“Ko e Vakai ki he Lelei ʻo e ʻOtuá,” Ki Hono Fakamālohia ʻo e Toʻu Tupú, ʻEpeleli 2021, 20.
Ko e Vakai ki he Lelei ‘o e ʻOtuá
Te u lava fēfē nai ʻo fakaʻosi ʻeku siví kapau ʻoku ʻikai pē ke u lava au ʻo sio ki he laʻipepá?
Tā fakatātaaʻi ʻe Michael Mullan
ʻI ha ʻaho ʻe taha ʻi he akoʻanga māʻolungá, ne ʻi ai haʻaku sivi siokālafi ʻa ia naʻe kole mai ai ke u feinga ke ʻiloʻi mo fakahingoa ʻa e ngaahi konitinēniti mo e ngaahi fonua takitaha ʻi he māmaní. Ngali faingataʻa, ko ia? ʻIo, naʻe pehē ia. Tautautefito he ʻoku ou meimei kui ʻaupito.
ʻOku ou maʻu ʻa e vīsone tāfatahá, ko ia ai ko hoku ongo matá—ʻa e taha ʻoku ngāué—ʻe lava ke nofotaha pē ia ʻi ha konga siʻi ʻo e peesí ʻi he taimi pē ʻe taha. Naʻe ʻikai ko ha meʻa lelei ia ki ha sivi ʻa ia naʻe fie maʻu ai ke u vakai fakaʻangataha ki he kotoa ʻo e fakatātaá.
Ne u ʻita vave ʻaupito. Naʻe ʻikai ke u lava ʻo tala ʻa ʻIulope mei Saute ʻAmelika pe ʻAfilika mei ʻAositelēlia. Naʻá ku fuʻu ʻita ʻaupito pea kamata ai ke u tangi, ʻo ne ʻai e ngaahi fuo naʻe ʻosi ta‘emahino ʻi heʻeku pepá ke toe nenefu ange. Mālō pē, naʻe fakahaofi au ʻi he taimi ne hū mai ai ʻeku tangataʻeikí ke ʻave au he fakaʻosinga ʻo e ʻaho akó.
Naʻe ʻomi ʻe heʻeku faiakó ha taimi lahi ange ke u fakakakato ai e siví mei ʻapi. Hili e maʻu meʻatokoni efiafí he pō ko iá, ne u tangutu he tēpilé, ʻo mateuteu ke toe feinga, kae sio pē hoku ngaahi tokouá mo e tuongaʻané ʻi ha foʻi vitiō he loki talanoá.
Naʻá ku kamata feinga ke fakafonu e mapé mo e maʻu ʻeku tokangá ʻe ha meʻa ʻi he vitioó. Naʻe kole ʻe ha tangata kui ki he Fakamoʻuí pe te Ne foaki kiate ia ha mata ke ne lava ʻo mamata. ʻI he momeniti ko iá, ko e meʻa ia naʻá ku fie maʻu lahi angé ʻi ha toe meʻa.
Fakafokifā pē ne u fakatokanga‘í kapau ʻe lava ha taha ke tokoni‘i au, ko Sīsū Kalaisi. Naʻe ʻikai ke ʻomai ha mata ke u mamata he ʻaho ko iá, ka ʻi heʻeku fanongo ki hono fakamoʻui ʻe he Fakamoʻuí ʻa e tangata ko iá, ne u ongoʻi fiefia! Naʻá ku ʻilo naʻe tokanga mai ʻa Sīsū Kalaisi kiate au pea ʻe tokoni kiate au ke fakaʻosi ʻeku siví.
Ne u tūʻulutui ʻo ʻoatu ha fakamālō loto-houngaʻia ki heʻeku Tamai Hēvaní koeʻuhí ko e meʻaʻofa ʻo Hono ʻAló. Hili iá, ʻi he loto-fakapapau foʻou ne u maʻú, ne u toʻo hake ʻeku penivahevahé, peá u mateuteu ke toe feinga.
ʻOku nofo ʻa e taha naʻá ne faʻú ʻi Kalefōnia, USA.