“Elemene e 4 o le Togiola Atoatoa a le Faaola,” Mo le Malosi o le Autalavou, Ape. 2021, 18–19.
Sau, Mulimuli Mai ia te A’u
Elemene e 4 o le Togiola Atoatoa a le Faaola
O le Togiola a Iesu Keriso e atoatoa mo tagata uma, e aofia ai oe!
Ata na tusia e Corey Egbert
Pe ua e mafaufau ea pe mafai faapefea e Iesu Keriso ona faasaoina tagata uma o e na soifua? E faapefea ona galue lana taulaga togiola mo tagata uma?
E amata uma lava i le fuafuaga o le faaolataga. O le galuega a le Tamā Faalelagi o le “aumaia le tino ola pea ma le ola e faavavau” o Ana fanau uma—e aofia ai oe ma a’u (Mose 1:39). Ae o loo i ai ni papupuni e tatau ia i tatou taitoatasi ona faatoilaloina ina ia maua ai le tino ola pea ma le ola e faavavau. O le a tatou feoti uma i se aso, o lona uiga e le o tino ola pea i tatou. Ma e faia e i tatou taitoatasi le agasala, lea tatou te le agavaa ai mo le ola e faavavau, po o le i ai i le afioaga o le Tama Faalelagi ma le ola e pei ona soifua ai o Ia.
Na silafia e le Tama Faalelagi o le a tatou feagai ma nei papupuni, o lea na Ia auina mai ai lona Alo, o Iesu Keriso i le lalolagi ina ia ola, puapuagatia mo a tatou agasala, maliu, ma toetu mai. Tatou te ta’ua lenei mea o le Togiola a Iesu Keriso. Ona o Iesu Keriso, o le a tatou toetutu uma lava. Ma afai tatou te filifili e salamo, e mafai ona faamamaina i tatou mai a tatou agasala ma toe foi atu i le Tama Faalelagi (tagai i le 2 Nifae 9:8–9; Alema 11:41–43).
E leai se tasi o i tatou e mafai ona faia lenei mea mo i tatou lava. Ua na o Iesu Keriso lava le tagata e mafai ona faia se taulaga togiola mo i tatou, aua e tatau ona faataunuuina i le atoatoa. Ae o le a le uiga ia i tatou pe a tatou faapea, na atoatoa Lana taulaga togiola?
O mea nei e fa na faia ai le Togiola a lo tatou Faaola, o Iesu Keriso, e atoatoa.
1. Lona Soifua Mai Paia
Na fanau mai Iesu Keriso o le Alo o le Atua (tagai Mosaea 3:5–8). Sa i ai Sona tina faaletino ma se Tama Faalelagi. O le uiga o lenei mea o le a oo ia Keriso se olaga i le tino ma fai filifiliga mo Ia lava, ae o le a Ia maua foi le fesoasoani ma le malosi o le Atua, faapea ai ma le mana e toetu mai ai.
2. O Lona Soifua e Leai se Agasala
E lei agasala Iesu Keriso i le taimi o Lona soifuaga. Sa Ia faaaogaina Lana faitalia e filifili ai le usiusitai ma le amiotonu nai lo le agasala (tagai Mosaea 15:5; Mataupu Faavae ma Feagaiga 19:24; 20:22). Ona sa soifua o Ia i se soifuaga atoatoa, o Lana taulaga o se taulaga agavaa lea e mafai ona togiolaina isi mai le agasala.
3. Lona puapuagatia i le Faatoaga o Ketesemane ma luga o le Satauro.
I le Faatoaga o Ketesemane ma luga o le satauro i Kalevario, sa mafatia ai lo tatou Faaola i tiga ma agasala a tagata uma na soifua (tagai Mataupu Faavae ma Feagaiga 19:16–19; Alema 7:11–14). Ona o lena mafatiaga, ua malamalama ai Iesu Keriso i mea o loo e lagonaina ma aafia ai—o le lelei ma le leaga—ma e mafai ona fesoasoani ia te oe i ou tofotofoga.
4. Lona Maliu ma le Toetu
Ina ua mavae lona mafatiaga i le faatoaga, sa aveesea Iesu Keriso, faatigaina, ma faasatauroina. Na teena o Ia e Ona tagata e ui i Lona taumamaina (tagai Mosaea 3:9, Mataupu Faavae ma Feagaiga 45:3–4). I le aso lona tolu ina ua mavae Lona maliu, na toetu mai Iesu Keriso, le tagata muamua na faia lea mea i le lalolagi (tagai 1 Korinito 15:20–22). Sa toetu o Ia mai le oti ma maua ai se tino atoatoa. Ina ua mavae Lona Toetu, sa faapea ona maea Lana Togiola mo i tatou. Ua i ai ia Iesu le mana e fesoasoani ai ia i tatou e faatoilalo le agasala ma le oti ina ia mafai ona tatou toe foi atu ma mau faatasi ma le Tama Faalelagi (tagai Mataupu Faavae ma Feagaiga 18:11–12; 20:23–26).
E faapefea ona fesoasoani le malamalama i lenei mea ia te oe?
O le malamalama i le ala na tupu ai se mea e mafai ona fesoasoani ia i tatou e talisapaia le mea na tupu. Talu ai na faataunuuina e Iesu Keriso Lana misiona na muai faauuina e ala i Lona soifua mai paia, soifuaga le sala, mafatiaga, maliu, ma le toetu, na Ia faamaeaina ai le Togiola atoatoa.
Sa matua atoatoa le Togiola a Iesu Keriso lea na mafai ai e Ia ona Togiola “e le gata ia i latou o e na talitonu ina ua mavae ona afio mai o ia … i la le tino, ae o i latou uma mai le amataga ”(Mataupu Faavae ma Feagaiga 20:26). O tagata uma lava na ola—o lona uiga o oe!—e mafai ona e filifili e maua le faatuatua, salamo, osia ma tausia feagaiga, ma toe foi atu i le Tama Faalelagi.