“From Wanem Yu Mas Leftemap Hed mo Stap Glad,” Blong Ol Yut Oli Kam Strong, Julae 2021, 6.
Kam Folem Mi
From Wanem Yu Mas Leftemap Hed mo Stap Glad
!Stap Glad! Lod i givim ol risen blong yu mekem olsem.
Lod i mekem plante invitesen i kam long yumi. Mo plante taem, Hem i stap ripitim ol impoten wan. (Olsem, ?hamas taem nao Hem i talem wan samting olsem “Kam long mi”?
I gat wan invitesen we bae yu luk oli ripitim insaed long ol skripja, hem i: “Leftemap hed mo stap glad.”
Samtaem Lod i stap talem hemia taem we ol pipol blong Hem oli stap traem blong folem Hem, be, oli stap fesem ol samting we oli kam agensem olgeta mo oli stap fesem ol tes. Taem we Lod i stap invaetem yumi blong leftemap hed mo stap glad, plante taem bae Hem i talem from wanem Hem i stap leftemap tingting blong yumi blong stap hapi. Eksampol. Wan taem Hem i bin talem:
“Yufala i stap glad, from we bambae mi lidim yufala i go. Kingdom i blong yufala mo ol blesing blong hem, oli blong yufala, mo ol rij samting blong taem we i no save finis, oli blong yufala” (Doktrin mo Ol Kavenan 78:18).
Bae yumi brebrekem hemia i go:
“Yufala i stap glad, from we [Risen 1] bambae mi lidim yufala i go. [Risen 2] Kingdom i blong yufala mo [Risen 2a] ol blesing blong hem, oli blong yufala, mo [Risen 3] ol rij samting blong taem we i no save finis, oli blong yufala” (Doktrin mo Ol Kavenan 78:18).
Long ples ia, Lod i rimaenem yumi se bae Hem i soem rod long yumi, mo bae Hem i blesem yumi. Hemia sam gudfala risen blong yumi stap glad.
Hemia wan nara eksampol:
“Yufala i mas stap glad, ol smol pikinini; from we [Risen 1] mi stap long medel blong yufala, mo [Risen 2] mi no livim yufala fogud” (Doktrin mo Ol Kavenan 61:36).
Mo wan narawan:
“Yufala i stap glad, mo yufala i no fraet, from we [Risen 1] mi Lod, mi stap wetem yufala, mo [Risen 2] bae mi stanap wetem yufala” (Doktrin mo Ol Kavenan 68:6).
Lod i mekem yumi tingbaot se Hem i stap kolosap long yumi, mo bambae Hem i helpem yumi taem yumi stap traehad blong stap folem Hem mo mekem wok ia blong Hem. Yumi save gohed long rod blong yumi wetem tras, mo yes, wetem glad. From se hem i tru, we, plan blong Papa long Heven hem i “plan blong stap glad” (Alma 42:8, 16), mo blong stap folem ol komanmen blong Lod, hem i blong stap laef “folem fasin blong stap hapi” (2 Nifae 5:27).
Iven sapos ol tes blong yumi oli stat blong pulum yumi godaon, sapos yumi wantem long hat blong yumi blong folem Lod, Hem i stap leftemap tingting blong yumi blong stap glad. Mo Hem i givim sam gudfala risen long yumi blong mekem olsem.