“Leai ni Mea Faalavefau,” Mo le Malosi o le Autalavou, Ape. 2021, 14–17.
Leai ni Mea Faalavefau
Na maua e ni alii talavou se toalua mai Uosigitone, ISA, ni auala e auauna atu ai e ui i ni tapulaa faaletino.
Ata pue o aai mai le Getty Images
Na amata e Austin Nickle ona aoao le gagana e fai i faailoga ina ua 18 tausaga lona matua. Sa amata ona ia auai i lana paranesi Logonoa i le lotoifale ma saini foi e ave ni vasega i le kolisi a le alalafaga. Ae o Austin e le logonoa.
“Sa ou fanau mai ma se faaletonu i le tautala,” o le tala lea a Austin. “Sa ou fefe e tautala tele i lou olaga atoa ona o lou sasisasi ma le mafai ona tautala lelei [le tomai e tau atu ai ia leo uma i upu ina ia manino lo latou malamalama i ai]. Ae ou te le matamuli. Ou te fiafia i nofoaga faitele, na o lou le talanoa tele e pei o isi.”
O nisi taimi e alu se taimi o tau atu e Austin se mea e mafai ona faasoa atu e isi i ni sekone. Ae e le taofia ai lava o ia mai le faamoemoe ma auai atoatoa i le aoga po o le lotu. Ma e ui lava atonu na te lagonaina le fefe i nisi taimi, ae na te faaalia le lototele.
“E le fefe o ia,” o le tala lea a le epikopo o le uarota a Austin, o Rodger Pickett.
“Sa avea au ma ona faiaoga seminare. Sa le fefe o ia e ui i le mea moni e faapea e mafai ona taufaalili i ai nisi. Ma sa i ai ni tagata o le vasega e geno faasolo o latou mata, ae sa le fefe o ia e auai, ofo mai ni tali, tatalo, ma fai isi mea i totonu o le vasega.”
Ma e moni. O Austin e le gata i le lototoa ae faapena foi ona agalelei. Ae e le faapea e faigofie ona oo mai na mea.
Tofia e Auauna Atu
O le auauna atu i se misiona o se mea na iloa e Austin o le a tuuina atu ai se luitau.
“Ina ua ou mafaufau e auauna atu i se misiona talai,” o le tala lea a Austin, “sa ou iloa ai e mafai ona faamanuiaina au i se misiona auauna atu, ae sa ou popole i le auauna atu i se misiona talai. Ae peitai, sa ou iloaina o soo se mea lava na valaauina ai au e le Alii, o le nofoaga lea e mafai ona Ia faaaoga lelei ai au.”
Mo Austin, o se tulaga lava o le fuafuaina o le auala sili ona lelei.
I se tasi Aso Sa, na amata ai ona manino atili le ala. Sa asiasi atu le Peresitene o le siteki a Austin i le uarota a Austin, ma sa faamanuiaina e Austin le faamanatuga. A o lei faamaeaina le tatalo, sa faapea ona maua uma e le peresitene o le siteki ma Epikopo Pickett le uunaiga lava lea e tasi.
“Sa ma faliu ma tilotilo atu le tasi i le isi ma le manatu tonu lava lea e tasi,” o le tala lea a Epikopo Pickett. “E tatau ona ia iloa le gagana faailoga!”
O le taimi lava na faasoa mai ai e Epikopo Pickett ma Peresitene McCall o la manatu, na fai mai Austin, “Sa ou le toe popole i le alu i se misiona. Na ou iloa na ou manao e auauna atu o se faifeautalai i le GFA [Gagana Faailoga a Amerika].”
Na amata ona auai Austin i se paranesi Logonoa i le lotoifale, ona ave lea o le vasega o le gagana faailoga i le kolisi o le alalafaga. Ioe, e lei i ai se faamaoniga, ae sa ia galue ma le filiga ma saunia o ia lava pe afai o le finagalo o le Alii mo ia e auauna atu i se misiona a le GFA.
I le aso 26 o Setema, 2019, na maua ai e Austin lona valaauga o le misiona—o se misiona e lua tausaga mo le GFA i Phoenix, Arisona, ISA.
“Maimau pe ana mafai ona outou vaaia ona fofoga,” o le tala lea a Epikopo Pickett. “Olioli. Olioli mama. Sa ia saini ma sa faaliliuina e lona tina a o ia tatalaina le imeli. Na ia ee fiafia … faatasi ma ni moto i le ea.”
“Ua ou fiafia lava,” o le tala lea a Austin. “E ofoofogia le tele o auala e auauna atu ai.”
Elder Austin Nickle ma lana soa muamua
“O loo i ai se misiona a le Alii mo oe i se nofoaga e mafai ona e faia ai se eseesega.”
O se faafeiloai mafanafana i le misiona i Phoenix, Arisona!
Feiloai ia Donovan
O Donovan Sorensen sa soifua mai ma se faaletonu i ona maso, o se tulaga e le lava ai le polotini e fausia e le tino e toe fausia ai maso. Sa iloaina lona mai i le 7 o ona tausaga. “Sa mafai ona ou savali seia oo i le 11 ou tausaga,” o le tala lea a Donovan, “ona ou nofomau ai lea i le nofoa faataavalevale.”
E umi atu le taimi e faia ai e Donovan mea masani e pei o le alu ese mai le moega, faia o lavalava, po o le sauniaina o meaai.
“Ua mautinoa lava lou aoaoina e aua nei manatu mama i mea,” o le tala lea a Donovan. “E aumaia ai foi ia te au se agaga talisapaia mo isi atonu o loo i ai se taimi faigata atu i nei mea nai lo au.”
Fai mai le tina o Donovan, “E ui lava i ona tapulaa faaletino, ae na te lei faatagaina lava lona tulaga e taofia o ia mai le faataunuuina o se mea na te faia e tuu i ai lona mafaufau. Na te faaalia le lototele ofoofogia i le feagai ai ma le le mautonu faifai pea. Ua ia te ia se talitonuga filemu mo ia lava ma e SEKI a lona tulaga ese.”
Sa auai Donovan i le polokalama a le Sikauti.
Fiafia e tietie i se vaa a Uosigitone!
Auauna atu i le Maota o le Alii
“Ia, i le taimi muamua, o se misiona talai sa matuai leai lava i le filifiliga,” o le tala lea a Donovan. “Ma sa ou SEKI a i lena mea. Sa ou taliaina.”
Ona faalogo lea o Donovan ma lona aiga e uiga i ni misiona auauna atu.
“Sa matou faafesootaia le matou taitai faamaopoopo o le misiona auauna atu i le eria. Sa matou tau atu ia te ia le mea o le a mafai ona ou faia, “o le tala lea a Donovan. “Sa ia fesoasoani ia te au e saili le avanoa sao. Mai iina, sa ia galue ma lou peresitene o le siteki ma le epikopo e faamaea le faagasologa.”
E lei umi ae auina atu e Donovan ana pepa. E lei leva ae maua lona valaauga e auauna atu i se misiona i le Malumalu o Seattle Uosigitone. Sa vaetofia o ia ma galue i le malumalu i aso e lima i le vaiaso na sosoo ai.
“O le taimi muamua sa fai si ou fefe. Sa matou feiloai ma le peresitene o le malumalu ma le tusitalafaamaumau i se vaiaso ae ou te lei amata. Sa vaetofia au e avea ma se tagata galue i sauniga, ma na faaali mai ia te au e le tusitalafaamaumau nisi o mea o le a ou faia. O lea na faatoafilemuina tele ai ou neura. O le taimi lava na ou amata ai, sa leai se mea e popole ai. Sa ou fiafia i ona minute uma lava.”
Ae e le oo mai lana auaunaga e aunoa ma se osigataulaga ma ni luitau.
“O le ala i luga o le tasi lea o luitau, ae sa na o lou mautinoa lava ou te le tuai ona moe. E masani lava ona mafai ona faigofie lou ala ma alu i le malumalu ma faia mea uma latou te manaomia ou te faia.” Ae o le alapo ua na o le amataga lea. Ona sosoo ai lea ma le taofiga o le pasi, lea e fealuai ai Donovan i femalagaaiga lautele i le malumalu ma mai le malumalu, ma malaga ai pe tusa ma le tolu itula i le aso ma isi taimi e uumi atu, e faalagolago i le tau.
“Na te le vaaia na mea o se osigataulaga,” o le tala lea a lona tina. “E alu o ia, i le timu, kiona, po o le la susulu. E le manao o ia e misi se aso, aua ua ia iloa ua faamoemoe tagata ia te ia ma ua ia silafia le taua o lana auaunaga.”
“Ou te fiafia e fesoasoani i tagata ia lagona le taliaina,” o le tala lea a Donovan. “E toatele tagata sa faafetai mai ia te au mo lau auaunaga, ma e ui lava o loo ou faia se mea e mafai ona faia e soo se tagata faigaluega o sauniga, ou te maua ai se lagona lelei i le iloaina e mafai ona ou fesoasoani atu ia latou maua le fiafia.”
O Donovan ma Austin atonu e le o auauna atu i ni auala sa la fuafuaina muamua, ae o loo auauna atu faatasi i laua i le ala tonu lava e finagalo ai le Alii ia i laua—i Lana ala.
E alala le tusitala i Uosigitone, ISA.