“Sa Porto Alegre, Brazil,” Alang sa Kalig-on sa mga Kabatan-onan, Peb. 2021, 22–23.
Giunsa Namo Pagsimba
Sa Porto Alegre, Brazil
Litrato gikan sa Getty Images
Olá! Ang akong ngalan mao si Helaman B. Ug ako si Julia Felix O. Taga-Porto Alegre kami. Ang Porto Alegre mao ang kapital sa Rio Grande do Sul, usa ka habagatang estado sa nasud sa Brazil.
Helaman B.
Nagpuyo ko uban sa akong mga ginikanan, sa akong apohan sa tuhod, ug sa akong magulang nga lalaki. Ako adunay lain nga igsoong lalaki nga kasamtangang nagserbisyo og misyon sa Hungary. Ang Porto Alegre dako kaayo nga siyudad ug nasaag na ko sa daghang higayon.
Ang among panahon sa tingtugnaw kasagaran gikan sa Mayo hangtud sa Agosto ug ang among panahon sa ting-init gikan sa Nobyembre hangtud sa Marso. Mag-ulan og mga 1,397 mm (55 ka pulgada) matag tuig!
Adunay laing duha ka miyembro sa Simbahan sa akong eskwelahan, apan wala koy kontak kanila atol sa normal nga adlaw sa tingklase. Hinoon, aduna koy laing mga higala sa eskwelahan, kinsa dili mga miyembro. Maayo sila nga mga tawo.
Atol sa usa ka normal nga adlaw momata ko og alas 6:45 sa buntag, mangandam, ug maglakaw padulong sa eskwelahan. Mahuman ang klase mga alas 12:30 sa udto, ug paspas kong maglakaw pauli aron maniudto. Human sa paniudto magbasa ko sa akong mga kasulatan, motukar og piano, ug magtuon og Japanese. Dayon motambong ko og seminary gikan sa 6:30 hangtud sa 7:30 sa gabii ug matulog sa 10:00 sa gabii.
Ganahan kong motukar og mga himno sa adlaw nga Igpapahulay. Ang pagtukar niini sa piano kanunay magdala sa Espiritu ngari kanako, bisan unsa pa man.
Julia Felix O.
Natawo ko sa São Paulo ug mibalhin sa Porto Alegre sa dihang nag-edad ko og tres anyos. Ang akong amahan nakaserbisyo sa Porto Alegre isip usa ka full-time nga misyonaryo. Sa kasamtangan nagpuyo ko kauban sa akong inahan, amahan, ug usa ka tuig nga igsoong lalaki.
Ang mga tawo sa Porto Alegre ganahan kaayo mokaon og barbecue nga karne, gitawag usab nga churrasco. Apan ang akong paborito nga mga pagkaon mao ang estrogonofe (usa ka Brazilian beef stroganoff) ug pizza.
Sa akong eskwelahan, ako adunay duha ka higala gikan sa simbahan kinsa nagtuon sa ubang mga klase. Naningkamot kami nga mahimong maayong mga ehemplo ni Jesukristo ngadto sa tanan nga naglibut kanamo.
Ang templo sa Porto Alegre 30 minutos gikan sa akong balay. Kanunay kong ganahan moadto sa templo ug motabang sa mga bunyag. Malipayon ko nga makatabang sa mga tawo kinsa anaa sa pikas nga bahin sa tabil.