“Soo o Iesu Keriso i le Ala o le Avea ma Soo,” Mo le Malosi o le Autalavou, Ape. 2021, 2–5.
Sau, Mulimuli Mai ia te A’u
Soo o Iesu Keriso i le Ala o le Avea ma Soo
Mai le saunoaga i le konafesi aoao ia Aperila 2010 “Tatou te Mulimuli ia Iesu Keriso.”
Ua faia e le Faaola ina ia mafai e i tatou taitoatasi ona maua le faaolataga ma le faaeaga. Ae e tatau ona tatou mulimuli i le ala ua Ia saunia mo le saogalemu ma le filemu.
Ata na saunia e Tyler Rickenbach
I le Aso Sa o le Eseta, tatou te faamanatuina ai le manumalo o lo tatou Alii ma le Faaola, o Iesu Keriso, i le oti. Tatou te faafetai i lo tatou malamalama ma lagonaina le agaga talisapaia mai le taele o o tatou loto, mo le taulaga togiola naunautai a le Faaola mo i tatou. O le mea aupito sili lea ona taua na tupu i le talafaasolopito o tagata.
Ona ua faataunuuina e Keriso Lana misiona paia o le Faaola ma le Togiola, o le a tatou toetutu mai le oti ma toe faatasia o tatou agaga ma o tatou tino. E faavae i lo tatou agavaa faaletagata lava ia, o le a mafai ai e ala i Lona alofa tunoa ona maua le avanoa mamalu e toe ulufale atu ai i le afioaga o le Atua.
O la Tatou Savali i le Lalolagi
Fai mai le Perofeta o Iosefa Samita ao ia faamatalaina nei taualumaga o le Eseta, “O mataupu faavae autu o lo tatou talitonuga o molimau a Aposetolo ma Perofeta, e faatatau ia Iesu Keriso, e faapea na maliu o Ia, na tanumia, ma toetu mai i le aso tolu, ma afio a’e i le lagi; ma o isi mea uma e faatatau i lo tatou talitonuga ua na o ni faaopoopoga i ai.”1
Ao tatou olioli i le taua faavavau o Ketesemane ma Kalevario, e taulai atu pea la tatou vaai i le Alii toetu. O la tatou savali i le lalolagi o loo soifua o ia! O le faatusa o Keriso mo le Au Paia o Aso e Gata Ai o le a maua i faaaliga loloto o lo tatou faatuatua ma le ala tatou te ola ai i Lana talalelei.2
A o tatou mafaufau loloto i le uiga o le avea ai o ni Kerisiano i le asō, e tatau ona tatou mafaufau i vaega o loo manaomia mai ia i tatou e lo tatou ala i le avea ma soo. Ou te fautua atu ia tatou mafaufau loloto ma i ala e tatau ai, mulimuli i faataitaiga na faia e le Faaola i aso mulimuli e lua o Lona soifuaga ma le galuega faaletino.
Manatua ma le Migao le Faamanatuga
I le Talisuaga Mulimuli, na folasia atu ai e le Faaola le sauniga o le faamanatuga. Na ia tago ai i le areto, tofitofi, faamanuia, ma tufatufa atu i Ona soo ma fetalai atu, “O lo’u tino lenei, ua foaiina atu mo outou: tou te faia le mea nei e fai ma faamanatuga ia te au.”(Luka 22:19). O le auala lea na Ia faatuina ai le faamanatuga. Afai o le a avea i tatou ma Ona soo ma tagata faamaoni o Lana Ekalesia, e tatau ona tatou manatua ma faamamaluina le faamanatuga.
O le faamanatuga e maua ai e i tatou taitoatasi le avanoa e faaali ai ma loto momomo ma agaga salamo lo tatou naunautaiga e mulimuli i le Faaola, e salamo ai ma avea o se Au Paia e ala i le Togiola a Keriso.(tagai Mosaea 3:19). O le faamanatuga e mafai ai ona tatou molimau atu i le Atua o le a tatou manatuaina Lona Alo ma tausi Ana poloaiga a o tatou faafouina a tatou feagaiga o le papatisoga (tagai Mosaea 18:8–10; Mataupu Faavae ma Feagaiga 20:37, 77–79). E faateleina ai lo tatou alofa ma faafetaia le Tama ma le Alo.
Ia Fealofani
Sa aoao mai foi le Faaola, “O le mea lea e iloa ai e tagata uma lava o o’u soo outou, pe afai ua outou fealofani” (tagai Ioane 13:34–35). Ao tatou mafaufau i le Togiola e faavavau o le a Ia faataunuuina, e manaomia e lena poloaiga lo tatou usiusitai. E faaalia lo tatou alofa i le Atua pe a tatou tausia Ana poloaiga ma auauna atu i Ana fanau. E le o mafai ona atoatoa lo tatou malamalama i le Togiola a Iesu Keriso, ae e mafai ona faaalu o tatou olaga o taumafai e faateleina lo tatou alofa ma lo tatou agalelei, e ui i faigata tatou te fetaia’i.
O le poloaiga a le Faaola i Ana Aposetolo ma soo uma o le a mulimuli mai pe a mavae atu i latou ia alofa le tasi i le isi, o se tasi lea o Ana aoaoga aupito sili ona taua. O le ala tatou te fegalegaleai ai ma fesootai ai o le tasi ma le isi o se fuafaatatau lea o lo tatou naunautai e mulimuli ia Iesu Keriso.
Ia Agavaa mo Uunaiga a le Agaga Paia
O le taimi lea, sa folafola atu ai e le Faaola le Agaga Paia, le sui lona tolu o le Aigaatua, i Aposetolo. O le Agaga Paia o se peresona o agaga, o le Faamafanafana, e molimau i le Tama ma le Alo, faaali le tonu i mea uma lava, ma faamama i latou ua salamo ma papatisoina.
Ua tatou ola i se lalolagi pisapisaō, fefinauai lea e mafai ai foi ona vaai pe faalogo i faamatalaga, musika, po o mea foi e matuai leai se aoga i itula taitasi. Afai tatou te mananao e maua musumusuga a le Agaga Paia, e tatau ona tatou sailia se taimi e faifaimalie ai, mafaufau loloto, tatalo, ma ola ina ia tatou agavaa e maua ma galulue e tusa ai ma Ana musumusuga. O le a tatou taumamao mai sesē ogaoga pe a tatou gauai atu i Ana lapataiga. O lo tatou avanoa i le avea ai ma tagata O Le Ekalesia a Iesu Keriso o le Au Paia o Aso e Gata Ai ia maua le malamalama ma le poto mai ia te Ia e oo lava i le aso atoatoa (tagai Mataupu Faavae ma Feagaiga 50:24).
Mulimuli i le Ala a le Faaola
I lenei vaitau o le Eseta, tatou te olioli i mea uma lava ua faia e le Faaola mo i tatou. Ua Ia faia ina ia mafai ai e i tatou taitoatasi ona maua lo tatou faaolataga ma le faaeaga. Ae e tatau ona tatou mulimuli i le ala ua ia saunia mo le saogalemu ma le filemu.
O se tasi o auala tatou te faia ai lenei mea o le tausisia lea o aoaoga a lo tatou perofeta soifua. O ia o se faataitaiga sili ona lelei o se tasi e mulimuli i le Faaola. O le isi auala o le sailia lea o le sulufaiga ma le puipuiga e faavavau o le malumalu.
Ou te tuuina atu la’u molimau faaaposetolo o loo soifua Iesu Keriso ma o le Faaola ma le Togiola o le lalolagi. Ua Ia saunia le ala i le fiafia moni.