Sa ou Lagonaina Lo’u Toilalo

Saunia e Richard M. Romney

Mekasini a le Ekalesia

Ou te lei papatisoina se tasi i lau misiona. Ona ou iloa ai lea o loo i ai se auala sili atu e fua ai le faamanuiaina.

Ata

lio o le velo ma ufanafana

Ata na tusia e Adam Howling

Pe i ai se taimi na e lagona ai ua e toilalo i se mea e ui lava sa e faamoemoe ma lou loto atoa o le a faamanuiaina? O le lagona lena na ou maua a o ou foi mai i le fale mai lau misiona. E lua tausaga i Farani, ma o le a se mea lelei na ou faia? E moni, sa ou faia ni uo, aoaoina se gagana, ma tuputupu ae le alofa i le Au Paia faamaoni o e taumafai e ola i le talalelei.

Ae ou te lei papatisoina se tasi.

Ona ou manatuaina lea o le fautuaga na tuuina mai ia te au e lou peresitene o le misiona i le taimi o lau faatalanoaga faaiu: “Afai e mafai ona e fai atu ma le faamaoni e fiafia le Alii i taumafaiga sa e faia, afai e mafai ona e fai atu faamaoni na e faia le mea sili e te mafaia mo Ia, o lona uiga o le fua lena o lou manuia. E leai lava se isi mea e taua.”

A o ou mafaufau i lena mea, sa ou lagona le faamalosia e tatalo. Na faifaimalie lava, ona oo mai le filemu i lou loto. Sa musumusu mai le Agaga, “Ua silafia e le Alii na e faia le mea sili e te mafaia. E taliaina lau taulaga.” Ua oo i le taimi e faagasolo ai isi laasaga o lou olaga.

Faavave-i-Luma mai Farani

Faavave-i-Luma i le tele o tausaga. Sa ou tusia se tusi i lou afafine, lea sa auauna atu i se misiona i Kanata, ae ou faalogoina se tatagi i lau telefoni. Sa auina mai e se tasi ia te au se ata o le faavaa i totonu i luma o se kopi o le Tusi a Mamona ma se molimau na tusia i le gagana Farani—i lau lava tusilima! Sa ou tuuina atu le tusi i se tuafafine sa auai i Le Ekalesia a Iesu Keriso o le Au Paia o Aso e Gata Ai a o avea au ma se faifeautalai (e ui ou te lei papatiso ia te ia), ae na pau ese atu o ia i nai tausaga e lua mulimuli ane. Aisea o le a auina mai ai e se tasi ia te au se ata o le molimau na ou tusia i le tele o tausaga ua mavae?

Na oo mai le ata ma se savali: “sa ou faapea o le a e fiafia e toe vaai i lau molimau. Sa fiafia tele le uso o lou tina ina ua ou auai i le Ekalesia o lea na ia tuuina mai ai ia te au le Tusi a Mamona lea na e avatu ia te ia. Sa ou faapea o le a e talisapaia le iloaina o se oa lea ia te au.

“O le uso o lou tina e lei tumau le malosi i le Ekalesia, ae o taimi uma lava sa ia talanoa fiafia lava i ai, ma o lea mea na talosagaina ai e lona uso laitiiti (lou tina) ia faifeautalai e aoao o ia. Na auai lou tina i le Ekalesia. Na ia faaipoipo i le malumalu. Sa tausia e ia ma lou tama ni fanau e toafa o ni tagata o le Ekalesia. Sa faia uma e i matou ma ou tei e toatolu ni misiona ma faaipoipo i le malumalu. O loo matou toaaga uma ma faamaoni.”

Sa lofituina ou lagona. I na tausaga uma ua mavae, sa ou faapea na ou toilalo. Ae o lenei ua ou vaai i le ala na faataunuu ai e le Alii Lana galuega, i Lana ala, i le aluga o taimi.

A o e faia le mea sili mo le Alii

O manatuaga o isi tagata sa ou aoaoina o se faifeautalai na amata ona faatumulia ai lou mafaufau. E toatasi na auai i le Ekalesia i se tausaga talu ona ou toe foi i le fale. Ua nofo nei o ia i Farani Polenisia, ma mate talanoa i le Skype i taimi uma. O le isi na auai i le Ekalesia i le fitu tausaga talu ona maea lau misiona. Sa ia auauna atu i se misiona o ia lava, i Texas, ISA. O lea ua avea nei o ia ma failautusi faapitoa o se siteki i Farani i saute.

Sa ou mafaufau i isi tagata Farani ou te iloa ma alofa pea i ai—o se tuafafine i se nofoaga autu o le soifua maloloina lea e tusi mai ia te au ni tusi; o se alii sa ou iloa ao talavou o ia i le taimi lea ua peresitene nei o le misiona i Aferika.

Afai na e fesili mai ia te au i le faaiuga o lau misiona, semanu ou te faapea atu, sa ou toilalo. Ae a ou mafaufau e uiga i le molimau sa ou tusia i lena Tusi a Mamona i na tausaga uma ua mavae, sa ou iloaina ai e te lei toilalo pe afai e te faia le mea sili mo le Alii. “Masalo na pau le mea na ou toilalo ai o le avea ma toilalo,” o lou mafaufau lea.

Toilalo po o le Faamanuiaina?

I uluai aso o le Toefuataiga, na auina atu ai se vaega o faifeautalai e talai i tagata Initia Amerika sa nonofo i sisifo o Misuri (tagai Mataupu Faavae ma Feagaiga 28:8; 30:6; 32:2). Sa latou manatu na latou faataunuuina valoaga o le Tusi a Mamona e uiga i sa Lamana e mauaina le talalelei i aso e gata ai. Ae e oo ane i le faaiuga o la latou misiona, latou te lei papatisoina se Initia Amerika e tasi.

Ana faapea e te fesili atu ia i latou, mata o le a sa latou tala e uiga i le toilalo? Ae peitai, i luga o le ala, sa latou aumaia ai isi i le Ekalesia. O nisi o i latou o taitai o le lumanai e pei o Sini Rikitone, faapea ai ma le toatele o le au paia i Katelani, Ohaio, lea na fausia mulimuli ane ai le malumalu muamua o aso e gata ai. Sa latou aoaoina, e pei ona ou iloaina, o le Alii o le a “faaali mai i le fanauga a tagata ou te mafaia ona fai o lau lava galuega” (2 Nifae 27:21).

Sa ou toe nofo i lou nofoa ma ataata. Sa ou iloaina o mea faalavefau i le olaga e mafai ona foliga mai e pei o le toilalo i lena taimi. Ae i le aluga o taimi, afai e te faia pea le mea sili, o le a fesoasoani le Alii ia te oe e liua i latou i le manumalo.