“Usa ka Dako nga Kausaban sa Kasingkasing,” Alang sa Kalig-on sa mga Kabatan-onan, Peb. 2021, 12–13.
Home Evening nga Leksyon nga Maggamit og Butang
Usa ka Dako nga Kausaban sa Kasingkasing
Sa unsang paagi nga ang usa ka itlog magtudlo kanato mahitungod sa kaimportante sa usa ka dako nga kausaban sa kasingkasing?
Daghang mga butang sa atong palibut mausab. Ang tingtugnaw mausab ngadto sa tingpamulak. Ang hayag nga mga kabuntagon mausab ngadto sa ulanon nga mga kahapunon. Ang harina, libadura [yeast], ug tubig gani mausab ngadto sa pan nga hinimo diha sa panimalay! Ang mga kasulatan naghisgot mahitungod sa panginahanglan sa pagbaton og “dako nga kausaban dinhi kanato, o dinhi sa atong mga kasingkasing” (Mosiah 5:2), apan unsa gayud ang gipasabut niana?
Uban niining home evening nga leksyon nga maggamit og butang, makatudlo kamo sa inyong pamilya kon nganong gusto sa Langitnong Amahan nga mausab ang atong mga kasingkasing, ug itudlo ninyo ang baruganan pinaagi sa pagtunaw sa bayanan sa itlog diha sa suka.
Unsay Buhaton
-
Ang kausaban mahimong mahitabo dihadiha dayon, sama sa usa ka kalit nga kausaban sa panahon o ang pagka-usab sa indibidwal nga mga sangkap ngadto sa usa ka pagkaon. Maayo nga hinumduman nga ang atong mga kasingkasing mahimong magkinahanglan og taas-taas nga panahon aron mausab, gani basin tibuok kinabuhi. Si Elder David A. Bednar sa Korum sa Napulog Duha ka mga Apostoles mitudlo nga kini nga kausaban moabut “sa hinay-hinay ug hapit dili gani mamatikdan. … Kining bahina sa proseso sa kausaban nagkinahanglan og panahon, pagpadayon, ug pailub.”1
Ang itlog, sama sa atong mga kasingkasing, magkinahanglan og panahon aron mausab. Mahimo ninyong pangutan-on ang inyong pamilya kon unsa kaha nga mga kausaban nga sa ilang hunahuna mahitabo kon ang itlog biyaan diha sa suka. Ibutang ang itlog sulod sa garapon. Butangi og igong suka nga molapaw sa itlog, lugaki lang sa pagtabon ang garapon, ug biyai kini sulod sa dili mo menos 24 ka oras. Bisan og ang itlog kinahanglan nga ihumol og taudtaod, mahimo ninyong susihon kini ug tan-awon nga mawala ang bayanan.
-
Human sa pagpaabut og 24 ka oras, pundoka pag-usab ang inyong pamilya aron susihon ang mga kausaban sa itlog. Tangtanga ang tabon ug hinay-hinay nga ihuwad ang suka nga magbantay nga dili maapil ang itlog. Ipadaplin ang garapon ug basaha og dungan ang Mosiah 5:1–2.
Sama sa katawhan ni hari Benjamin, kita usab makasinati og kausaban sa kasingkasing pinaagi sa pagkat-on sa pagpaminaw sa Langitnong Amahan ug sa paghupot sa iyang mga sugo. Aduna bay panahon sa inyong kinabuhi diin inyong gibati nga “wala nay hilig sa pagbuhat og dautan, apan sa pagbuhat og maayo sa kanunay” (Mosiah 5:2)?
-
Karon hugasi ang itlog og tubig ug tangtanga ang bisan unsang nahibilin nga bayanan. Bantayi kon unsa na ka hamis ug humok ang itlog! Ipasa-pasa kini ug pahikapa ang matag sakop sa pamilya sa kausaban. Sama nga ang suka nakausab sa itlog, ang Ginoo makausab sa atong mga kasingkasing. Samtang maminaw kita kaniya ug mosunod sa mga pag-aghat sa Espiritu Santo, ang atong mga kasingkasing mohumok. Kon mopili kita nga dili maminaw sa Langitnong Amahan ug magpalayo gikan Kaniya ang atong mga kasingkasing mahimong tig-a, sama sa bayanan sa itlog, ug makapugong kanato sa pagbati sa Espiritu Santo.
-
Ipasulat sa inyong pamilya diha sa usa ka piraso nga papel ang usa ka butang nga ilang mahimo aron mas makaangkon og humok nga kasingkasing. Makagahin ba kamo og dugang nga panahon diha sa mga kasulatan o sa pagribyu sa kinatibuk-ang komperensya? Tingali naaghat kamo nga mas maminaw og maayo atol sa inyong mga pag-ampo? Paggahin og panahon sa paghunahuna og maayo kon unsaon ninyo sa pagpahumok sa inyong kasingkasing.
Gusto ba mong mosulay og laing eksperimento? Pagbutang og bag-o nga itlog diha sa lain-laing likido aron masuta kon makakuha kamo sa samang mga resulta. Unsay mahitabo kon ihumol ninyo kini sa lemon juice, soft drink, tubig, gatas, o apple juice?