!Yu Save Mekem! Blong Ol Yut Oli Kam Strong Julae 2021, 24–26.
Kam Folem Mi
!Yu Save Mekem!
Yumi nid blong tingbaot evri samting we Papa long Heven mo Jisas Kraes i bin mekem—mo wanem we Tufala i stap gohed blong mekem—blong helpem yumi blong kasem selestial kingdom.
Doktrin mo Ol Kavenan 76
“?Mi? Long selestial kingdom? Mi no ting se mi save mekem.”
?Yu yu bin gat wan kaen tingting olsem ia bifo? Hem i stret ia nao blong stap askem yumiwan sapos yumi gud inaf, speseli taem yumi luk se yumi longwe blong stap stret gud evriwan. !Samtaem, bae yumi filim se i no posibol nating blong kasem selestial kingdom!
Be yu no slakem tingting blong yu. Ful stamba tingting blong plan ia blong Papa long Heven, i blong helpem yu blong kam olsem Papa long Heven mo Jisas Kraes, mo blong yu stap laef wetem Tufala insaed long selestial kingdom. Yu stap long wan gudfala ples bitim wanem we yu stap tingting long hem. Presiden M. Russell Ballard, Akting Presiden blong Kworom blong Olgeta Twelef Aposol, i stap rimaenem yumi se blong stap laef wetem Tufala bakegen, “ i moa bitim wan gol blong yumi —hem i gol blong Tufala tu.”1
Moa bitim eni nara samting, Papa long Heven mo Jisas Kraes, Tufala i wantem evriwan long yumi blong stap laef long selestial kingdom wetem Tufala mo wetem ol famli blong yumi. Gud nius i we, yumi no nid blong kasem ples ia yumiwan. Taem we yumi kam long Kraes mo stap folem Hem, yumi kasem paoa long bodi mo help ia we yumi nidim. From Atonmen blong Hem, i posibol blong kasem selestial kingdom, be tu, i luk se bae yumi kasem.
So, wetem help blong Hem, !yu save mekem hemia! !Yu save mekem!
Plan Ia blong God I blong Evriwan
Blong go insaed long selestial kingdom, yumi nidim blong gat fet long Jisas Kraes mo blong lukaotem blong mekem fet ia i kam antap moa. Yumi nidim blong traehad blong jenis mo blong sakem sin evri dei. Yumi nidim blong kasem baptaes mo kasem presen we i Tabu Spirit—mo blong oltaem tingbaot Jisas Kraes mo riniu ol kavenan blong yumi. Yumi nidim blong stap strong kasem en. Sapos ol samting ia oli ol samting we yu yu wantem, mo yu yu stap traehad from, yu yu stap long rod blong yu blong kam wan ia we bae i kasem selestial kingdom.
Antap long hemia, Presiden Dallin H. Oaks, Fas Kaonsela long Fas Presidensi i bin tijim se olgeta we oli klin inaf blong kasem digri ia we i hae moa insaed long selestial kingdom, oli “olgeta ia we oli kasem ol hae kondisen blong stap long kingdom ia, we i tekem fasin blong stap fetful long ol kavenan ia we oli mekem insaed long wan tempol blong God mo long wan mared we i blong taem we i no save finis.”2 (Yu save lanem moa abaot hemia taem yu ridim Doktrin mo Ol Kavenan 76:50–70, 92–96).
Sapos hemia i mekem yu yu askem yuwan—o yu stap wari—we yu yu rere inaf blong kasem selestial kingdom, tingbaot se hemia i wan wokbaot ia. Evri dei we yumi stap jusum blong kam moa olsem Papa blong yumi long Heven mo Jisas Kraes, hemia i wan dei we yumi stap muv kolosap moa blong kam wan man o man blong selestial kingdom—mo yumi muv kolosap moa long selestial kingdom. I tru, samtaem yumi glis, mekem ol mistek, mo mekem ol sin. Blong stap dipen long Jisas Kraes taem yumi stap sakem sin evri dei, hemia nao i ki. Wokbaot ia, i wan we i gat hop long hem, hemia from evri samting we Hem mo Papa blong yumi long Heven i bin mekem—mo wanem we Tufala i stap gohed blong mekem—blong helpem yumi blong kasem ples ia.
Yumi Gat Sevya
Sevya i putum wan wei blong yumi gobak long Papa blong yumi long Heven. Josef Smit i tokbaot olgeta we oli stap long selestial kingdom, se olgeta ia nao oli “kasem wan testemoni long saed blong Jisas,” mo “oli kam stret gud tru long Jisas … we i tekem i kam atonmen ia we i stret gud evriwan tru long blad blong hem we i ron” (Doktrin mo Ol Kavenan 76:51, 69).
Blong kam stret gud long Jisas Kraes i no minim se bae yumi yu no mekem mistek nating. Hem i minim se, yumi sakem sin mo traem blong kam gud moa evri dei, yumi dipen long Sevya mo long paoa blong Atonmen blong Hem blong i helpem yumi blong jenis. Taem yumi mekem hemia, gladhat blong Hem i letem yumi progres i go from digri ia we i hae moa insaed long selestial kingdom; ples ia bae yumi laef wetem Hem, Papa long Heven, mo ol famli blong yumi, blong oltaem. Mo tu, bambae kasem tu evri samting we Papa long Heven i gat. I no gat wan long olgeta samting ia bae i posibol sapos i no from Sevya.
Yumi Gat Jos Ia
Presiden Oaks i bin tijim se Jos i stap ia tu blong “helpem ol pikinini blong God blong andastanem ful paoa we oli save gat, mo blong oli kasem fiuja blong olgeta we i hae moa. Jos ia i stap blong i givim rod, long ol boe mo gel blong God, blong save go insaed long selestial kingdom mo kam olsem wan god insaed long selestial kingdom.”3 Hemia, yumi mekem tru long fasin blong stap obei long ol odinens mo ol kavenan blong gospel.
Olgeta odinens mo kavenan ia, i nidim prishud, we i stap nomo insaed long tru jos blong God. Tru long ol wei ia mo sam nara wei, Lod mo Jos blong Hem i stap helpem yumi long wokbaot ia blong yumi kam bes man o woman we yumi save kam, blong mekem se hat blong yumi i rere blong kasem, wan dei, evri samting we Papa long Heven i gat mo kasem laef we i no save finis.
!Yu Gohed. Yu No Givap!
Wokbaot ia i go long selestial kingdom, i gat hop long hem, be i no wan isi wokbaot. Papa long Heven i save hemia. Hem mo Jisas Kraes, Tufala i bin promes blong help mo mekem yumi kam strong moa long evri step blong wokbaot ia.
Foto i kam long Getty Images
So yu gohed, mo yu no givap. Bae yumi kasem help taem we yumi stap traehad blong stap folem Sevya, blong stap laef long wan wei we yumi klin inaf blong kasem mo tekem aksen from ol kwaet toktok we i kam long Tabu Spirit, mo blong luksave ples we yumi save kam antap moa long hem. Taem we yumi go tru long laef wetem fet long Jisas Kraes, mo sakem sin taem we yumi nid blong mekem, bae Papa blong yumi long Heven i helpem yumi blong jenis i kam gud moa.
Blong stap klin inaf blong kasem selestial kingdom, bae i no hapen tru long wan bigfala aksen. Hem i risal blong stap jusum blong folem Sevya oltaem mo oltaem, mo blong stap dipen long hop ia mo stret save ia we i kam tru long gospel blong Hem.
So, sapos yu stap traehad blong stap folem Sevya, mo stap wari se, yes o no, bae yu kasem selestial kingdom, evri saen i stap poen i go long wan bigfala “!Yes! !Yu save mekem!” !Hemia i wanem Papa long Heven i wantem blong yumi evriwan! Mo olsem we Presiden Oaks i talem, evri samting ia i posibol “from lav ia we God i gat long ol pikinini blong Hem, mo from Atonmen mo laef bakegen long ded blong Jisas Kraes, ‘we i givim glori long Papa, mo hem we i sevem evri wok blong han blong hem’ [Doktrin mo Ol Kavenan 76:43].”4