“Ang Bag-ong Kinabuhi ni Kayli,” Alang sa Kalig-on sa mga Kabatan-onan, Peb. 2021, 2–5.
Ang Bag-ong Kinabuhi ni Kayli
Kini nga batan-ong babaye mibiyahe og labaw pa sa mga milya aron maabut kon asa siya karon.
Ang talan-awon dili gayud sama sa iyang naandan. Init, uga, ug walay makita nga niyebe [snow], ang Texas ingon og laing planeta para ni Kayli C. Alang sa usa ka batang babaye kinsa nagdako sa Alaska, masabtan kana nga reaksyon.
“Sa Alaska, atol sa ting-init gitawag namo ang among init nga panahon nga bisan unsa nga labaw sa 50 ka degree fahrenheit [10 degrees Celsius],” miingon si Kayli. “Sa Texas lisud ang pagginhawa tungod kay igang ug init kaayo sa gawas.”
Alang kang Kayli, ang kausaban sa panahon gikan sa Alaska ngadto sa Texas mao lamang ang usa sa daghang mga kausaban. Bag-ohay lang namatay ang iyang amahan sa usa ka wala damha nga trahedya, ug ang ilang inahan dili makahimo sa pag-atiman ni Kayli ug sa iyang duha ka manghud nga babaye. Niadtong higayuna, si Kayli, karon usa na ka junior sa high school, nag-edad og 13, ug ang iyang manghud nga mga babaye, si Jada ug Rhianna, 10 ug 8 anyos pa lamang.
Ang suod nga kapamilya nakahukom nga ang labing maayong solusyon mao ang pagpabalhin sa tulo ka igsoon nga moipon sa ilang mas magulang nga igsoong babaye ug sa iyang bana sa Texas.
Bisan pa si Jenny, nga magulang nga babaye ni Kayli, ug ang bana ni Jenny, nga si Matt, mahinangpon ug mapinanggaong midawat sa tulo ka igsoon, kini dili gayud sayon nga pagbalhin [transition].
Una mao ang panahon. Anaa usab ang kamatuoran nga, para sa igsoong mga babaye nga gikan sa gamayng lungsod, ang dagko nga mga eskwelahan sa Texas makaugtas.
Ug dayon anaa usab kining tulumanon sa pagsimba …
Ang Pamaagi sa Kinabuhi Kaniadto
“Ganahan ko nga nagtubo sa Alaska,” miingon si Kayli. “Ganahan ko sa nyebe ug katugnaw. Ganahan kong mogawas. Maanindot kaayo ang tanan. Ug ganahan kong mag-ice skating, sledding, ug ang tanan nga kalihokan atol sa tingtugnaw.”
Dali usab siyang mipasabut og pipila ka butang mahitungod sa kinabuhi didto sa Alaska. “Ang akong mga higala ug ako nakakita nga ang pagbuhat og dautan nga mga butang mao ang paagi nga kamo mahimong ilado. Ug para nako, ang pagkahimong ilado mao ang paagi nga ikaw mahimong magmalipayon. Busa wala ako magpadulong sa maayo nga direksyon.”
Usa sa mga higala ni Kayli namabdos. Ang lain nalambigit sa drugas. Pipila sa iyang ubang mga higala misugod sa pagkahimong negatibo kaayo sa tanang panahon.
“Ganahan ko nga magpuyo sa Alaska,” miingon si Kayli pag-usab. “Apan makahunahuna gayud ko kon asa kaha padulong ang akong kinabuhi kon nagpabilin ko didto. Daghan sa akong mga higala sa Alaska dili maayo ang sitwasyon karon.”
Ang Pamaagi sa Pagkausab sa mga Butang
Usa ka importante nga hitabo sa kinabuhi ni Kayli nahitabo bisan sa wala pa siya makalakaw ug makaistorya. Samtang bata pa kaayo si Kayli, ang iyang magulang nga igsoong babaye nga si Jenny nakahimamat sa mga misyonaryo samtang anaa sa kolehiyo ug mipasakop sa Ang Simbahan ni Jesukristo sa mga Santos sa Ulahing mga Adlaw. Human makaeskwela og usa ka tuig sa kolehiyo sa Alaska, si Jenny mibalhin ngadto sa BYU–Idaho, diin nahimamat niya ang iyang bana, si Matt. Human sa gradwasyon, si Matt ug Jenny mibalhin ngadto sa Texas.
Sa dihang gisagop nila ang mga manghod, si Matt ug Jenny adunay duha ka lagda mahitungod sa relihiyon: “Ang una mao nga sila motambong sa simbahan uban kanato, isip kabahin sa pamilya,” miingon si Jenny. “Ang ikaduhang lagda mao nga si Matt ug ako dili mamugos kanila nga magpabunyag o gani magpatudlo sa mga misyonaryo. Kinahanglan nga ila kanang kaugalingon nga pagpili.”
Busa, si Kayli misugod sa pagtambong sa simbahan ingon man usab sa mga kalihokan sa tunga-tunga sa semana. Sa sinugdanan, kini wala kaayoy epekto kaniya. “Mitambong ko, apan wala koy bisan unsa nga gituohan,” miingon si Kayli. “Wala kaayo ko mohatag og pagtagad.”
Apan, nagsugod siya sa pagkamatikod og talagsaon nga butang. “Matag higayon nga miadto ko sa simbahan o sa mga kalihokan sa kabatan-onan, malipay ko.”
Human sa pipila ka tuig sa pagkamatikud niini, andam na si Kayli nga makahimamat og espesyal kaayo nga higala.
Ginagmay nga mga Lakang, Dagko nga mga Ganti
“Nahimamat nako ang akong higala nga si Maddie sa dihang mibalhin kami ngadto sa laing bahin sa Texas sa ting-init sa wala pa mag-grade 10,” miingon si Kayli. “Gipaila niya ang iyang kaugalingon ug nahimong talagsaon gayud nga ehemplo alang kanako.”
Miingon si Kayli nga si Maddie ingon og kanunay nga madasigon ug malipayon, bisan kon lisud ang panahon. Samtang milambo ang ilang panaghigalaay, naghinam-hinam si Kayli nga mas motambong sa mga miting sa Simbahan ug mga kalihokan.
“Si Maddie buotan kaayo nga higala,” Kayli miingon.
Mga litrato pinaagi ni Aubrey Stock
Laing dako nga impluwensya sa kinabuhi ni Kayli mao ang seminary. Dili sama sa una niya nga pagtambong sa simbahan, niini nga panahon si Kayli tinuoray nga nagsugod sa pagpaminaw og maayo kon unsa ang gitudlo. “Ang rason nganong nagsugod ko sa pagpaminaw sa seminary mao ang mga tawo nga naglibut kanako nga maayong motubag sa mga pangutana ug sa pag-apil. Gusto kong mahimong kabahin niana.”
Nagkaanam og kamaayo ang tanan, sama sa ilang giingon. Tali sa pagtuon sa Basahon ni Mormon sa seminary, pagkakita nga ang ebanghelyo naghatag og kalipay sa iyang magulang nga babaye, bayaw, ug uban sa ward, ug paghimo og pipila ka importante nga panaghigalaay, andam na si Kayli nga mosanong sa dihang nangutana si Maddie kon ganahan ba siya magpatudlo sa mga misyonaryo sa iyang balay.
Sukad niini, paspas milambo ang sitwasyon. Si Kayli ug ang iyang manghud nga babaye—kinsa gihangyo mismo nga siya ra ug pinaagi sa lahi nga higala nga maminaw sa mga leksyon didto sa balay niana nga higala—nakahukom nga magpabunyag sa samang adlaw.
“Sa Alaska, ang akong kalipay miabut gumikan sa paghugoy-hugoy uban sa akong mga barkada ug sa pagpaningkamot nga mahimong ilado,” miingon si Kayli. “Karon ang akong kalipay nagagikan sa ebanghelyo. Daghan gayud ko og nakat-unan gikan sa mga miyembro dinhi. Nakat-unan nako nga ang kalipay ug kahayag moabut pinaagi kang Jesukristo ug sa Langitnong Amahan.”
Usa ka Kinabuhi nga Nakasentro sa Ebanghelyo
Ang pagpamatuod ni Kayli sa ebanghelyo mitubo, sa dakong bahin, uban sa pagtuon og maayo sa Basahon ni Mormon sa seminary. Karong mga panahona, ang Basahon ni Mormon alang kaniya sama ra gihapon ka importante sukad kaniadto. “Ang Basahon ni Mormon mao ang usa sa labing importanteng mga butang nga nakahatag kanako og kalipay,” mipasabut siya. “Nakapausab kini pag-ayo kanako. Gusto nakong mabati usab kana sa uban ug naningkamot sa pagpaambit niini.”
Nagdala siya og Basahon ni Mormon bisan asa siya moadto, lakip na sa eskwelahan. “Adunay daghan nga mga butang nga gihimo sa mga bata sa eskwelahan nga moabug sa Espiritu, sama sa paggamit og ngil-ad nga pinulongan o grabe ra kaayo nga pagpaningkamot nga mahimong ilado,” miingon si Kayli. “Ang pagdala og Basahon ni Mormon sa akong backpack nakatabang kanako sa paghinumdom sa akong tumong: sa pagpabilin sa Espiritu ug sa pagpaambit sa kasiguroan nga ikahatag sa ebanghelyo kanato.”
Hinoon, wala siya mahibalo kon ang iyang pagpamatuod ba aduna niana nga kahigayunan sa pagtubo, kon dili pa tungod sa matinud-anong mga ehemplo sa mga miyembro sa Simbahan sa iyang palibut. “Ang mga miyembro sa Simbahan adunay bahin sa akong pagpabunyag,” miingon siya. “Kon wala ang ilang mga ehemplo ug espiritwal nga kahayag, tingali ako dili makabantay og bisan unsang kalainan diha kanila ug nagpadayon unta nga wala maghatag og pagtagad sa bisan unsang butang nga may kalabutan sa Simbahan.”
Molaum sa Kanunay
Si Kayli ug ang iyang mga igsoon nakasinati gayud og pipila ka lisud nga mga panahon kaniadto. Apan nakakaplag si Kayli og paglaum alang sa iyang kaugmaon, ug kini mao ang paglaum nga gusto niyang ipasa ngadto ni bisan kinsa nga nanlimbasug og malisud nga panahon karon.
“Hinumdumi ang pagpadayon sa unahan ug ipadayon ang pagtutok sa positibong mga aspeto sa mga butang,” miingon si Kayli. “Ug kon nawad-an kamo og minahal, hinumdumi nga ang Langitnong Amahan adunay plano alang kaninyo ug alang sa uban. Kita makapuyo uban sa atong mga pamilya hangtud sa kahangturan kon kita mobuhat sa unsay husto.”