“Glad blong Kosei,” Blong Ol Yut Oli Kam Strong Julae 2021, 12–15.
Glad blong Kosei
Yang man ia we i blong Japan i laekem tumas blong serem gospel.
Foto i kam long Getty Images
Hem i plei piano. Hem i save resis long ol kwik resis. !Mo hem i save jiam longwe tu! Be olgeta samting ia, oli no ol gudfala samting ia nomo abaot Kosei H., wan yang man we i gat 17 we i blong Nagasaki, Japan.
“Hem i wan long ol top yang misinari we mi mi save hem,” Sista Mckenna Frasure i talem; sista ia i wan riten misinari we i bin mekem misin long Japan long ples we Kosei i stap laef long hem. “Kosei i neva mestem wan janis blong stap wetem ol misinari, o blong testifae abaot Kraes tru long ol aktiviti blong Jos mo tru long sosol media,” hem i talem.
Kosei i tekem se, ol misinari, oli ol fren blong hem we oli kolosap moa long hem. Mo bae i no wan sapraes long yu taem bae yu luksave hamas hem i laekem tumas blong stap serem gospel.
“Misinari wok, hem i wan glad blong mi,” Kosei i talem. “Nifae i bin tijim yumi se frut blong tri blong laef ‘hem i samting we evri man i wantem moa i bitim evri narafala samting’ (1 Nifae 11:22). Maet sam pipol oli no tanem baksaed long frut ia. Be, olsem wan we i save hamas frut ia i swit, mi wantem serem gospel wetem olgeta we oli stap raon long mi.”
Blong serem ol blesing blong gospel, bae i jes wan long talen blong Kosei we i bigwan moa bitim evri nara talen blong hem.
Sosol Media Sakses
Afta we hem i tekem samfala klas blong rere long misin, Kosei i bin gat wan bigfala filing blong wantem tekem ol glad ia blong gospel i go long ol fren blong hem. Hem i stat blong go onlaen. Wan long ol stamba tul we hem i bin yusum blong serem ol mesej we oli tokbaot gospel, hem i sosol media.
Samfala long ol fren blong hem oli ansa long ol post blong hem long sosol media. Wan fren blong hem i kam luk Kosei mo talem: “mi mi intres long jos blong yu.”
Fren ia, i wan we hem i jes save hem nomo olsem, be frensip blong tufala i kam strong moa kwiktaem. “Hem i stat blong askem mi wanem i defren bitwin fet blong hem mo fet blong mi,” Kosei i eksplenem. “I nomata we mi no bin stap toktok plante long hem, mitufala i kam gudfala fren afta we mi serem gospel long sosol media.”
Ol Spot, Ol Gud Aktiviti, mo Ol Frensip we I Stap Oltaem
Sosol media i no wan wei ia nomo we Kosei i stap serem bilif blong hem. Tingbaot, hem i gat wan laef we i bisi, mo i fulap long ol defren aktiviti. Hem i gat plante janis blong mitim ol pipol mo mekem fren. Mo hem i stap yusum ol janis ia blong serem glad blong gospel.
“Wan taem, hem i invaetem wan fren blong spot klab i kam long Inglis klas we ol misinari oli bin stap tijim long Jos,” Kosei i eksplenem. “Hem mo ol misinari oli kam ol gudfala fren, mo semtaem, hem i bin stap lanem Inglis.”
Be, ol storian ia oli no bin stop wetem ol Inglis lesen.
“Fren blong mi i stat blong tingting se from wanem nao, ol misinari ia, we oli sem yia wetem hem, oli bin stap mekem volontia wok mo stap olsem ol misinari long Japan. Nekis kwestin blong hem i blong askem wanem nao i pusum ol misinari blong givim seves. Naoia, hem i harem finis ol misinari lesen, mo i stap gohed blong toktok wetem ol misinari tru long vidio storian.”
Long eni taem we hem i tokbaot gospel wetem ol fren blong hem, Kosei i traem blong putum tugeta wanem we hem i stap serem i go wetem hamas oli intres long hem. “Eksampol: faswan, mi tokbaot wanem i hapen afta long ded, wanem nao stamba tingting blong laef, o sapos God i stap o no,” hem i talem. “Afta, mi save stretem ol storian folem wanem oli intres long hem.”
Yes, hem i save se i no evriwan we bae oli intres long hemia. I bin gat ol taem we ol samting oli no bin go gud, semmak olsem eniwan. Wan dei, afta we plante long ol fren blong hem oli bin stap askem hem ol kwestin abaot Jos, Kosei i bin traem blong serem wan pepa blong givimaot abaot Jos, wetem wan long olgeta. “Be, fren ia i ron i kamaot long klas, mo i stap long korido (ples blong wokbaot insaed long skul) mo i laf strong long mi.
“Hemia i mekem mi mi harem nogud bigwan,” Kosei i talem.
Be hem i no letem fasin blong daonem tingting i stopem hem. Hem i save se wanem we hem i stap serem, bambae i blesem laef blong olgeta blong oltaem, sapos oli lisin.
Glad Ia we I Stap Pusum Hem
“Mi filim glad long ol tijing blong Kraes,” Kosei i talem. “Sapos mi no save ol tijing ia, bae mi no save gat wan laef wetem wan ril glad.”
Taem hem i stap go kam wetem ol fulap aktiviti mo intres blong hem, Kosei i save wanem blong putum i kam faswan. “Gospel blong Jisas Kraes i tekem hop i kam insaed long laef blong yumi, mo i soemaot, tru long revelesen, evri samting we yumi mas mekem,” hem i talem. “Iven taem yumi filim se tingting mo filing i fasfas, o taem yumi stap gat wan hadtaem, tru prea bae i tekem pis i kam, mo bae i helpem yumi blong gat wan tingting we i stret.”
Hemia nao i mekem se hem i gat strong tingting blong serem gospel long evri janis we hem i faenem. !Hem i wantem ol narawan blong filim wanem we hem i filim evri dei! “Mi hop, wetem ful hat blong mi, se plante pipol bambae oli gat janis ia blong filim tru glad ia,” hem i talem.
Wanem I Impoten Moa
Olsem oltaem, blong stap serem gospel i no wan samting we i stap tekem ful taem blong hem. Kosei i wok had tu long ol nara gol blong laef blong hem. Evri dei, hem i go mekem strong trening blong ron, mo gat paoa long bodi. Taem hem i nid blong spel smol, hem i plei piano. Mo tu, hem i laekem blong lukluk raon long wanem i stap aotsaed mo spendem taem wetem famli blong hem. “Wan taem we mi mo ol brata mo sista i go wokbaot—!mi neva fogetem dei ia we mifala i kasem fis, mo kakae ol fis ia!” hem i talem.
Folem rod ia, Kosei i gohed blong putum taem from ol samting we oli moa impoten.
Mo hem i gat smol advaes blong eniwan we i wantem mekem sem samting: “Lod i stap soem rod taem yumi stap obei long ol komanmen. Taem yumi mekem olsem, Lod i save mekem yumi kam strong moa. Ol fraet mo ol wari oli go lus, mo hop mo tras long yumiwan i tekem ples. Sapos yumi no stap sem long gospel mo openem maot blong yumi, ol pipol bambae oli kam blong save lav ia we i olsem hemia blong Kraes, mo bae yumi fulap wetem glad.”