ka ordinaryo kaayong duwende [hobbit] nga milakaw alang sa usa ka panimpalad sa pagpatay sa usa ka dragon. Si Gandalf mao ang iyang tinubdan sa kaalam ug tabang. O hunahunaa si Obi-Wan Kenobi, kinsa motabang ni Luke Skywalker nga makakat-on unsaon sa pagkahimong hanas sa mga Pwersa ug buntugon ang Death Star. Si Anne sa Green Gables adunay Marilla ug Matthew, kinsa nahigugma kaniya ug naggiya kaniya samtang nagpadayon siya gikan sa pagkasinalikway nga ilo hangtud sa pagkahimong usa ka maayong estudyante ug gipangga nga higala. Si Hermione Granger ug si Harry Potter adunay maamumahong mga magtutudlo sa Hogwarts School of Witchcraft and Wizardry aron matabangan sila nga makat-on unsay ilang kinahanglan buhaton aron mabuntog ang “He-Who-Must-Not-Be-Named.”
Ug karon, ako maghisgot bahin kaninyo. Mobati man kamo nga sama sa usa ka bayani o dili, bayani kamo! Kamo ang bayani sa inyong kaugalingong istorya sa kinabuhi! Tingali nagbarug kamo sa usa ka koral diha sa inyong kaugalingon, nangandoy kamo sa butang nga kamo mamahimo. Usahay, kamo mobati nga nag-inusara—apan kamo wala mag-inusara.
Kamo anak sa Dios. Siya ang inyong Langitnong Amahan. Siya nahigugma kaninyo ug maanaa Siya pinaagi lang sa pag-ampo. Aduna kamoy Jesukristo. Ang mga epekto sa Iyang Pag-ula kanunayng anaa aron sa pagwagtang sa kasakit ug kasubo tungod sa mga kasaypanan. Anaa kaninyo ang maamumahong mga bishop ug ubang mga lider sa Simbahan ug ang inyong pamilya sa ward [ward family] kinsa makagiya ug makatabang kaninyo.
Salig Nga ang Dios Mogiya sa Inyong mga Lakang
Bisan unsa pa ka layo sa inyong paminaw ang inyong mga tumong, hibaloi kini: mahimong dili kamo makaabut kon asa kamo gustong moadto sulod sa usa ka adlaw o usa ka semana o bisan usa ka tuig. Apan kon kamo magpadayon sa paghimo og ginagmayng lakang ug maningkamot sa matag adlaw sa pagsunod sa inyong plano, ang mga butang mamahimo ra ug kamo makakab-ot sa inyong mga tumong. Siguradong makakaplag kamo og mga surprisa ug wala damhang mga hagit atol sa inyong panimpalad, apan kadtong mga butanga mao ang mga butang nga makapahimo og usa ka malampuson nga istorya—ang inyong istorya sa kinabuhi! Ug, labaw sa tanan, hinumdumi nga kon kamo mosalig sa Ginoo, magkat-on Kaniya, magbaton og hugot nga pagtuo diha Kaniya, Siya mogiya sa inyong dalan.2
Akong minahal nga mga higala, isig ka biyahero sa dalan niining dakong panimpalad sa mortalidad, ayaw pagpakawala sa kadasig. Ayaw paghunong. Ang kaugmaon hayag! Ugma damlag inyong lingion ang tawo nga kamo mao karon nga may kamabination ug kalooy, ug kamo masayud nga ang mga lakang nga inyong gihimo karon nakaumol kaninyo ngadto sa pagkahimong talagsaon nga tawo nga kamo mamahimo.