“Pagkat-on sa Pag-ila sa Espiritu Santo,” Alang sa Kalig-on sa mga Kabatan-onan, Peb. 2021, 6–7.
Dali, Sunod Kanako
Pagkat-on sa Pag-ila sa Espiritu Santo
Ang Espiritu Santo mogiya ug modirekta sa atong kinabuhi samtang kita magkat-on sa pag-ila ug pagsunod sa Iyang mga pag-aghat.
Sa dihang batan-on pa ko, wala ko masayud kon unsay bation kon anaa ang Espiritu Santo. Mga 12 anyos ko dihang nakig-istorya nako ang akong inahan ug nangutana kanako niining importanting pangutana: “Mark,” miingon siya, “ang Ginoo misulti na ba kanimo pinaagi sa Espiritu Santo nga ang Simbahan tinuod?”
Ako dili gayud makaako sa pagpamakak ngadto sa akong mama, busa ako matinuoron ug maulawong mitubag “Wala?”
Dayon miingon siya, “Ang Langitnong Amahan gusto nga makahibalo ka sa imong kaugalingon, apan kinahanglan ka nga maningkamot. Kon mobasa ka sa Basahon ni Mormon ug mag-ampo, Siya mopahibalo kanimo sa katinuod niini pinaagi sa Espiritu Santo.”
Ako adunay akong kaugalingong kopya sa Basahon ni Mormon, apan wala gayud nako kini mabasa sa akong kaugalingon. Uban sa determinasyon nga seryusohon ang pagdawat niini nga imbitasyon, nagsugod ko sa akong kaugalingong espirituhanong panaw. Matag gabii sa dili pa ko matulog, mobasa ko og mga usa ka kapitulo sa Basahon ni Mormon. Samtang miluhod ko aron mag-ampo, mihangyo ko sa Langitnong Amahan nga pahibaloon ko nga kini tinuod. Samtang nag-ampo ko, usa ka malinawon nga pagbati ang nagpabilin ngari kanako. Maayo ang akong gibati.
Kini ba nga mga pagbati gikan sa Espiritu Santo? Dili gayud ako sigurado. Kining tanan bag-o ngari kanako, ug wala ko masayud kon unsa ang pagbati sa mga pag-aghat sa Espiritu Santo. Naghunahuna ko kon usa ka anghel ba ang mobisita kanako o tingali usa ka dako nga balaang kahayag ang mopakita sa akong kwarto. Bisan pa niana, uban sa sinsero nga tinguha nga makadawat sa gisaad nga kahibalo gikan sa Espiritu Santo, nagpadayon ko sa pagbasa ug pag-ampo matag gabii. Matag higayon nga nag-ampo ko, mibati ko og kalinaw, ug maayo ang akong gibati.
Ulahi na nga ako nakaamgo nga ang Ginoo nagtubag sa akong mga pag-ampo sukad pa, apan ako nangita og laing matang sa tubag. Wala lang ako makaamgo nga kita “makabati” sa mga pag-aghat sa Espiritu Santo.
Pagkat-on sa Pag-ila og mga Pag-aghat
Kausa si Oliver Cowdery naglisud sa pag-ila sa mga pag-aghat gikan sa Espiritu. Sa dihang nangutana siya ni Propeta Joseph Smith mahitungod niini, nakadawat siya niini nga tubag gikan sa Ginoo: “Wala ba Ako magsulti og kalinaw nganha sa imong hunahuna mahitungod niini? Unsa ka labaw nga kamatuoran ang imong maangkon kay sa gikan sa Dios?” (Doktrina ug mga Pakigsaad 6:23). Nakadawat na siya og tubag, apan wala siya makasabut niini. Ang tubag mao ang kalinaw sa iyang hunahuna—sama gayud sa akong gibati sa dihang ako usa ka batan-on.
Wala madugay, ang Ginoo mihatag og dugang nga tambag alang kang Oliver ug sa atong tanan: “Ako mosulti kanimo diha sa imong hunahuna ug sa imong kasingkasing, pinaagi sa Espiritu Santo, nga moabut diha kanimo ug nga mopuyo diha sa imong kasingkasing. … Kini mao ang espiritu sa pagpadayag.” (Doktrina ug mga Pakigsaad 8:2–3).
Si Apostol Pablo nagtudlo kanato sa pag-ila niini nga mga pagbati sa “gugma, kalipay, kalinaw, pailob, kaluoy, kaayo, pagkamaminatud-on, [ug] pagkamapaubsanon” (Mga Taga-Galacia 5:22–23).
Ang mga pag-aghat gikan sa Espiritu Santo sa kasagaran hilom ug dili dayon mamatikdan. Ang Dios panagsa ra kaayo mosinggit aron sa pagsulay ug pagkuha sa atong atensyon. Hinoon, samtang kita mogahin og panahon sa paghunong, pagbati, ug pagpamalandong, kita nagpakita Kaniya nga kita naminaw ug nagtinguha og mga tubag pinaagi sa Espiritu Santo. Sa sunod higayon nga kamo moluhod diha sa pag-ampo, imbis nga mobarug dihadiha dayon pagkahuman sa pagsulti og “amen”, paghulat og pipila ka gutlo. Pagpabilin nga nagluhod ug paminaw lang. Ang Ginoo tingali mosulay sa “[p]agsulti og kalinaw nganha sa imong hunahuna” sama sa Iyang gihimo kang Oliver Cowdery ug kanako.
Ang Mahinungdanong Gasa sa Espiritu Santo
Human sa bunyag makadawat kita sa gasa sa Espiritu Santo. Kining balaan nga gasa makahatag og tabang gikan sa usa ka sakop sa Dios nga Kapangulohan sa tibuok natong kinabuhi. Gisaaran kita nga samtang kita maningkamot sa pagpuyo nga takus niini nga gasa, ang Espiritu Santo “mopakita nganha kaninyo sa tanan nga mga butang nga kinahanglan inyong buhaton” (2 Nephi 32:5). Ang Espiritu Santo mokumpirmar sa kamatuoran sa atong kasingkasing, manalipod kanato gikan sa dautan, ug moggiya kanato sa tibuok natong kinabuhi. Pagkaanindot nga panalangin!
Mapasalamaton ko sa talagsaong gasa sa Espiritu Santo ug sa Iyang direksyon sa akong kinabuhi.