“Puipuia Taimi Paganoa,” Mo le Malosi o le Autalavou, Ape. 2021, 22–25.
Puipuia Taimi Paganoa
Sa aoaoina au e lou Tama i le taua o le faaaogaina o lou taimi e fai ai mea lelei nai lo le na o le aloese mai mea leaga.
Ata na pueina e Cody Bell
Ina ua 13 ou tausaga, sa nonofo lo matou aiga i fanua i Granger, Iuta, ma i taeao uma o Aso Toonai, ma te alapopo ai ma lou uso e amata a ma feau. I se tasi Aso Toonai faapitoa, o lau feau o le moaina o le vao. Sa i ai sa matou fanua manaia ma tele, ma o lea sa tatau ai ona ou vave ala i luga ina ia maea mea uma a o lei vevela tele.
A o ou teuina le moavao i le fale taavale ina ua uma, sa ou faalogoina le faitotoa i tua o lo matou fale o tapunia. Sa ou tilotilo i luga ma iloa atu lou tama o gego mai ou te sau ma nonofo faatasi ma ia i le faasitepu i tua o le poletito o lo matou fale. Sa ma saofafai soosoo tauau, ma le faamemelo i le la oso matagofie, a o ou faatalitali mo ia e talanoa mai ia te au.
Vaavaai Atu i le Lumanai
Ina ua mavae sina taimi sa ia fesili mai ia te au, “Atalii, tau mai ia te au se mea e te manao e fai i lou olaga. O a ni au sini? O a ni ou manatu e uiga i le lumanai?
Sa ou tau atu ia te ia au sini ma miti, e aofia ai mea e pei o le matagofie o le manuia i taaloga ma le avea ai ma se loia. Ina ua uma, sa ia fai mai, “Manaia tele lena mea. E mafai ona e faataunuuina soo se mea i lenei olaga faatasi ai ma le fesoasoani a lo tatou Tama Faalelagi.”
Ona ia fai mai lea, “Atalii, o loo i ai se mea ou te fia talanoa atu ai ia te oe, ma ou te manao ia e iloa sa ou tatalo e uiga i le mea o le a ou faasoa atu ia te oe i le taimi nei. Ma sa ou tatalo o le savali ou te avatu ia te oe o le a faamauina i lou loto.
“O le mea o le a ou fai atu ai ia te oe o le a matua aafia tele ai le ala e te feagai ai ma luitau ma lototiga o le a e feagai moni ai i lou olaga. Ma o le a oo ina uunaia le ala e te feagai ai ma faamanuiaga e te maua i lou olaga nai lo se isi lava mea ou te iloa e fai atu ia te oe. ”
Fautuaga a Tama: Puipuia Taimi Paganoa
Sa malolo o ia, ma sa ou faatalitali ma le fia iloa e saili po o le a lenei fasi fautuaga ofoofogia.
“Puipuia taimi paganoa o lou olaga,” na ia saunoa ai. “E te iloa na taimi o lou olaga pe a e mafaufau, ‘e leai se isi tagata o i ai, e leai se isi e iloa le mea o loo ou faia, ma e leai se mea o le a ou faia i le taimi nei o le a i ai ni aafiaga le lelei i se isi tagata ‘? E te iloaina na taimi?
“O le mea e te faia i na taimi, i taimi paganoa o lou olaga, o le a fuafua ai le maualuga o le talitonuga o le a e maua i luma o le Atua ma tagata. O le a iloa ai lou tomai e mafaufau lelei ai ma taulai atu i luitau e tele ma faigata i lou olaga nai lo se isi lava mea e mafai ona ou aoaoina ai oe. Ma o le a tele atu mea e fai i le auala e te tuputupu ae ai ma tausia lou lava aiga ma le auala e te taumafai ai e faalatalata atu i lo tatou Tama Faalelagi nai lo se isi lava mea e mafai ona ou fai atu ai ia te oe. Atalii, puipuia taimi paganoa o lou olaga.”
Sa ou faalogo ma le totoa i lena fautuaga. Ma e pei ona ia fai mai, na loka lena taimi i lou mafaufau ma totonu o lou fatu. O na upu ua faavavau le faamauina i lou agaga.
Fausiaina o La’u Molimau
A o ou mafaufau i mea na aoao mai e lou tama ia te au, na ou iloa ai e le gata ina faatatau lou tama i le taua o le aloese mai mea e pei o ponokalafi ma le solitulafono. Sa ia fautuaina au e faatumu na taimi paganoa i mea lelei. Pe a ma se tausaga talu ona uma lena talanoaga, ae uma ona ou faitauina mo au lava le Tusi a Mamona mo le taimi muamua. Ma sa oo ina ou maua se molimau e ala i le Agaga, i se taimi paganoa, o le Tusi a Mamona o le afioga a le Atua. Ma sa mafai ona ou vaaia le fesootaiga i le va o lona taua o le afioga a le Atua ma le Ekalesia lenei a le Alii.
I na taimi paganoa, sa ou maua ai se molimau o le perofeta o lou talavou, o Peresitene Spencer W. Kimball, o se fofoga taumomoli o le Alii. Ma o luga o lena faavae sa ou faaauau pea ona iloa o perofeta taitasi mulimuli ane, e aofia ai Peresitene Russell M. Nelson o nei ona po, o le fofoga filifilia, valaauina, ma faauuina a le Alii i le lalolagi.
Ia te au, o na taimi paganoa o le faavae lea o loo taatia ai lau molimau.
Saili ia Faaleleia
Talu mai lava lena taeao i le poletito i tua o lou fale ao tamaitiiti, o le puipuia o taimi paganoa o lou olaga ua le gata ina i ai o mea e leoleoina i taimi uma e faasaga atu i mea sese po o agasala ae faatumuina na taimi i gaoioiga faagaeetia faaleagaga ma faaletino. O nisi o na mea e aofia ai le faalogologo i musika lelei, tatalo, faitauina o tusitusiga paia po o isi tusi lelei, ma faamalositino faaletino. Ou te taumafai ma faatumu na taimi paganoa ma se taulaiga i le atiina ae o au taleni ma le galulue ai i mea ou te fiafia i ai. Ua ou iloa o le faia o lena mea e aumaia ai ia te au le olioli tumau nai lo sina fiafia le tumau.
I le taimi o lou talavou, a o ou galue i le puipuia o taimi paganoa o lou olaga, sa ou faia ai ni sini patino i vaega na ou manao e faaleleia, e pei o le setiina o ni sini e faitau le Tusi a Mamona, ia faaleleia lou taimi i le 400-mita e tamoe ai, auauna atu i se misiona talai, ma auai i se iunivesite. Sa ou taumafai e faaaoga lou taimi e alualu ai i luma ma atiina ae ou tomai. O le faatulagaina ma le tauivi e ausia na sini ua faamanuiaina ai lou olaga i le ola maloloina sili atu faaletino, faamalosia le molimau, filemu i totonu, ma le olioli tumau.
Ou te matua faafetai lava mo le fautuaga na tuuina mai e lou tama ia te au i na tausaga ua mavae e puipuia ai taimi paganoa o lou olaga. Ou te iloa o lana fautuaga na fesoasoani ia te au e faafetaiaia ai luitau o le olaga ma lagona ai le talitonuga o le iloaina o loo i ai sou Tama oi le Lagi e alofa ia te au, ma e mafai ona ou alu i ai i taimi matagofie o le tatalo, i taimi paganoa uma o lou olaga (tagai Mataupu Faavae ma Feagaiga 121:45–46). A o e puipuia na taimi i lou olaga ma faatumuina i gaoioiga musuia ma faagaeetia o le a e vaaia ma lagonaina faamanuiaga a lo tatou Tama Faalelagi o le filemu, le faateleina o le mautinoa ma le olioli tumau i lou olaga.