“Te Babaire Mai Ieta Ibukira Bwa Tina Nakoraoi,” Ibukin Kakorakoraia Kairake, Turai 2021, 2–5.
Te Babaire Mai Ieta Ibukira Bwa Tina Nakoraoi
Ngkana ti taraa te maiu n rabwata n taekana, ti nooria bwa ti aki te titiraki n “riki ke n aki riki?” ma “n riki n arona ke n aki riki n arona?”
I a tia ni kakabwaiakaki n tiku irarikin buu ni bungiakiia natira ao n ira naba mateia au karo n tatabemaniia. I bon rangi ni miimi n namakina te bwai ae I a tia n namakinna n tain te bung ao n tain te mate. I namakinna bwa e riki te bwai ae tabu. Ara tai iaon te aba bon mwakoron rikira ae kakawaki ae akea tokina. Ti bane n roko mai i karawa ngkana ti bungiaki ao ti oki nako karawa ngkana ti mate.
Tera ae ti kainnanoia ni karaoia ikai iaon te aba e kona n ataaki ti rinanon atakin te bwai ae riki imwain te bungiaki ao te bwai ae na riki imwiin te mate. Ngkana maiura iaon te aba ai bon ti ngaia naba anne, ti kona ni bane n “amwarake, mooi, ao ni kimwareirei” (2 Nibwaai 28:7) n akea tabeaiangara ibukiia tabeman. Ngkana ti taraa te maiu n rabwata n taekana, ti noria bwa ti aki te titiraki n “riki ke n aki riki?” ma “n riki n arona ke n aki riki n arona?”1
Ataakin te babaire ni kamaiu—maiura imwain bungiakira, te kaantaninga ibukin maiura i aon te aba, ao maiura imwiin te mate—ao te tabe ae kakawaki are ara Tia Kamaiu, Iesu Kristo, e karaoia n te babaire anne e kaotia nakoira ae E na buokiira rinanon maiuna. Ngkana ti karaoi berita ma Ngaia, ti katikuira i aon kawain te berita ae tabu—ao ti a riki n ai Arona ao Tamara are i Karawa, teutana imwiin teutana.
Maiura Imwain te Aonaaba
E reireiniira te kaotioti bwa ngaira bon natin te Atua n tamnei ao ti maeka ma Ngaia n te tai ae maan imwain ae ti roko n te aonaaba. Tamara are i Karawa e katauraoa te kawai ibukira bwa ti aonga n riki n ai Arona. Naake a rinea ana babaire ni kamaiu Tamara ke te babaire ni kukurei n te maiu imwain te maiu aei—are bon ngaira ni kabane—ti rineia bwa ti na “nakoraoi riki.”
Unimwaane Christofferson ma buuna ao natina.
Ara Tai i aon te Aba
Ti roko nakon te aonaaba are e karikaki iroun te Atua ao Natina, Iesu Kristo. Ti karekea rabwatara. Reken rabwatara e kakawaki nakon karekean te kimwareirei are e tangiria te Atua. Ngkana ti kaotia bwa ti na kawakin ana tua te Atua, a na “mwaiti riki mimitong i [aon] atuura n aki totoki” (Aberaam 3:26). Nanon aei bwa ti na riki n ai aroia ara karo i karawa ao ni maeka ma ngaia n aki totoki. Ti takaakaa ni kakatonga ni bwaai aika kakimwareirei aikai.
Ngkoe ao ngai, ti tataninga n te tai ae maan, ma ngkai ti a mena ngkai i aon te aba. Ai ingainga nanora nakon te tai ngkana ti a kautaki ma te rabwata ae kororaoi, ae aki mamate ao n rin inanon te abanuea ae te tiretio ni kakukureira n te maiu ae aki totoki—te bwai ae rangin ni kamiimi ae tiaki kona n iangoia. N te tai aei, ti reiakina ao ni kekeiaki ni “karaoi bwaai ni kabane are e na tuangiira [ara] Uea ae Atu[ara]” (Abraam 3:25). Bukina bwa ti ata ana babaire te Atua, ti ataia bwa aki kanakoaki tuua aikai bwa ana totokoi inaomatara ke kukureira—bon kaitaraana. Tuua bon ara kairi nakon inaomatara ao kukureira.
E Katauraoa te Tia Kamaiu
E teimatoa, ni matoatoa te maiu. Ti bane ni karaoa te bure ngkai ti reiakinna bwa ti na maiuakina te onimaki. Ma e berita te Atua nakoira imwain karikan te aonaaba bwa E na katauraoa te Tia Kamaiu bwa e na kamaiura man ara bure ao te mate. Man oin rawawatana ao matena—Ana Mwakuri ni Kamaiu—Iesu Kristo e kabwarai ara bure ao n anganiira te bwaintituaraoi ae te rairannano. Ngaia are, ngkana ti rairananora, E kabwarai ara bure ao ni kaitiakira man mwiia. Ao man Mangautina, e anganiira te Tia Kamaiu te bwaintangira ni mangautira ao te maiu ae aki mamate.
A na Katorobubua Bubua Ni Wae Ni Bane, iroun J. Kirk Richards
Te Nakonako n te Kawai ae Beritanaki
N aron ae ti bungiaki n rabwatara nakon te aonaaba ae mamate aei, ti riai ni manga bungiaki n te tamnei nakon te abanuea i karawa. Ti karaoa aei man kamwakuran te onimaki iroun Kristo, te rairannano, n tia ni bwabetitoaki, ao ni karekea te Tamnei ae Raoiroi. Aio moan te bitaki n te tamnei are e na waaki nako rinanon maiura n te aonaaba. N tabetai ti atonga bwa te “nanomwaaka ni karokoa te toki,” are e nanonaki bwa ti na nanomwaaka ni kawakin ara berita n te bwabetito bwa ti na ongotaeka ni maiura ni kabane, n rairannano ngkana e kainnanoaki ao ni manga waaki nako. “ Eng, ao N na kabwarai aia bure au botanaomata,” e taku Iesu, “n aron katoa tain aia rairannano ibukin aia bure nakoiu” (Motiaea 26:30).
Ko Kona N Onimakina Ana Ibuobuoki te Atua
Ni maium imwain bungiakim, ko rinea te Atua, ko rinea Kristo, ko rineia bwa ko na “nakoraoi riki” man Aia ibuobuoki. Ao ko kona n onimakina Aia ibuobuoki. Taian Atua tiaki taan taratara aika akea nanoia ni maiura. A tangiriira n aki totoki ao a kabonganai mwaakaia ni buokiira, n aron are ti na kariaia. Aki toki ni karinei ara rinerine, ma A tauraoi ni kakabwaiaira. E kakoaua nakoira Iesu, “N na bon aki mwanuokiniko, O te bata are Iteraera. Nooria, I a tia ni koroi arami iaon nanon baiu” (1 Nibwaai 21:15–16).
Te Nakoraoi Riki Teutana imwiin Teutana
Tabeman a namakinna ae te abanuea ae te tiretio bon te kantaninga ae koaua ibukiia tabeman ma n tabetai tiaki ibukiia. E kangai te koaua, akea ae tau n akean ana akoi Iesu Kristo. Ma te kakaitau, ko kona ni karekea Ana akoi. E tuangiira Iesu bwa E a tia ni kataea ana kai te aonaaba. Ma am bwabetito ao berita ake tabeua, ko reitiko ma Ngaia bwa ngkana ngkoe ma Ngaia, ngkoe naba ko kataea ana kai te aonaaba.
Ko aki riai ni karekea te kororaoi ikai i aon te aba. Te Burabeti Iotebwa Timiti e kabotaua ma tamwarekean te kaintamwarake: ko moanna mai inano ao n tamwarake te mwaneka teuana imwiin te mwaneka teuana n reirei ao ni maiuakin reirein te euangkerio. Ao te reirei anne, e reirei, e reitinako iaon te maiu aei—“E na aki bane n ataaki n te aonaaba aei.”2
Tera te mamaara, te kaangaanga, ke te karawawataaki ae ti taneiai ma ngaia iaon te aba, te Atua e berita nakoia Natina aika kakaonimaki ae ana akea te kakabwaia ae na tukaki ngkana ti teimatoa n tiku iaon te kawai ae tabu (ke ni waekoa n okirikaaki nako iai). Ngkanne ana bane n nakoraoi. Anne te babaire ae tabu n nakoraoi riki!