“I San Diego, USA,” Ibukin Kakorakoraia Kairake, Turai 2021, 20–21.
Ti Kanga n Nebonebo
I San Diego, USA
Rawetamneii iroun Getty Images
Mauri! Arau bon Chace B. Au ririki 14, ao I maeka i San Diego. San Diego e mena n tokin tian California, USA maiaki. Tarakin mataniwiin te aba e taraa ni kakaokoro. San Diego bon te mweenga nakon te matabaiawa, taubukin maunga, mwarua aika iraki nnano, mwanono, ao tabuki. N tainako ao e kabuebue ao n riringa ni katoa ririki.
Kaitibo ma Au Utu
Ngai ma au utu ti maeka iaon maungan San Diego. I maeka ma tinau; tariu ae 10-ana ririki, Payslie; ao au abuelito ao abuelita (tibu te unimwaane ao tibu te unaine). Ti maeka n te tabo ni man ma maan aika mwaiti. Ti kataia ni maeka n te aeka ni maiu ae bebete ao n aron te maiu are bwainaki n taai ake rimoa.
Karaoan te Toa bwa e na Onoti
N tain te kaokoroaki n te COVID-19, e kona n aki baireaki raoi te Tabati n te mweenga iaon ara kaintekateka ao n tain bwainakin ara kunnikai aika kamwengaraoi. I tangiria ni karaoa te bwai ae na kakoaua bwa te Tabati bon te bong ae onoti. I iangoia ni karaoa ana turee n toa au utu bwa kanga teuana mai ibuakon au kouru n te tamnei ibukin te burokuraem ae boou ibukiia Ataei ao Kairake.
Te moan, I ana te mwakoro ni kai ao n uuni bwangabwanga n iterana are teuana ibukin nnen mwangko. Imwiina I kaara nako te ture n iterana are teuana ibukin te kariki. Au abuelita e buokai n tianibeebanna ni karokoa ae e a bon maranran. Imwiina ti kanimwa bwain tauana ao ni kabongana bwain kanimwan te kai.
Te moan n Tabati ti moanna ni katauraoa te toa ao tiaki kona ni kunei mwangko ake a na tau nakon bwangabwangan te ture. Ti bane ni kakaei inanon te tai ae maan. N te tai ae aki maan I iangoia bwa mangaia ke n akea mwangko aika kororaoi ti na bon nako naba n taua te toa. Ti na aki kariaia bwa e na tukiira man kawakinan te bong ae te Tabati bwa te bong ae tabu.
N te Tabati anne ngke ti taua te toa, e karaoaki ma akean te karongoa, e karaoaki raoi, ao ma te rau. I namakina te kukurei ma te kouru are I a tia ni kateia ao ni kakoroa bukina. I ataia ao I kona n namakinna ae Tamara are i Karawa e kamoamoa irou ibukin au kouru ao rinerine aika irekereke mangaai.