“N na kanga n toki man titirakinau bwa I tau?” Ibukin Kakorakoraia Kairake, Turai 2021, 30–31.
Titiraki ao Kaekaia
“N na kanga ni katoka te nanououa n arou n tau?”
Rinanon Matan Tamara are i Karawa
“Ni katoa bong, I tataro nakon Tamara are i Karawa ao ni bubuti Nakoina ni buokai bwa N na norai n aron are E noorai. Ngkanne I kakauongo raoi ngkai te Tamnei e anganai te rongorongo ni koaua mairoun te Atua aron bonganau ao kinakiu ao I atong taeka aikai nakoiu n te tirotaam. Te waaki ae bebete aei bon te kawai are ti kona n toma iai ma karawa ao n reiakinna bwa Tamara are i Karawa ao Iesu Kristo a tangirira ao ni kakoauaira.”
Madeleine M., 14, New York, USA
Tangira Arora ae Kakaokoro
“I aki toki ni karaoa au kabanea ni kona n uringa bwa Ngai Natin te Atua. ae tangiraki. I kataia n aki kakaboraoai ma aroia tabeman, ibukina bwa e karika matoatoana bwa N na kakoauai bwa I tau. Te Atua e karaoira ni kabane n arora ae onoti ao n tamaroa ni bon tatabemaniira, ao taian kakaokoro akanne bon te bwai ae raoiroi.”
Brooke D., 14, Alberta, Canada
Te Kakabwaia ae ti aki kantaningaia
“Ti aki toki ni iango bwa te riki ni mamara ke reken taian kabwaka e karika akean bonganara. Ni koauana, ti kakabwaiaki bwa ti aonga ni kona n tokanikai i aoia ao n riki n tamaroa n arora ae rianako rinanon te nanorinano ao karikirakean arora. Ngkana ti mwakuri iaon bwaai ake a matoatoa ibukira, te Uea e na noorii ao n anga kanuangan ara kekeiaki. Bon ti aron kataakina ao n aki bwaranano.”
Ricardo R., 17, Chihuahua, Mexico
Arora ae mairoun te Atua
“Akea kabotauana n ataia bwa ngkai ngaira natin te Atua ae maiu, ti kona n riki n ai Arona. E bitii bwaai ni kabane. Ngkana ti karekei iango aika bubuaka are karikiira bwa ti na titiraki bonganara, uringa bwa iango akanne a roko mairoun Tatan ma tiaki te Atua. Iai iroura te konabwai ae akea tiana ao rikira ae mairoun te atua n aekan Tamara are i Karawa. E onimakiniira ao n tangirira n tatabemaniira nako.”
Alexandre S., 16, Minas Gerais, Brazil
Te Mwioko ae Korakora
Ngke I kakorakora ni kamatebwai ao n iangoi koroboki aika tabu ao aia taeka burabeti aika maiu, I kona n namakina te Tamnei are Raoiroi, are kauringai bwa boni Ngai te nati te aine irouia au karo ake i karawa ao bwa te Atua iai ana baire ae korakora ibukiu. Beretitenti Nelson e aki toki ni kaota nakoira tabera ae kakawaki ni boong aika kaitira ao bwa te Atua e onimakinira ao n ataia are ara kona.”
Mirian P., 16, Paraná, Brazil
Karaoa te Bwai teuana ae Ko Tangiria
“Ngkana ti moana titirakinan bonganara, ti kona n tainako ni kakaea buokara mairouia aomata tabeman. Ma te moan, ti kona ni moanna man barongaan ara iango. Ti kona ni karaoa te kamarurung, ni bobotaki ma raraora ao utu ni kawai aika itiaki, ke ni karaoa te mwakuri are ti tatangiria. Aio ae buokiira n ataia bwa ngaira natin te Atua, are anganiira bonganara ao ara tarena.”
Carlos V., Mexico
Ko na Ataiko
“I kunea bwa e bebete tangirakiu ibon irou ibukina bwa I a tia ni kabanea au tai ni katamneia bwa antai ngai. Tibu te mwane e tuangi n te taina, “Ko na bon tiku ni kinako ibon iroum ni karokoa te toki, ma ngaia are ko riai n riki bwa temanna ae ko na tangiria n airi ma ngaia.” I karaoa nanon anne ao ni kataia n riki bwa te kabanea n tamaroa ngai. Ngkai I namakina riki matoan nanou ibukina bwa I ataa te bwai ae I tangiria, ae I raoiroi iai, ao are I tei ibukina. I namakina te kukurei ngke I kataia n riki bwa te aomata ae Tamara are i Karawa e tangiria bwa ngai.”
Sarah Keenan, Utah, USA
Uringnga bwa Antai Ngkoe
“I iangoa anenen te moanrinan “Ngai Natin te Atua.” E kauringai are I a tia n anganaki bwaintangira taian tarena ni buoka te aonnaba ni katauraoia ibukin Kauaokin te Uea. Tabera ni kabane inanona e onoti ao e riai, ao ngaira ni kabane taian kakai inanon maiuia tabeman. Ngkami ni kabane te kakai n te maiu aei nakoia ake a mena irarikim. Ngkana ko a mwaninga taekana, iangoi ni kabane bwaai ake e karaoi Iesu n te Aonaaba ao kataia iriira Ana katooto. Ngkana ko namakina te nanokawaki ao te akea bongam, kakaea temanna are namakina naba anne, ao ko na namakina kabebeteam.”
Brigham M., Mexico
Kariaia ae Mairoun te Atua
“Ngke I kakauongo nakon te Atua, E buokai ni katoka au titiraki ibukin bonganau. Tabeman aomata aki kona n oota raoi ni bonganau, ma te Atua E ataia, ao I onimakinna. Ngkana I kariaia aomata irarikiu ni bairea boonganau, te bwai are I karaoia bon te iangoi nanon aia taeka ao ni iangoi bwaai aika bubuaka n aroarou. Ma ngke I aki tabeakin aia taeka, I aki kan manga titirakinai aron boonganau. I a tia n ataia bwa I aki kainanoa riki aia kariaia. Ngaira n tatabemaniira iai bonganara ngkai natin Tamara are i Karawa. Ti kainanoia ni kauringiira n te aro anne, riki ngkana akea temaanna ae na taekina nakoira.”
Anna G., 23, France
Te Koaua Raoi inanon te Euangkerio
“Iaon bwaai n reitaki, I noori aekaia aomata ake a taraa ni kororaoi, ke ake a taraa n tamaroa riki nakoiu. Maiuakinan te euangkerio e buokai ni karikirakea te katei ni kakaitau ibukiu bwa antai ngai. Ngke I maiuakin reirein te euangkerio n aron te onimaki, rairanano, ao iangoan koroboki aika tabu, I namakina arou ae onoti. I aki namakina kainanoan te kabotau naakoia tabemaan, ao n tokina, I a moanna n onimakinai ni koaua raoi.
Alexandra R., Mexico
Kabwara am Bure
“Ti aki iangoia n taainako bwa ti tau ni kabwaraaki ara bure, ibukina bwa ti ata te kaairua ae ti karaoia. Ma ngaira aomata—ti karaoa te kairua ao ti na bon waaki nako ni karaoia. Ti kainanoaki bwa ti na kabwarai buure iroura, ibukina bwa aomata ni kabane a tau n reke riki aia tai ni kabwarabure. Ti kainanoia bwa ti na noorira ni mataia aomata ake a tangirira. Ti na noora te aomata ae onoti arona ao ni kamiimi are e tau ni karekea te tangira ae aki tiatianaki n aki tabe bwa tera ae rinanona.
Valerie J., Mexico