Fesili & Tali

“E mafai faapefea ona ou tausisia le mama o ou manatu mai faatosinaga le lelei e siomia ai au?”

“A o tatou faaaoga le faatuatua ia Iesu Keriso ma Lana Togiola, o le a faamalolosia i tatou, o le a māmā a tatou avega, ma e ala mai ia te Ia o le a tatou manumalo i le lalolagi.”

Elder Ulisses Soares o le Korama a Aposetolo e Toasefululua, konafesi aoao Ape. 2017 (Ensign po o le Liahona Me 2017, 34).

Avea ma se Faataitaiga

tamaitai talavou

“O nisi o au uo o le a latou faaaogaina ni upu masoa po o faaupuga mataga. A oo mai upu leaga i lou mafaufau, ou te taumafai e manatua o au o se molimau a Iesu Keriso i taimi uma ma e tatau ona avea au ma se faataitaiga i au uo. Ou te fia faailoa atu au lava i le ala semanu e faia e Iesu Keriso. ”

Naobi L., 16, Aai o Mekisiko, Mekisiko

Suia Manatu

tamaitai talavou

“Sa faamatala e Peresitene Boyd K. Packer i se tasi taimi, o o tatou mafaufau e pei o se tulaga [tagai i le Oke. 1973 konafesi aoao]. Ua na o se avanoa lava mo se mea e tasi e faafiafia ai i luga o le tulaga i se taimi. Afai e te lagonaina ni mafaufauga le mama, taumafai e mafaufau i mea paia! E mafai ona latou suitulaga i soo se mea sa i luga o lou tulaga. O se mea e fesoasoani ia te au o le usuina o pese Peraimeri. A le o lou mafaufau i ai pe musumusu lemu lava. ”

Alyssa F., 17, Uosigitone, ISA

Ia Saunia Mamao i Luma

alii talavou

“Ou te faia le mea sili e tuu ai na o ala o faasalalauga mama ma siitia i lou olaga ma a faaaoga e tagata gagana le mama, e i ai ou mafaufauga lelei e toso ese mai ai. Ou te taumafai foi e siomia au lava i uo o i ai ou tulaga faatonuina. E faigofie ai ona filifili le mea sao ma lē lagonaina le faaosoosoina e faaaoga gagana le mama pe mafaufau i mafaufauga le mama.”

Nathan Z., 13, Iuta, ISA

Faalogologo i Mea Lelei.

tamaitai talavou

“O se tasi o auala e mafai ona tatou aveese ai gagana le mama mai i o tatou mafaufau o le faalogologo lea i musika e malie i lo tatou Tama Faalelagi e pei o viiga. O le faalogologo i tusitusiga paia e mafai foi ona fesoasoani ia i tatou ma a tatou suesuega faaletagata lava ia ma faaleaiga. Ma le isi, o le faalogologo i lauga o le konafesi e mafai ona fesoasoani ia i tatou e taulai atu ai i le faalogo i uunaiga mai le Agaga.”

Sandra M., 17, El Salvador

Vaai i le Tama Faalelagi

tamaitai talavou

“Ou te taumafai e suitulaga se mafaufauga le lelei pe le mama i se lagona lelei i le mafaufau i se mea malie o loo ou tulimatai atu i ai. Afai e te mafaufau i se mea lelei ma faagaeetia, e mafai ona e faamamaina ese mea le lelei! Afai e te mafaufau i lou Tama Faalelagi ma lou Faaola, o le a e maua le malosi ma le mana e tulei ese ai mafaufauga leaga.”

Breelynn S., 12, Georgia, ISA

O tali ua faamoemoe e mo le fesoasoani ma ni manatu, ae e le o se faalauiloaga aloaia o aoaoga faavae o le Ekalesia.

O Le A Sou Manatu?

E mafai faapefea ona ou maua le “olioli i le faigamalaga” pe a foliga e faigata tele?

Auina mai lau tali ma le ata ae lei oo i le aso 15 o Mati, 2021.

Alu i le ftsoy. ChurchofJesusChrist.org, kiliki le “Auina Atu Lau Galuega.” Saini e alu i totonu i lau Faitotoa a le Ekalesia ona filifili lea o le “Mo le Malosi o le Autalavou” i lalo o le “Filifili le Mekasini.” Kiliki le “Faaopoopo le Faila” e filifili ai lau faila ma ata, ona kiliki lea o le “Auina Atu” e utaina ai ma auina atu lau faila. Pe imeli mai ia i matou i le [e-mail].

E ono iloiloina tali mo le uumi po o le manino.