Vaaia o le Agalelei o le Atua

Saunia e Brigitte Dassler

E mafai faapefea ona faauma lau suega pe afai e le mafai ona ou vaai i le pepa?

Ata na tusia e Michael Mullan

I se tasi aso i le aoga maualuga, sa faia ai sau suega o vaega o nofoaga ma tagata lea na talosagaina ai au ia faailoa ma faaigoa mai ia konetineta taitasi ma atunuu i le lalolagi. E foliga faigata, a ea? Ia, sa faigata. Aemaise ona e toeitiiti lava ou tauaso.

E faaletonu lau vaai, o ou mata la—ia, le mata lea e lelei—e na o se vaega itiiti o se itulau e mafai ona iloa atu i se taimi. E le lelei mo se suega lea sa manaomia ai ona ou vaai i le ata atoa i le taimi e tasi.

Na vave ona ou le fiafia. Sa le mafai ona ou iloaina ia Europa e ese mai Amerika i Saute po o Aferika mai Ausetalia. Sa ou matua le fiafia lava lea na amata ai ona ou tagi, ma atili ai ona nenefu ata ua fenumiai i lau pepa. O le mea e faafetai ai, sa faasaoina au ina ua savali mai lou tama i totonu e piki au i le faaiuga o le aso.

Sa tuu mai e lou faiaoga ia te au se taimi faaopoopo e faamaea ai le suega i le fale. Ina ua uma le meaai i lena po, sa ou saofai i le laulau, ua sauni e toe taumafai, a o matamata nai ou tei i se vitio i le potu malolo.

Sa amata ona ou taumafai e faatumu le faafanua ae ou tosina atu i se mea i totonu o le vitio. Sa fesili atu se tagata tauaso i le Faaola pe mafai ona Ia avatu ia te ia lana vaai. I lena taimi, o le mea lena sa ou manao ai e sili atu nai lo se isi lava mea.

Na faafuasei lava ona ou iloaina afai e mafai e se tasi ona fesoasoani mai ia te au, o Iesu Keriso lea. Ou te lei maua se vaaiga na tuuina mai ia te au i lena aso, ae a o ou faalogologo i le Faaola na faamaloloina lena tagata, sa ou lagona le olioli! Sa ou iloaina na popole Iesu Keriso mo au ma o le a fesoasoani ia te au e faauma lau suega.

Sa ou to’otuli i lalo ma ofo atu le faafetai loloto i lou Tama Faalelagi mo le meaalofa o Lona Alo. Ma, faatasi ai ma se naunautaiga fou, sa ou piki i luga lau penitala, ua sauni e toe taumafai.

E alala le tusitala i Kalefonia, ISA.