Lig-on nga mga Tukuranan

Mapuslanon Gayud

Mga paghulagway ni Michela Buttignol

Duna koy seminary sa alas 6 sa buntag, sa dili pa moeskwela. Mobangon ko og sayo kaayo aron aduna pay oras sa pagpamahaw, mag-ampo uban sa pamilya, ug maglakaw ngadto sa simbahan. Apan kon permi ko nga moadto sa seminary, mas makita nako nga ang pagmata og sayo mapuslanon gayud!

Ang mga magtutudlo maayo kaayo ug kanunayng magtudlo pinaagi sa Espiritu. Maalamon sila ug nasayud og daghan mahitungod sa ebanghelyo, nga nakapahimo kanako nga mahinamon nga motambong ug magkat-on og dugang pa.

Ang pag-adto sa seminary sa kada buntag nakatabang nako nga magmaisugon sa pagpakigbahin sa ebanghelyo uban sa duha ka mga klasmeyt ug nakatabang nako nga makapasabut sa mga kasulatan. Ang seminary nakatabang usab nako nga magmaisugon sa pagbarug sa akong mga gituohan. Naminaw ko sa radyo usa ka buntag, ug ang usa ka tawo miingon nga si Joseph Smith usa ka bakakon. Nasagmuyo kaayo ko niini tungod kay nakaangkon ko og usa ka lig-on nga pagpamatuod ni Joseph Smith diha sa seminary ug nasayud nga ang gisulti sa maong tawo dili tinuod.

Akong gisultihan ang akong magtutudlo sa seminary mahitungod niini, ug siya misugyot nga akong sulatan kadto nga tawo ug mopaambit sa akong pagpamatuod ni Joseph Smith. Misulat ko ug mipamatuod mahitungod ni Joseph Smith ug sa Simbahan. Nakatabang kini nako nga mokalma ug dili na kaayo masagmuyo. Wala gayud siya motubag, apan akong gibati ang kumpirmasyon sa akong pagpamatuod samtang ako nagsulat. Nakapahimo kini nako nga mapasalamaton nga ako nakaangkon og ingon ka lig-on nga pagpamatuod sa Propeta ug sa ebanghelyo diha sa seminary.

Raquel B., Argentina

Tulumanon sa Sunday School

Ako usa ka deacon. Ang akong mga ginikanan mitudlo kanako nga ako kinahanglan mahimong ehemplo alang sa akong mga higala tungod kay ako ang naghupot sa pagkapari ug ako nagrepresentar sa Langitnong Amahan ug ni Jesukristo. Nakatabang gayud kini nako sa pagpili sa husto ug sa pagpangita og mga kahigayunan aron makaserbisyo sa uban. Nasayud ko nga kon mohimo ko og maayong mga butang, ang akong mga higala makakita sa unsay akong buhaton ug tingali gusto usab nga mobuhat og maayong mga butang.

Dili pa lang dugay pagkahuman sa Sunday School, didto ko sa hawanan dihang nakakita ko og usa ka magtutudlo kinsa nagkinahanglan og tabang sa pagdala sa mga lingkuranan. Iya kining gipahimutang sa gawas sa gambalay [building] alang sa usa ka kalihokan. Wala siya mohangyo nako sa pagtabang kaniya, apan akong nakita nga siya nagkinahanglan og tabang. Daghan kaayo ang mga lingkuranan, ug nag-inusara ra siya. Maong gidala nako ang daghang lingkuranan sa gawas ug gipahimutang kini alang kaniya.

Pagkahuman, ang magtutudlo miingon, “Salamat sa pagtabang.” Dili kadto dakong butang para nako tungod kay wala ra kadto magdugay, apan siya nagmapasalamaton gayud, nga nakapahimo nako nga mobati og kanindot. Unya, ang magtutudlo misulti sa akong mama mahitungod sa unsay akong gibuhat. Ang akong mama miingon nga nakahimo ko og maayong butang ug nga kinahanglan magpadayon sa pagpangita og mga oportunidad sa pagserbisyo sa uban, tungod kay kini usa ka butang nga buhaton ni Kristo.

Nalipay ug mapasalamaton ko nga ako nakaserbisyo. Nakapahimo kini nako nga mobati og kanindot, ug kini nakapahimo nako nga kanunayng moserbisyo.

Emiliano H., Texas, USA

Ang Flashlight sa Pagpasalamat

Sa pagsulod nako sa high school, ingon og ang tanang butang nahimong mas lisud para nako. Naibug ko sa mga talento sa ubang tawo, sa mga tawo kinsa ingon og mas maayo kay kanako, sa mga oportunidad nga miabut sa uban apan dili ngari nako. Kanunay kong nangandoy o ganahan sa mga butang nga wala nako.

Nakigsulti ko sa akong mga ginikanan mahitungod niini. Mipahinumdom sila nako nga ang Langitnong Amahan naghatag na kanako sa tanang butang nga gikinahanglan nako apan mahimong Siya dili mohatag kanako sa matag butang nga akong gusto. Ang akong mga ginikanan mitabang nako nga makaamgo nga kon inyong masabtan nga walay kulang sa unsay inyong tinuoray nga gikinahanglan kamo makakaplag og kalinaw.

Bag-ohay lang kong nakabasa og usa ka libro nga nagtandi bahin sa kamapasalamaton ngadto sa usa ka flashlight. Kon kamo mogawas sa gabii diin walay bisan unsang suga, ang tanan nga inyong makita mao lang ang kangitngit. Apan kon kamo mogawas nga dunay dalang usa ka flashlight ug pasigahon kini diha sa inyong palibut, makakita kamo sa tanang butang nga anaa.

Ang kamapasalamaton sama niana nga kahayag. Kon kini mosiga, mobanwag kini sa unsay anaa na diha. Apan tungod kay karon inyo nang makita kini, kamo mas makadayeg na niini.

Ang kanindot sa butang mahitungod sa pagpasalamat nga flashlight mao nga kamo makagamit niini sa adlaw o gabii, bisan asa kamo o unsay inyong sirkumstansya. Ang inyo lang buhaton mao ang pagpasiga niini.

Ethan B., Utah, USA