“Long San Diego, YSA,” Blong Ol Yut Oli Kam Strong Julae 2021, 20–21.
Olsem Wanem Mifala I Stap Wosip
Long San Diego, YSA
Ol foto oli kam long Getty Images
!Halo! Nem blong mi i Chace B. Mi gat 14 yia, mo mi stap long San Diego. San Diego i long Saot pat blong stet blong Kalifonia, YSA. Ples i luk defren long ol defren pat blong San Diego. San Diego, insaed i gat ol wof, ol mesa, ol vale, ol kanion, mo ol bigfala hil. Plante taem, ples i hot mo i gat san ful yia.
Mitim Famli blong Mi
Famli blong mi mo mi, mifala i stap laef long ol bigfala hil blong San Diego. Mi stap wetem mama blong mi, sista blong mi we i gat 10 yia, Payslie, mo abuelito blong mi mo abuelita blong mi (bubuman mo bubuwoman). Mifala i stap long wan fam we i gat fulap animol long hem. Mifala i traem blong laef long wan simpol laef mo wan laefstael we i folem stael blong bifo.
Mekem Sakramen I Spesel
Long taem blong kwarantin blong KOVID 19, bae i save hapen se Sandei i wan dei olbaot long hom, mo mifala i stap long ol sofa mo ol klos blong haos. Mi bin wantem blong mekem wan samting blong meksua se Sandei i wan spesel dei. Mi disaed blong mekem wan sakramen trei blong famli, mo putum se i wan gol blong mi long saed blong spirit, olsem pat blong program blong Ol Pikinini mo Ol Yut.
Faswan, mi tekem wan pis wud mo mi drilim ol hol long wan haf blong putum ol smol kap. Afta, mi katem wan trei long nara haf, blong putum bred long hem. Abuelita blong mi i helpem mi blong saenem wetem sanpepa kasem taem we hem i smut gud. Afta, mifala i joenem wan handel long hem mo saenem gud wud wetem wan oel.
Long fas Sandei, mifala i go blong rere long sakramen, mo mifala i no save faenem ol kap we oli stret long ol hol insaed long trei ia. Mifala i lukaotem gogo blong plante aoa. Afta, mifala i disaed se, i nomata mifala i no gat stret kap, bae mifala i tekem mo kaekae sakramen. Bae mifala i no letem hemia i blokem mifala blong kipim Sabat dei i tabu.
Long Sandei ia, taem mifala i tekem mo kakae sakramen, ples i bin moa kwaet, i gat moa tingting mo respek. Mi filim se mi glad wetem gol ia we mi putum mo mekem i hapen. Mi save, mo mi bin filim se Papa blong yumi long Heven i bin praod long mi from gol blong mi, mo from ol joes we mi bin mekem from gol ia.