“7 Mak blong Bras blong Gat Wan Moa Hapi Laef,” Blong Ol Yut Oli Kam Strong, Julae 2021, 8–11.
7 Mak blong Bras blong Gat Wan Moa Hapi Laef
Ol simpol step ia we yu tekem evri dei, oli tekem yu long wan hapi laef.
Pikja i kam long Katy Dockrill
“!Luk! !Mi mekem hemia blong yu!” boe blong mi i talem taem hem i stap holem pikja blong hem stret long fored blong fes blong mi. Pepa ia i tajem nus blong mi mo mi no save luk gud, be luk ol kalkala nomo. Mi no save luk klia.
Taem mi pusum peinting ia i go longwe smol, ol kalkala ia oli kam klia.
“?Wanem tingting blong yu?” hem i askem.
Boe blong mi i wok plante aoa blong pentem, wanem we, long tingting blong hem, i wan ril pikja blong mitufala—be hemia nomo, hea blong mi i no yelo.
“Mi no gat inaf braon,” hem i talem blong traem help. “Mo yelo i wan moa hapi kala tu.”
Taem mi luklukgud long peinting ia, mi bin save luk se boe blong mi i bin pentem pikja ia wetem lav. Mi no save kaontem hamas mak blong peintbras i stap ia. I gat plante tumas. Mo hem i talem tru, mi luk hapi nomo—wetem yelo hea tu.
Tingting long wan peinting we yu bin luk finis. Bae yu luk se i no gat wan mak nomo blong peint we i mekem peinting ia i naes. Wanem i stap, taem yu luk long wan mak ia nomo, bae yu no luk se i spesel tumas. Be, taem yu joenem evriwan, yu gat wan art wok ia we i naes tru.1
Blong faenem hapines long laef, i semmak long wan peinting. I gat ol smol mak blong peint we yu minim blong pentem, o i gat ol evri dei aktiviti we yumi save mekem blong krietem wan laef we i fulap long hapines. Sapos ol samting ia oli hapen wan taem nomo, bae oli no spesel tumas. Be taem yumi joenem olgeta bakegen mo bakegen, mo yumi traehad from evri dei mo evri wik, bae oli mekem wan laef we i fulap long hapines.
Hemia hem i seven mak blong bras blong peint, o aktiviti we yu save mekem i kam gud moa blong krietem moa hapines insaed long laef blong yu.
Bras Mak 1: Raonem yu wetem ol pipol we oli leftemap tingting blong yu.
Hapines i go plante wetem ol pipol we yu stap joenem olgeta. I no minim se yu no save fren wetem ol pipol we samtaem oli no hapi. Be, yumi evriwan i go tru long sam taem we i no hapi, wanwan taem.
Be mekemsua se yu spendem taem wetem ol pipol we oli save leftemap yu mo save givim insperesen long yu. Ol gudfala fren we oli stap helpem yu blong stap laef folem ol standet blong Lod, oli save mekem plante samting i defren long hapines blong yu. Mo traem blong stap wan fren we i save leftemap tingting blong ol narawan. Yu save mekem plante samting i defren long laef blong ol narawan tu.
Bras Mak 2: Yusum miusik blong mekem yu hapi moa.
Miusik i save gat bigfala paoa ova long maen blong yu. Hem i save jenisim stret wanem i stap long bren blong yu. Gud miusik i save helpem yu blong yu tingting stret, yu stap hapi mo kasem insperesen. Mekem wan lis blong miusik blong lisin long hem we i gat ol singsing we i save mekem yu yu hapi, i leftemap tingting blong yu, mo i leftemap fet blong yu; ol singsing ia oli ol singsing we yu save lisin long olgeta oltaem.
Bras Mak 3: Go Aotsaed.
Blong stap glad mo yusum ol kriesen blong God, i save hilim spirit mo bodi blong yumi. Blong yumi save stap hapi, hem i impoten tumas blong oltaem, yumi mas kamaot long televisen, kompiuta mo ol skrin blong telefon blong save go aotsaed mo stap glad long san, long ol plant mo flaoa, mo ol animol raon long yumi. Go wokbaot wetem famli mo fren blong yu; go pleiplei sam gem aotsaed; go ridim buk mo stadi aotsaed. Bae yu sapraes hamas bae yu filim gud taem yu mekem olsem.
Bras Mak 4: Slip Inaf.
Lod i bin talem se yumi mas slip, se slip i wan mas blong gat gud helt long maen mo long bodi blong yumi (luk long Doktrin mo Ol Kavenan 88:124). Semmak olsem wan telefon, i nid blong fulumap paoa long batri bakegen; nao, bren blong yu i mas slip blong i save wok gud. Semmak olsem we yu putum taem blong wekap long moning, meksua se yu putum taem blong yu go slip tu (!mo no tekem telefon i go wetem yu!).
Bras Mak 5: Gat Ol Storian we Oli Gat Dip Mining.
Blong stap yusum teks o sosol media blong save toktok wetem ol fren mo famli blong yu, i gud tumas. Be, blong save storian fes tu fes, i mekem wan samting long maen mo spirit blong yu we ol lektronik komunikesen oli no save mekem. Meksua se yu mas toktok fes tu fes, o wetem maot blong yu long famli mo ol fren blong yu. Tekem taem blong lisin mo toktok wetem olgeta raon long yu.
Bras Mak 6: Mekem Bodi I Muv Oltaem mo Traem Kakae Helti.
Bren blong yu bae i wok nomo wetem bensin we bae yu givim long hem. Ol kaekae we oli kukum o tanem tumas mo gat plante suga long hem (samtaem yumi singaotem doti kaekae), maet oli tes gud, be plante taem, oli mekem maen mo bodi blong yu oli wok slo. Gud nius i we, sapos yu kakae moa frut, vejetebol, mo moa sid, bae filing blong wantem kakae ol kaen kaekae ia bae i godaon mo lus. Lod i givim wan bodi ia nomo long yumi, !mo bae i gud moa blong lukaotgud long hem!
Bras Mak 7: Prea mo Tingting Hevi.
Lod mo ol profet mo aposol blong Hem, plante taem oli bin givim kaonsel ia blong tekem taem blong prea mo stap kwaet. Blong stap prea mo tingting hevi blong wan longfala taem i save tajem sam pat blong bren long wan gud wei, we i save mekem yu harem se yu hapi. Sapos yu tekem taem blong yu tingting hevi mo prea oltaem, bae hapines blong yu bae i kam antap smol evri taem. Afta wan longfala taem, bambae yu luk wan samting i defren evriwan; bae yu filim moa pis mo bae yu gat moa tras long yuwan.
?Yu Stap Lukaotem Moa Aedia?
Ol seven mak blong bras ia, oli sam mak ia nomo long evri dei step we yumi evriwan i save tekem blong fulumap bodi mo spirit blong yumi wetem hapines. Blong gat moa aedia, luk tru long buklet blong Blong Ol Yut Oli Kam Strong blong save faenemaot ol prinsipol we oli bin mekem yu, o ol narawan oli hapi bifo. ?Wanem nao yu filim insperesen blong mekem blong putum o yusum ol samting ia oltaem moa insaed long evri dei laef blong yu?
Tingbaot oltaem se stamba blong hapines, hem i Sevya blong yumi, Jisas Kraes. I nomata wanem situesen blong yumi, Hem i stanap, i rere blong blesem yu mo blong helpem yu tru long ol hadtaem blong yu. Bambae Hem i helpem yu blong faenem hapines ia we yu stap hop from.