“O Se Ata o le Lotogatasi,” Mo le Malosi o le Autalavou, Ape. 2021, 6–8.
Sau, Mulimuli Mai ia te A’u
O se Ata o le Lotogatasi
E pei o togitogi lanu i luga o se ata, e eseese uma i tatou. Ae o se mea matagofie pe a tatou lotogatasi uma i le malo o le Atua.
Vaaiga i Crotoy, saunia e Georges Seurat
Pe a e faalogo i le upu lotogatasi o le a se mea e te mafaufau i ai? Atonu o loo pepese faatasi se aufaipese i le leo e tasi po o le au taaalo e te fiafia i ai i se taaloga o se iunite. E mafai ona e maua le lotogatasi i totonu o aiga, nuu, e oo lava i le natura!
O le lotogatasi e faatatau lea i le o mai faatasi ma galulue o se iunite. E ui lava ina eseese o tatou siosiomaga, aganuu eseese, ma e eseese tomai, ae e finagalo le Tama Faalelagi ia tatou alolofa le tasi i le isi ma ina “ia tasi” (Mataupu Faavae ma Feagaiga 38:27). Ae e faapefea ona tatou tasi ae matuai eseese uma i tatou?
Lotogatasi i le Faatufugaga
Tatou te talanoa e uiga i le lotogatasi i musika ma taaloga, ae pe na e iloa e mafai foi ona tatou aoao e uiga i le lotogatasi mai faatufugaga? O loo i ai se sitaili o le atavali e taua o le togitogi lea e faaaoga ai e tusiata ni togitogi lanu laiti e fatu ai se ata nai lo o le fefiloi o lanu faatasi i se apa ma faaaoga ai ni tosi tetele i le pulumu. A e tu latalata i nei atavali, o mea uma lava e te iloa atu o togitogi taitasi o lanu.
Ae peitai, a e toe laa i tua, e fetaui lelei togitogi e faaali mai ai se ata.
O togitogi lanu uma e galulue faatasi e fatu ai se mea matagofie. E pei lava o togitogi, o i tatou uma lava o ni tagata taitasi faapitoa. E silafia e le Tama Faalelagi le “ata atoa.” E silasila mai o Ia ia i tatou uma o Ona atalii ma afafine, “o suli i le malo o le Atua” (4 Nifae 1:17). Afai e mafai foi ona tatou aoao pe faapefea ona tatou toe laa i tua ma vaai i le ata tele, e mafai ona tatou aoao i le auala e alolofa ma galulue faatasi ai ma tagata e ese mai ia i tatou. O nisi nei o mea e mafai ona tatou faia e galulue ai i le lotogatasi.
Manatua Feagaiga
O le manatuaina o a tatou feagaiga o le papatisoga e fesoasoani lea ia i tatou e galulue agai atu i le lotogatasi ma isi. I le Mosaea 18:10 tatou te faitau ai o le vaega o le papatisoina o le malilie lea e auauna atu i le Atua ma tausi Ana poloaiga. O se tasi auala tatou te faia ai lenei mea o le “tauave avega a le tasi, … faanoanoa faatasi ma e e faanoanoa; ioe, ma faamafanafana atu ia te i latou o e e manaomia le faamafanafanaga ”(Mosaea 18:8–9).
Pe a tatou aapa atu i se uo ua faanoanoa, fesoasoani i o tatou matua i feau i le fale, pe aapa atu foi i se tasi e fou i le aoga, ua tatou faia se taumafaiga e tatala o tatou loto ia i latou ma fai ia “fili faatasi o [tatou] loto i le lotogatasi ma le alofa o le tasi i le isi” (Mosaea 18:21). O a nisi auala e mafai ai ona e tausia au feagaiga o le papatisoga e auauna atu i le Atua? E mafai foi ona e fesili ifo ia te oe lava i le fesili i le isi taimi e te ai ma inu ai i le faamanatuga. A o e vaavaai mo isi auala e fausia ai le lotogatasi ma isi, o le a fesoasoani le Tama Faalelagi ia te oe.
Aloese Mai le Faaaogaina o le “sa”
I le Tusi a Mamona, na faaaoga e tagata ia igoa o se auala e vaevae ma tuueseese ai i latou lava. Sa latou faaigoaina i latou o sa Nifae, sa Lamana, sa Sorama, ma sa Amaleka—ua na o ni nai igoa. O nisi taimi sa i ai ia i latou ni faailoga faapitoa e faaali atu ai faaletino po o le fea vaega latou te auai (tagai Alema 3:4). Sa sili atu lo latou fiafia pe a leai ni a latou “sa” (tagai i le 4 Nifae 1:16–17).
Mafaufau i lau galuega, aoga, po o le pitonuu. Atonu tatou te le faaaogaina ni igoa e pei o “sa Nifae” po o “sa Sorama,” ae e mafai ona e mafaufau i nisi igoa e ono faaaoga e tagata? O nisi tagata i le lalolagi o loo taumafai e tuueseese i tatou e faavae i mea e pei o tomai faaletino, o le lanu o o tatou pau, po o le tele foi o a tatou tupe e maua. E le o le ala lena na aoao mai ai Iesu Keriso ia i tatou e faatino. Sa ia aoao mai i tatou ia “alofa atu i le lua te tuaoi ia pei o oe lava ia te oe” (Mareko 12:31). Ina ia avea atili e faapei o Iesu Keriso, aloese mai le faaaogaina o igoa po o igoa e vaevaeina ai i tatou.
Faaaoga le Lotomaualalo
O se vaega o le lotogatasi o le “aoao ia lagona le olioli i faamanuiaga a uso ma tuafafine ma uo. …E ao ona tatou taumafai uma ina ia lotomaualalo.”1 O nisi taimi e mafai ona lagona le faigata. Atonu foi o lau uo sili na tofia i le au ae sa e le mafaia, po o sou tei na sili atu ona lelei ona togi i le aoga nai lo oe. Atonu tatou te lagona le faanoanoa po o le tiga e vaai atu o manuia se isi tagata. E ui lava e ono lagona le faigata, ia taumafai e faamanatu ma i latou! Ua ia i tatou uma ni meaalofa ma ni taleni matagofie ma ua finagalo lo tatou Tama Faalelagi ia tatou saili ma atiina ae meaalofa lelei.
E Mafai Ona Lelei Eseesega.
O nisi taimi atonu tatou te fegalegaleai ai e na o i latou lava e foliga ia i tatou, tautala e pei o i tatou, pe mafaufau foi e pei o i tatou. Ae sa alu ese atu pea Iesu Keriso i lona ala e fegalegaleai ma i latou sa vaaia e ese. E mafai ona lelei ia eseesega ma e manaomia!
Atapue mai le Getty Images
Na saunoa mai Peresitene Henry B. Eyring o le Au Peresitene Sili, “E oo lava i … eseesega e mafai ona vaaia o se avanoa. O le a fesoasoani le Atua ia i tatou ia iloa se eseesega i se isi tagata, e le o se punavai o le lē fiafia ae o se saofaga. “2 E le mafai e tagata uma ona taaalo i le tulaga lava e tasi i se au taaalo pe usu foi le vaega lava e tasi i se aufaipese. O le a le manaia le lalolagi pe afai o fugalaau uma lava e tutusa lanu pe tutusa uma foliga o laau. O eseesega e mafai ona faaleleia atili ai le lalolagi ma fesoasoani ai ia i tatou ina ia tasi.
“Ia Tasi”
A o e galue e fausia le lotogatasi ma isi, atonu o le a e iloa ai e le o ese i tatou mai le tasi ma le isi e pei o tatou mafaufau. A o tatou aoao e vaai i le tasi ma le isi e pei ona silasila mai le Tama Faalelagi ia i tatou, o le a oo ina tatou malamalama o loo manaomia ma e auai tagata uma i le malo o le Atua. O i tatou taitoatasi o se togi matagofie o le lanu i se ata matagofie. Ma ia tatou vaai i ai, o le a le tutusa lava e aunoa ma oe.