“Harem Tabu Plan Ia blong Stap Jenisim Fasin Moa,” Blong Ol Yut Oli Kam Strong, Julae 2021, 2–5.
Tabu Plan blong Stap Jenisim Fasin Moa
Taem we yumi stap luk laef long wol ia long wan defren wei, bae yumi luk se hem i no wan kwestin blong “?stap o no stap?” be hem i “?blong jenis moa o no jenis moa?”
Mi mi gat blesing ia blong stap wetem waef blong mi long taem we wanwan long ol pikinini blong mifala oli bon i kam long wol ia, mo blong stap tu long taem we papa mo mama blong mi i ded. Mi bin sapraes blong filim long taem we wan i bon, mo long taem we wan i ded. Mi filim olsem se wan tabu samting ia i stap hapen. Taem blong yumi long wol ia, i wan impoten pat we i no save finis insaed long laef blong yumi. Heven i makem stat mo en blong wanwan laef we i bon long wol ia.
Wanem we yumi nid blong mekem taem yumi stap long ples ia, long wol ia, bae yumi save andastanem nomo taem yumi save wanem i bin hapen bifo taem we yumi bon i kam long wol ia, mo wanem bambae i hapen afta long ded. Sapos laef blong yumi long wol ia, i hemia nomo, we i finis long ples ia, maet bae yumi “kakae, dring, mo stap glad” (2 Nifae 28:7) mo bae yumi no stap wari long ol narafala man. Be taem we yumi stap luk laef long wol ia long wan defren wei, bae yumi luk se hem i no wan kwestin blong “?stap o no stap?” be hem i “?blong jenisim fasin moa o no jenisim fasin moa?”1
Blong stap andastanem plan ia blong fasin blong sevem man—laef blong yumi bifo yumi bon i kam long wol ia, stamba tingting blong laef blong yumi long wol ia, mo laef blong yumi afta long ded—mo ki rol we Sevya, Jisas Kraes, i tekpat long hem long plan ia, i soem yumi se bambae Hem i helpem yumi tru long laef ia. Taem yumi stap mekem ol kavenan wetem hem, yumi stap putum yumi long kavenan rod ia—mo yumi jenis i kam moa olsem Hem mo moa olsem Papa blong yumi long Heven, wan step i folem nara step.
Laef blong Yumi Bifo Laef long Wol ia
Revelesen i stap tijim se, yumi, yumi ol spirit pikinini blong God mo yumi bin stap laef wetem Hem blong wan longfala taem bifo yumi kam long wol ia. Papa blong yumi long Heven i bin rere wan wei blong yumi jenis mo kam olsem Hem. Olgeta we, long laef bifo laef long wol ia, oli bin jusum plan blong Papa we i fasin blong sevem man, o plan ia blong hapines—mo olgeta ia oli yumi evriwan—oli jusum blong “jenis moa.”
Elda Christofferson wetem waef mo ol pikinini blong hem.
Taem blong Yumi long Wol ia
Yumi kam long wan wol we God mo Pikinini blong Hem, Jisas Kraes, Tufala i bin mekem. Yumi bin kasem wan bodi blong mit mo bun. Blong gat wan bodi, i wan mas blong save kasem glori ia we God i stap glad long hem naoia. Sapos yumi soem se bambae yumi obei ol komanmen blong God, bambae yumi gat “glori antap long hed blong [yumi] blong oltaem mo oltaem” (Ebraham 3:26). Hemia i minim se bae yumi jenis mo kam olsem papa mo mama blong yumi long heven, mo bae yumi stap wetem tufala blong oltaem. Mifala i bin singaot wetem glad from ol bigfala janis ia blong glori.
Yu mo mi, i wet wan longfala taem, be naoia, yumi stap ia long wol ia. Yumi stap luk i go long taem ia we yumi laef bakegen long ded wetem wan bodi we i stret gud, mo i no save ded samtaem, mo yumi go insaed long selestial kingdom mo stap glad long laef we i no save finis—wan samting ia we i naes gogo, yumi no save pikjarem nomo. Be naoia, yumi stap lan mo stap traehad blong “mekem evri samting we Lod, God blong [yumi] bae i givim oda long [yumi]” (Ebraham 3:25). From se yumi save plan ia blong God, yumi save se olgeta komanmen ia, God i no givim blong stopem fridom o hapines blong yumi—be i nara wei. Ol komanmen oli soem rod long yumi blong kasem bigfala fridom mo bigfala glad.
Hem I Bin Givim Wan Sevya long Yumi
Be laef i had yet. Yumi evriwan i folfoldaon taem yumi stap lan blong laef wetem fet. Be God i bin promesem yumi, bifo Hem i krietem wol ia, se bambae Hem i givim wan Sevya blong sevem yumi long sin mo ded. Tru long safaring mo ded blong Hem—tru long Atonmen blong Hem—Jisas Kraes i bin pem ol sin blong yumi, mo i givim presen ia, we i fasin blong sakem sin, long yumi. Mekem se, taem yumi sakem sin, Hem i stap fogivim ol sin blong yumi, mo Hem i stap klinim yumi blong yumi no fesem ol risal blong ol sin ia. Mo tru long Laef Bakegen long Ded blong Hem, Sevya ia i givim yumi presen ia we i taem Hem i laef bakegen long ded, mo fasin blong nomo save ded samtaem.
Evri Ni Bae I Bodaon, i kam long J. Kirk Richards
Stap Wokbaot long Kavenan Rod
Semmak olsem we yumi bon i kam long wol ia wetem wan bodi blong mit mo bun, bambae yumi mas bon bakegen long saed blong spirit insaed long kingdom blong heven. Yumi mekem hemia taem yumi stap praktisim fet long Kraes, taem yumi sakem sin, taem yumi kasem baptaes mo stap kasem Tabu Spirit. Hemia i stat blong wan jenis long saed blong spirit we i stap truaot long laeftaem blong yumi long wol ia. Samtaem, yumi singaotem hemia blong “stap strong kasem en,” we i minim se yumi traehad blong kipim kavenan blong baptaes blong yumi blong stap obei long evri laef blong yumi, mo sakem sin olsem we i nid blong mekem, mo muv fored bakegen. “Yes, mo evri taem we ol pipol blong mi oli sakem sin,” Jisas i talem, “ bae mi fogivim olgeta long ol rong blong olgeta agensem mi” (Mosaea 26:30).
Yu Save Dipen long Help blong God
Long laef blong yu bifo yu bon i kam long wol ia, yu bin jusum God, yu bin jusum Kraes, yu bin jusum blong “jenis moa” wetem help blong Tufala. Mo yu save dipen long help blong Tufala. Ol memba blong Godhed oli no ol man we oli lukluk samting long laef blong yumi mo no wantem save long wanem i stap hapen. Tufala i gat lav long yumi we i no gat en, mo Tufala i yusum paoa blong tufala blong helpem yumi, olsem we yumi letem i hapen. Tufala, oltaem Tufala i stap respektem fridom blong yumi blong mekem joes, be Tufala i wantem tumas blong blesem yumi. Jisas i talem kwaet long yumi: “bae mi no fogetem yu, O laen blong Isrel. Luk, mi bin raetem yu long skin blong insaed han blong ol han blong mi” (1 Nifae 21:15–16).
Blong Jenis mo Kam Gud Moa Wan Step Afta Wan Nara Step
Sam oli filim se selestial kingdom ia i wan ril hop blong ol narafala man, be i no blong olgeta. Trutok, i we, i no gat wan i save kwalifae sapos hem i no kasem gladhat blong Jisas Kraes. Tangkyu tumas, yu save yusum gladhat ia. Jisas i bin talem long yumi se Hem i bin winim wol ia. Wetem baptaes blong yu mo ol narafala kavenan, yu fasem yu long Hem, blong mekem se, wetem Hem, yu tu bae yu save winim wol ia.
Yu no nid blong yu stret evriwan long wol ia. Profet Josef Smit i komperem hemia long fasin blong klaem long wan lada: yu stat daon mo yu klaem wan step folem nara step, mo semtaem, yu stap lanem mo stap laef folem ol prinsipol blong gospel. Mo fasin ia blong lanem samting, hem i bin tijim se hemia i stap gohed i bitim laef ia—“I no evri samting we bambae yumi andastanem long wol ia.”2
I nomata wanem wiknes, hadtaem, o safaring yumi gat long wol ia, God i stap promesem ol fetful pikinini blong Hem se, bambae Hem i no save holembak wan blesing sapos yumi stap long kavenan rod ia (o sapos yumi kwik blong kambak long rod ia). Nao, evri samting i wokaot. !Hemia nao tabu plan ia blong jenis moa!