“Mga Pag-aghat diha sa Lingkuranan sa Parke,” Alang sa Kalig-on sa Kabatan-onan, Peb. 2021, 20–21.
Mga Pag-aghat diha sa Lingkuranan sa Parke
Ang babaye nga naglingkod sa lingkuranan wala pa masayud niini, apan nagkinahanglan siya nga makig-istorya kanamo.
Paghulagway ni Bethany Stancliffe
Lain na usab kadtong tugnaw ug ulanon nga adlaw alang kanako ug sa akong kauban samtang nanglakaw kami sa kadalanan sa gamayng lungsod nga daplin sa dagat sa Los Vilos, Chile. Lisud gyud ang pipila ka semanaha alang namo—wala mi bisan usa nga matudloan ug nanglimbasug sa pagpangita og bisan kinsang tawo nga gustong maminaw sa among mensahe. Nawad-an gyud ko og kadasig, ug mibati nga wala kami makaangkon og dakong kalampusan tungod kay wala mi makatudlo og daghang leksyon.
Ang akong kompanyon ug ako nanglakaw nianang gabhiona, ug mitan-aw ko sa unahan ug nakita ang usa ka babaye diha sa usa ka lingkuranan sa parke nga naghilak. Nasayud lang ko nga kami kinahanglan nga makig-istorya kaniya. Mitan-aw ko sa akong kauban ug misinyas nga moduol sa babaye. Samtang naglakaw kami padulong kaniya, padayon nakong gibati nga kinahanglan gyud siya nga makadungog og butang gikan namo, apan dili ko makahunahuna kon unsa. Basta nasayud ko nga importante nga makig-istorya kami kaniya.
Sa diha nga nakakita siya kanamo, miingon siya, “Palayo. Dili ko gustong makig-istorya ni bisan kinsa.”
Misulay ko sa pagsulti kaniya kon si kinsa mi ug nga gusto lang mi nga makatabang, apan dili siya maminaw. Mihangyo siya kanamo pag-usab sa pagbiya. Naningkamot ko sa paghunahuna unsay among ikasulti apan nablangko ang hunahuna. Mipalayo mi.
Mga upat pa lang ka lakang ang among gilay-on nga miabut ang laing pagbati nga kami kinahanglan makigsulti kaniya. Milingi ko sa akong kauban ug miingon, “Kinahanglan mobalik kita.”
Namalik kami, ug ang mao gihapon nga butang ang eksaktong nahitabo, ning higayuna mas nasuko pa siya. “Kinahanglan ko nga mag-inusara. Palayo.”
Usab, dili ko makahunahuna og bisan unsang importanting butang nga masulti ngadto kaniya. Makita nako nga aduna siyay problema, apan wala ko masayud unsay iyang gikinahanglan nga madungog. Mao nga nakapanghupaw ko, milakaw mi palayo.
Nalayo-layo na kami og diyutay sa dihang nadawat na usab nako ang pagbati: Lakaw og pakig-istorya kaniya.
“Dili ko ganahan mosulti niini, Hermana,” miingon ko, “apan kita kinahanglan gyud nga mobalik ug makig-istorya nianang babayhana.”
Ang akong kauban misugyot nga dili namo kini buhaton, gumikan kay ang babaye klaro nga wala malipay kanamo.
Sa tinuod lang, miuyon ko niya ug mibati og gamayng kaguol mahitungod sa pagbalik pag-usab ug mosamok sa babaye, kinsa klarong anaa sa kalisdanan. Apan hinoon miingon ko, “Dili, mibati ko nga kita kinahanglan mobalik gayud. Wala pa siya masayud niini, apan kinahanglan siyang makig-istorya kanato.”
Maampingon kaming mibalik ngadto sa babaye nga diha sa lingkuranan, kinsa naghilak pa gihapon. Sa wala pa mi moabut kaniya, militok ko og gamayng pag-ampo. “Langitnong Amahan,” naghunahuna ko, “palihug lang tabangi ko nga masayud unsay gikinahanglan nga madungog niining babayhana.”
Dihang miabut kami ngadto kaniya, miingon ko, “pasayloa ko nga nakasamok nimo pag-usab, apan gusto lang ko nga mosulti nimo nga ikaw anak sa Dios. Siya gusto gayud nga imong masayran nga Siya nahigugma kanimo. Tungod kay Siya tinuod gayud nga nahigugma. Ug malipay kami nga makig-istorya nimo og dugang pa, apan kon dili gyud ka ganahan nga buhaton namo, Ok ra. Gusto lang ko nga masayud ka niana.”
Mihangad siya kanamo sa mas kalma nga panagway. Miingon siya, “Tingali pwede ra kamong molingkod.”
Ang iyang ngalan si Veronica. Gisugilon ug gisulti niya kanamo ang mahitungod sa unsay nahitabo sa iyang kinabuhi. Aduna siyay daghang problema sa pamilya ug nakadawat og dili maayong balita mahitungod sa iyang trabaho. Gibati niya nga walay kapaingnan ug nag-inusara.
Mipaambit kami og usa ka kasulatan gikan sa Basahon ni Mormon diha kaniya ug nangutana kon gusto ba siya nga maminaw pa og dugang mahitungod sa ebanghelyo. Matinahuron siya nga mibalibad apan mipasalamat kanamo sa mensahe ug sa among pag-insister nga makig-istorya kaniya. Sa wala pa mobiya, nag-ampo kami uban kaniya diha sa gamayng lingkuranan sa parke, ug nangayo mi nga siya ug ang iyang pamilya mapanalanginan ug magiyahan.
Wala na namo makita si Veronica pag-usab, apan kana nga kasinatian nagtudlo kanako nga bisan og wala namo makita ang usa ka tawo nga nabunyagan, ang pagpahayag sa gugma ngadto sa usa ka tawo usa ka importanting buhat sa misyonaryo nga buhat. Bisan ang pinakagamay nga mga buhat adunay dakong epekto, mao nga kon makadawat kita og usa ka pag-aghat—bisan kon kini ingon og medyo makahadlok o wala kita masayud kon ngano—importante nga ato kining sundon. Tungod kay ang Langitnong Amahan nasayud kon unsay gikinahanglan sa Iyang mga anak. Bisan kon ang labing maayo nga atong mabuhat mao lang ang pagpaambit sa gugma sa Dios ngadto sa usa ka tawo, kana kalampusan gihapon.