?Mi Mi Bin Klin Inaf o No? Blong Ol Yut Oli Kam Strong Julae 2021, 22–23.
?Mi Mi Bin Klin Inafo No?
Mi mi wan viktim blong abius, mo hemia blong wan longlongfala taem. ?Hemia i bin jenisim wei we Lod i bin luk mi o no?
Pikja i kam long Trent Gudmundsen
Sapos man i luk mi aotsaed, laef blong mi olsem wan pikinini i nomol nomo.
Mifala i bin stap go long jos, mo go long evri miting mo aktiviti blong Jos. Mi bin go long skul mo pleiplei wetem ol fren blong mi. Taem mi bin yangfala, mi bin mekem evri samting we ol nomol yangfala oli bin stap mekem. Mi stap go aot wetem ol fren blong mi, mo mi stap long kwaea mo drama klab blong mifala. Mi bin go long skul danis. Be i bin gat wan tudak sikret andanit long hapi nomol blong mi ia.
Stat long taem we mi kasem 2 yia, mi mi wan viktim blong abius long saed blong seks; tufala bigfala brata blong mi nao i stap mekem nogud long mi. Tufala i stap abiusum ol sista blong mi tu. Mifala i bin yangfala tumas blong andastanem wanem we i stap hapen, be, taem mi stap groap i kam antap, mi stat blong andastanem smol. Mi filim tudak long mi mo mi filim se mi doti taem mi stap wetem ol brata blong mi.
Tingting blong Mi I Fasfas Moa
Afta we mi stap go long Yang Woman klas, oli bin tij abaot gud fasin long saed blong seks, mo mi bin andastanem mining blong klin fasin mo fasin blong stap klin long saed blong seks, o jastiti. Mi bin lisin long ol lida blong mi, we oli bin askem strong long mi mo ol narawan insaed long klas blong mifala i mas stap klin long saed blong seks.
Mi bin stap askem miwan: “?Olsem wanem mi save stap klin long saed blong seks?” Taem we mi bin stap tingting i gobak, we i go we i go, mi mi wan viktim blong abius long saed blong seks. Mi no save stap kwaet, be mi stap askem miwan se, wanem nao Lod i tingting abaot mi. ?Se mi mi wan yang woman we i gat klin fasin o no? ?Se mi mi klin inaf blong go long deit wetem ol yang man we oli bin stret mo gud insaed long wod blong mi, mo long skul blong mi, o no? ?Weswe long abius ia we mi bin gotru long hem? ?Hemia i mekem mi mi no klin blong kasem wan mared long tempol?
Mi bin tingting plante long saed ia. Long tingting blong mi, bae i no stret blong oli tekem se mi mi no klin, from se, wanem i bin hapen long mi, i no bin joes blong mi. ?From wanem nao bae mi no save filim se mi mi gat klin fasin? ?Mi mi no naf blong Lod i lavem mi? ?Mi mi nidim blong sakem sin?
Mi Jes Traem blong Fogetem
Tru, mi mi no save. Mi filim se i no rong blong mi, be long semtaem, mi filim se mi doti, mo oli spolem mi, mo mi harem mi sem tumas. Mi no gat paoa long tingting blong talemaot long papa mo mama blong mi, o eni narawan. Mi bin traem plante taem, be mi filim se mi sem tumas, mo mi no save olsem wanem blong faenem toktok blong talem. Mi jes traem blong fogetem se samting ia i bin stap hapen.
Taem we mi kasem 15 yia, ol smol sista blong mi oli faenem paoa ia long tingting we mi mi no gat. Oli bin toktok long wan kaonsela long skul. I no longtaem afta, oli arestem wan long ol brata blong mi, mo oli sendem hem i go long kalabus blong tri yia. Be yet, blong plante yia afta, mi bin safa long ol semfala fraet ia, se, mi mi no gat klin fasin, o mi mi no klin inaf.
Mi Faenem Paoa long Tingting blong Kasem Help
Long en, wan dei, mi kasem paoa long tingting blong go luk bisop blong mi. Hem i bin eksplenem se Lod i no tekem se mi mi rong from evri aksen long saed blong seks we oli bin fosem mi long hem taem we mi mi bin wan pikinini i go kasem taem we mi kam wan yang woman. Hem i talem gud long mi se i no rong blong mi nating. Mi mi no gat rong long fes blong Lod. !Mi mi klin nomo i stap!
Wetem sam kaonseling we i kam long sam profesonol, mo wetem help we i kam long bisop blong mi, mi bin save lego abius ia—wetem harem nogud mo safaring ia we abius ia i bin mekem long mi—mi lego evri samting ia i stap biaen long mi. Naoia, mi rili gat wan hapi mo nomol laef. Mi bin mared insaed long tempol, long wan stret mo gud man, mo mitufala i stap lukaotem famli blong mifala mo stap hapi.
Samtaem, ol samting ia blong bifo oli kam long ol tingting blong mi, be, mi save tingbaot wari tingting blong mi taem we mi bin stap tingting se mi mi klin inaf o nogat.
Mi stap askem miwan se, hamas moa yang pipol we oli stap ia, we oli stap long wan situesen semmak olsem mi, we oli stap filim bigfala sem mo oli filim se oli daonem gud olgeta, we oli stap askem olgetawan se oli klin inaf o no, mo sapos oli gat wan ples insaed long plan ia blong God.
Long ol yangfala pipol ia, mi wantem talem se, Lod i lavem yufala.
Hat blong Hem i soa from yu.
Hem i save se yu no gat rong.
Hem i save se yu yu klin tru.
Hem bae i helpem yu blong faenem paoa long tingting mo paoa long bodi blong laef long wan laef we i gat hapines.