Ngaahi Fehuʻí & Talí

“ʻE lava fēfē nai ke u tauhi ʻeku ngaahi fakakaukaú ke maʻa mei he ngaahi ivi tākiekina kovi ʻoku nau ʻākilotoa aú?”

“ʻI heʻetau ngāue ʻaki ʻa e tui kia Sīsū Kalaisí mo ʻEne Fakaleleí, ʻe fakamālohia kitautolu, fakamaʻamaʻa ʻetau ngaahi kavengá, pea te tau ikunaʻi ʻa e māmaní ʻo fakafou ʻiate Ia.”

‘Eletā ʻUlise Soālesi ʻo e Kōlomu ‘o e Kau ʻAposetolo ‘e Toko Hongofulu Mā Uá, konifelenisi lahi ʻo ‘Epeleli 2017 (Ensign pe Liahona, Mē 2017, 34).

Hoko ko ha Faʻifaʻitakiʻanga

“ʻʻI he ngaahi taimi ʻe niʻihi ʻoku faʻa ngāue ʻaki ʻe hoku ngaahi kaungāmeʻa ʻe niʻihi ʻa e lea kapekapé mo taʻefeʻungá. ʻI he taimi ʻoku hoko mai ai ha ngaahi lea taʻefeʻunga ki heʻeku fakakaukaú, ʻoku ou feinga ke manatuʻi ko ha fakamoʻoni au ʻo Sīsū Kalaisi ʻi he taimi kotoa pē pea kuo pau ke u hoko ko ha faʻifaʻitakiʻanga ki hoku ngaahi kaungāmeʻá. ʻOku ou fie fakahaaʻi au ʻo hangē ko hono fakahaaʻi ʻe Sīsū Kalaisi Iá.”

Naobi L., 16, Mekisikou Siti, Mekisikou

Fetongi ʻa e Ngaahi Fakakaukaú

“Naʻe fakamatalaʻi ʻe Palesiteni Poiti K. Peeka ʻa e founga ʻoku tatau ai hotau ʻatamaí mo ha funga siteisí [vakai, konifelenisi lahi ‘o ʻOkatopa 1973]. ʻOku feʻunga pē ʻa e ʻatā ʻo e funga siteisí ki ha meʻa ʻe taha ke lele ai ʻi he taimi ʻe taha. Kapau ʻokú ke ongoʻi ha ngaahi fakakaukau ʻuli, feinga ke ke fakakaukau ki he ngaahi meʻa māʻoniʻoní! Te nau lava ʻo fetongi ha meʻa pē naʻe ʻi hoʻo funga siteisí. Ko e meʻa ʻokú ne tokoniʻi aú ko hono hivaʻi ha ngaahi hiva Palaimeli. ʻOku ou fakakaukauʻi kinautolu pe fanafana leʻosiʻi kinautolu.”

ʻAlisa F., 17, Uāsingatoni, USA

Teuteu Kei Taimi

“ʻOku ou fakahoko hoku lelei tahá ke fakaʻatā pē ʻa e mītia ʻoku maʻa mo langaki moʻuí ki heʻeku moʻuí koeʻuhí ko e taimi ʻoku ngāue ʻaki ai ʻe he kakaí ʻa e lea taʻefeʻungá, ʻoku ou toʻo mai leva ha ngaahi fakakaukau lelei kuó u maʻú. ʻOku ou feinga foki ke feohi mo e ngaahi kaungāmeʻa ʻoku tatau ʻemau ngaahi tuʻunga moʻuí. ʻOku faingofua ange ai ke fili ki he totonú pea ʻikai ongoʻi ʻoku ʻahiʻahiʻi au ke u ngāue ʻaki ha lea taʻemaʻa pe fakakaukau ki he ngaahi fakakaukau ʻulí.”

Neifeni Z., 13, ʻIutā, USA

Fakafanongo ki he Ngaahi Meʻa ʻOku Leleí

“Ko ha founga ʻe taha ʻe lava ke tau toʻo ai ha lea taʻemaʻa mei hotau ʻatamaí ko e fanongo ki he ngaahi hiva ʻoku fakahōifua ki heʻetau Tamai Hēvaní ʻo hangē ko e ngaahi himí. ʻE lava foki ke tokoniʻi kitautolu ʻi heʻetau ngaahi ako fakatāutahá mo e fakafāmilí ʻaki ʻetau fanongo ki he ngaahi folofolá. ʻIkai ngata aí, ʻe lava ke tokoniʻi kitautolu ʻe heʻetau fakafanongo ki he ngaahi lea ʻo e konifelenisí ke tau tokanga taha ke fanongo ki he ngaahi ueʻi mei he Laumālié.”

Senitulā M., 17, ʻEle Salavatoa

Sio ki he Tamai Hēvaní

“ʻOku ou feinga ke fetongi ha fakakaukau ʻoku ʻikai lelei pe taʻemaʻa ʻaki haʻaku fakakaukau ki ha meʻa fakafiefia ʻoku ou hanganaki fiefia atu ki ai. Kapau te ke fakakaukau ki ha meʻa ʻoku lelei mo langaki moʻui, te ke lava ʻo siʻaki ʻa e meʻa ʻoku ʻikai leleí! Kapau te ke fakakaukau ki hoʻo Tamai Hēvaní mo ho Fakamoʻuí, te ke maʻu ʻa e ivi mo e mālohi ke tekeʻi ʻa e ngaahi fakakaukau koví ke mamaʻo.”

Pililini S., 12, Siōsiā, USA

ʻOku fakataumuʻa ʻa e ngaahi talí ko ha tokoni mo ha fakakaukau, ka ʻoku ʻikai ko hano fakahaaʻi fakaʻofisiale ʻo ha tokāteline ʻo e Siasí.

Ko e Hā Hoʻo Fakakaukaú?

Te u lava fēfē nai ʻo maʻu ʻa e “fiefia ʻi he fonongá” lolotonga ʻene ngali fuʻu faingataʻá?

ʻOmi hoʻo talí mo e laʻitaá kimuʻa he ʻaho 15 ʻo Mē, 2021.

ʻAlu ki he ftsoy.ChurchofJesusChrist.org, lomiʻi ʻi he “Fakahū Hoʻo Ngāué.” Hū ʻaki hoʻo ʻAkauni ʻi he Siasí pea fili leva ʻa e “Ki Hono Fakamālohia ʻo e Toʻu Tupú” ʻi lalo ʻi he “Fili e Makasiní.” Lomiʻi ʻi he “Tānaki Atu ha Faile” ke fili hoʻo failé mo e ʻū taá, pea lomiʻi ‘i he “Fakahū” ke upload mo ʻomi kiate kimautolu hoʻo failé. Pe ‘īmeili mai kiate kimautolu ʻi he [e-mail].

ʻE lava ke liliu ʻa e ngaahi talí koeʻuhí ko e lōloa feʻungá pe mahinó.