“?Olsem wanem mi save stop blong stap kwestinim sapos mi impoten o no?” Blong Ol Yut Oli Kam Strong Julae 2021, 30–31.
Ol Kwestin mo Ansa
“?Olsem wanem mi save stop blong stap kwestinim sapos mi impoten o no?”
Tru long Ol Ae blong Papa long Heven
“Evri dei, mi prea long Papa long Heven mo mi askem hem blong Hem i helpem mi, blong mi luk miwan long wei ia we Hem, Hem i luk mi. Afta, mi lisin gud taem Spirit i stap talem ol mesej we oli kam long God abaot hamas mi mi impoten, mo abaot aedentiti blong mi, mo mi talem ol toktok ia long miwan long fored blong mira. Simpol aktiviti ia i wan wei we yumi save joen wetem heven, mo lanem se Papa long Heven mo Jisas Kraes, Tufala i lavem yumi mo stap biliv long yumi.”
Madeleine M., 14, Niu Yok, YSA
Lavem Ol Defren Samting long Wanwan long Yumi
“Oltaem, mi traem bes blong tingbaot se mi mi wan pikinini blong God we Hem i lavem mi. Mi traem blong mi no komperem mi long ol narawan, from se hemia i mekem se i had moa blong mi biliv se mi mi impoten. God i mekem wanwan long yumi i spesel, we yumi no semmak long wan narawan, mo yumi naes long wan wei; mo olgeta samting we oli defdefren bitwin yumi, oli wan gud samting.”
Brooke D., 14 yia, Albeta, Kanada
Wan Blesing we I Haed
“Plante taem yumi ting se taem yumi no strong, o i gat sam samting we yumi no mekem gud, i minim se yumi no impoten. Be tru samting we i stap, i we, yumi gat blesing blong mekem se yumi save girap i go ova long olgeta samting ia, mo yumi kam moa gud tru long fasin blong gat tingting i stap daon, mo tru long fasin blong kam antap. Sapos yumi stap wok long ol samting we yumi faenem se oli had, bae Lod i luk mo givim praes from ol hadwok blong yumi. Hem i abaot blong stap traem mo neva givap.”
Ricardo R., 17 yia, Jiwawa, Meksiko
Tabu Fasin blong Yumi
“I no gat wan samting we i gud moa bitim blong save se, olsem ol pikinini blong God ia we i stap laef, yumi save kam olsem Hem. !Hemia i jenisim evri samting! Taem we yumi gat ol nogud tingting we i mekem se yumi gat kwestin se, yumi impoten o no, tingbaot se ol kaen tingting ia oli kam long Setan, i no God. Yumi gat paoa we i bigwan we yumi save kasem, mo yumi gat wan tabu fasin, semmak nomo olsem Papa long Heven. Hem i trastem mo Hem i lavem wanwan long yumi.”.
Alexandre S., 16 yia, Minas Gerais, Brasil
Hae Responsabiliti
“Taem mi traehad blong stadi mo tingting hevi long ol skripja mo ol toktok blong ol profet we oli stap laef, mi save filim Tabu Spirit wetem mi, we i rimaenem mi se, mi mi wan gel blong wan papa mo mama long heven we tufala i lavem mi, mo we God i gat ol bigfala plan blong mi. Presiden Nelson, oltaem i stap soem yumi ol bigfala responsabiliti we yumi gat long ol las dei ia, mo we God i trastem yumi mo i save wanem nao yumi save gat paoa blong mekem.”
Mirian P., 16, Parana, Brasil
Mekem Wan Samting we Yu Laekem
“Taem we yumi stat blong gat kwestin se yumi impoten o no, oltaem yumi save askem help blong ol nara pipol. Bes faswan, yumi save stat wok wetem wanem kaen tingting i stap long maen blong yumi. Yumi save mekem spot, go aot wetem ol fren mo famli long sam wei we i gud, o mekem wan aktiviti we yumi laekem. Hemia i helpem yumi luksave se yumi ol pikinini blong God, we Hem i bin givim yumi wan talen mo mekem yumi impoten.”
Carlos V., Meksiko
Kam blong Save Yuwan
“Mi faenem se i moa isi blong mi lavem miwan from se mi tekem taem blong faenemaot huia i mi. Long wan taem, bubuman blong mi i talem: “Yu mas laef wetem yuwan blong taem we i no save finis, hemia blong mekem se yu save kam wan we yuwan yu laekem blong go aot wetem.” Mi bin folem advaes ia, mo mi bin traem blong kam wan woman we i gud. Naoia, mi filim se mi gat moa tras long miwan, from se mi save wanem nao mi laekem, wanem nao mi mi gud blong mekem, mo wanem nao mi stap stanap from. Mi stap filim hapi taem mi stap traem blong kam woman ia we Papa long Heven i wantem mi blong mi kam.”
Sarah Nielson, Yuta, YSA
Tingbaot Huia Yu
“Mi tingting long singsing ia blong Praemeri: ‘Mi Pikinini blong God.’” Hem i mekem mi tingbaot se mi mi bin kasem ol presen mo ol talen blong helpem wol ia i rere from Seken Kaming blong Lod. Pat blong wanwan long yumi blong mekem hemia i hapen, i spesel tumas mo i wan mas, mo yumi evriwan i ol merikel insaed long laef blong wan narawan. Yu yu wan merikel insaed long laef blong evriwan raon long yu. Sapos yu yu foget abaot hemia, tingbaot evri samting we Jisas i bin mekem long Wol ia, mo traem folem eksampol blong Hem. Taem yu harem se yu no glad, o yu harem se yu no impoten, lukaotem wan we i harem semmak olsem yu, mo bae tingting blong yu i kam antap.”
Brigham M., Meksiko
Heven I Agri
“Taem mi lisin long God, Hem i stap helpem mi blong stop blong stap kwestinim sapos mi impoten o no. Ol nara pipol oli no save andastanem fulwan hamas mi mi impoten, be God i andastanem, mo mi mi trastem Hem. Sapos mi letem ol pipol raon long mi oli talem long mi hamas mi impoten o nogat, bae mi stap dipen nomo long ol toktok blong olgeta, mo bae mi no harem gud abaot miwan. Be taem mi no lisin long ol nogud toktok blong olgeta, mi no stap gat kwestin moa se mi mi impoten o nogat. Mi bin lanem se mi nomo nidim olgeta blong oli talem o agri. Wanwan long yumi, from se yumi ol pikinini blong Papa blong yumi long Heven, wanwan long yumi i impoten semmak olsem Hem. Yumi nid blong talemaot bakegen hemia long yumi, speseli sapos i no gat wan i stap talem long yumi.”
Anna G., 23, Franis
Tras long Gospel
“Long sosol media, mi stap luk evri kaen pipol we mi ting se oli stret gud evriwan, o oli moa gud i bitim mi. Taem mi stap laef folem gospel, hem i helpem mi blong mi developem wan fasin blong talem tangkyu abaot huia i mi. Taem we mi stap laef folem ol prinsipol blong gospel, olsem fet, fasin blong sakem sin, mo fasin blong stap tingting hevi long ol skripja, mi filim se mi mi spesel we i no gat wan moa semmak olsem mi. Mi no filim nid ia se bae mi komperem mi long ol narawan, mo long en, mi gat moa tras.
Alexandra R., Meksiko
Fogivim Yuwan
“Plante taem, yumi ting se yumi no naf blong kasem fogivnes, from se yumi save ol mistek we yumi bin mekem. Be yumi ol man—yumi mekem ol mistek mo bambae yumi gohed blong mekem mistek. Yumi nid blong stap fogivim yumiwan bakegen, from se evriwan i inaf mo nidim blong gat wan seken janis. Yumi nid blong luk yumi tru long ae blong ol pipol we oli lavem yumi. Bae yumi luk wan man o woman we i spesel, we i no gat wan narawan i semmak; wan man o woman we i save mekem gud samting, we i inaf blong kasem lav ia we i go long evriwan, i nomata wanem i stap.
Valerie J., Meksiko