“Nalubong sa Lapok: Usa ka Leksyon kabahin sa Paghinulsol,” Alang sa Kalig-on sa mga Kabatan-onan, Peb. 2021, 14–15.
Dali, Sunod Kanako
Nalubong sa Lapok
Usa ka Leksyon kabahin sa Paghinulsol
Samtang mopili kita sa pagdangop ngadto sa Langitnong Amahan ug ni Jesukristo, atong makita nga Sila anaa ug andam sa pagtabang kanato nga mahaw-as gikan sa bisan unsang lisud nga kahimtang.
Mga paghulagway ni Dean MacAdam
Usahay lisud bation nga hisgutan ang mahitungod sa paghinulsol. Lagmit wala gani kita masayud unsa ang gipasabut sa paghinulsol. Tingali maghunahuna kita nga ang uban lang ang mahimong mapasaylo o nga kita kinahanglan lang maghinulsol sa dagkong mga sala. Ayaw paminawa kadtong mga hunahuna.
Ang Langitnong Amahan gusto nga kamo masayud unsa gayud ang gipasabut sa paghinulsol. Gusto Siya nga masayud kamo nga dili kini usa ka silot apan usa ka panalangin. Ang paghinulsol mao ang kausaban diha kanato—sa atong mga hunahuna, sa atong mga tinguha, sa atong mga aksyon, sa ato gayud nga kinaiyahan. Kabahin kini sa pagkahimong mas sama kang Kristo. Ang paghinulsol makatabang kaninyo nga mobati og dugang kalipay karon.
Malipayon nga Paghinulsol
Sa unsang paagi ang paghinulsol makahatag og kalipay?
Si Kristo miingon, “Balik ngari kanako, ug maghinulsol sa inyong mga sala … aron ako moayo kaninyo”(3 Nephi 9:13). Ang paghinulsol nagtugot kanato nga “mobati sa kalipay nga magbaton sa tabang sa Manluluwas.”*
Si Satanas gusto nga maghunahuna kita nga nag-inusara kon kita makahimo og kasaypanan. Kana klaro nga dili tinuod! Ang paghinulsol makatabang kanato aron makita nga ang Langitnong Amahan ug si Jesukristo anaa sa kanunay. Hinoon, anaa ra kanato ang pagdangop ngadto Kanila. Kon atong buhaton, makakaplag kita sa gugma, sa kahupayan ug kalipay sa kahibalo nga kita mahimong mapasaylo ug mosulay na usab.
Usa ka Lapukon nga Kahapunon
Naghunahuna ko niini nga leksyon mahitungod sa paghinulsol human nga nagtan-aw sa akong igsoong babaye usa ka hapon. Sa among luyo nga nataran sa pamilya molapos ra ngadto sa usa ka yuta nga gihawanan alang sa konstruksyon. Panahon sa kusog nga ulan, ang yuta mahimong lapukon. Dili kini kasarangan nga lapok. Dili, kini nga lapok grabe, pilit, ug lawom. Kon kamo malubong, ang paglingkawas sama sa paningkamot nga makalingkawas sa peanut butter.
Usa ka adlaw ang akong manghud nga babaye gustong mogawas ug magdula. Ang akong mama mipahinumdom kaniya nga anha lang sa sementado nga hawanan duol sa balay. Pero, ang akong igsoong babaye miabut ngadto sa yuta.
Pagkataud-taud, nakadungog ko nga adunay naghilak ug milili ko sa gawas. Dili ko katuo! Ang akong igsoong babaye naglingkod sa tunga-tunga sa lapok, nabulit sa lapok, nagdagayday ang mga luha diha sa iyang nawong. Nagpadayon siya sa pagpaningkamot nga makalingkawas, apan imposible. Sa matag higayon nga mosulay siya sa paglihok, mas mounlod pa siya sa mas lawom ug sa mas lawom pa ngadto sa grabing lapok. Siyempre, nagdali kami sa pagdagan aron sa pagluwas kaniya.
Mitabang ko sa akong mama sa pagbutang og mga tabla aron among matumban padulong sa akong igsoon nga dili kami malubong. Ang lapok baga kaayo nga sa dihang ang akong igsoong babaye gibira, ang iyang mga sapatos ug medyas nahibilin sa lapok!
Malimpyo pinaagi ni Kristo
Ang kinabuhi mahimong susama kaayo nianang lapukon nga yuta. Kon dili kita magmaampingon, malubong kita sa sala, sa mga kalibutanong impluwensya, ug sa dili maayong mga desisyon. Kining mga butanga sama sa espiritwal nga lapok nga mopilit ngadto sa atong espiritu ug makapahimo kanato nga mobati og ngil-ad sa kahiladman.
Samtang mopili kita sa pagdangop ngadto sa Langitnong Amahan ug ni Jesukristo, atong makita nga Sila anaa ug andam sa pagtabang kanato nga mahaw-as gikan sa bisan unsang lisud nga kahimtang. Tungod kini sa maulaon nga sakripisyo sa Manluluwas nga si Jesukristo nga kita mahimong mapasaylo ug mahimong limpyo pag-usab. Kamo kanunayng makakaplag og “kalipay sa pagpili nga maghinulsol.”*