“Ko Kona n Roko Iai!” Ibukin Kakorakoraia Kairake, Turai. 2021, 24–26.
Nakomai, Iriirai
Ko Kona N Roko Iai!
Ti riai ni uringii bwaai ni kabane ake atia ni karaoi Tamara are i Karawa ao Iesu Kristo—ao teraa ake a reitinako ni karaoia—ni buokiira bwa ti na maeka n te abaniuea ae te tiretio.
Reirei ao Berita aika Tabu 76
“Ngai? Inanon te abanuea ae te tiretio? I taku bwa I bon aki kona n roko iai.”
E a tia n reke am iango ae aekan anne? Eng, e bon ririki ae ti iangoia ae e tau raoiroira riki ngkana e taraa n ae ti raroanako man te kororaoi. N taai tabetai e namakinaki ae e kangaanga te roko n te abaniuea ae te tiretio!
Ma tai bwarannano. Oin bukin Ana baire Tamara are i Karawa bwa e na buokiko n riki n aekan Tamara are i Karawa ao Iesu Kristo ao ni maeka ma Ngaiia n te abanuea ae te tiretio. Ao ko mena n te tabo ae moan te tamaroa riki nakon are ko iangoia. Beretitenti M. Russell Ballard, Bonomwi n Beretitenti n te Kooram n Abotoro n te Tengaun ma Uoman e kauringiira bwa manga maekara ma Ngaiia “e raka riki nakon ti ara kouru—bon Aia kouru.”1
Ni moa riki nakon bwaai ni kabane, Tamara are i Karawa ao Iesu Kristo a tangirira ni maeka n te abanuea ae te tiretio ma Ngaiia ao ara utu. Te rongorongo ae tamaroa bwaa ti aki ae ti na n nako ikekei n tii ngaira. Ngkana ti roko nakon Kristo ao ni Iria, ti karekea te korakora ao te buoka ae ti kainanoia. Man Ana Mwakuri ni Kamaiu, te maeka n te abanuea ae te tiretio e aki n ae tao e na konaa n reke, bon te bwai ae e na riki.
Ngaia are, man Ana buoka, ko kona ni karaoa aio! Ko kona n roko iai!
Ana Baire te Atua bon Ibukira ni Kabane
Te rinako n te abanuea ae te tiretio, ti kainanoa ae a na iai ara onimaki iroun Iesu Kristo ao ni ukora karikirakean te onimaki anne. Ti kainanoa te kakorakora ni bitii ao n raira nanora ni katoa bong. Ti kainanoa te bwabetitoaki ao ni karekea ana bwaintangira te Tamnei ae Raoiroi—ao n ururinga Iesu Kristo n taai nako ao ni kaboui ara berita. Ti na kakaonimaki ni karokoa te toki. Ngkana bwaai aikai ae ko taangiri ao ni kekeiaki ni karekei, ko a bon tokara kawaim n riki bwa temanna are e na maeka n te abanuea ae te tiretio.
Irarikina, Beretitenti Dallin H. Oaks, te Moan Kauntira n te Moan Beretitentii, e reirei bwa ake a tau nakon te kabanea n rietaata n tabo n abanuean te tiretio bon “ake a tia ni kakoroa nanon are tangiraki ibukin te abanuea aio, n raonaki n te kakaonimaki nakon berita aika karaoaki n Ana tembora te Atua ao n te mare are akea tokina.”2 (Ko kona n reiakina aron aei n te wareware Reirei ao Berita aika Tabu 76:50–70, 92–96).
Ngkana e karika te miimi aio nakoim—ke n tabeaianga—n am katauraoi ni maeka n te abanuea ae te tiretio, uringa bwaa bon te mwananga. Ni katoa te bong are ti rineia iai n riki n ai aron Tamara are i Karawa ao Iesu Kristo bon te bong ae tia kaaniira riki iai n riki bwa aomata n te tiretio—ao ni kaan nakon te abanuea ae te tiretio. Bon te koaua, a na bon iai kairua, ao buure iroura ni kabane. Mwiiokora i aon Iesu Kristo ngkai ti raira n nano ni katoa bong bon te king. Te mwananga aio bon ngaia oin te kantaninga ibukina bwa bwaai ni kabane are Ngaia ao Tamara are i Karawa a tia ni karaoia—ao are a reitinako ni karaoia—ni buokira ni karokoira ikekei.
Iai Iroura te Tia Kamaiu
E a tia Iesu Kristo ni katauraoa te kawai ibukira bwa ti na okira Tamara are i Karawa. Iotebwa Timiti e kabwarabwaraia te koraki ake a maeka n te abanuea are tiretio ake a tia ni “karekea te koaua ibukin Iesu” ao n tia ni “kakororaoaki rinanon Iesu … are kakoroa bukin te mwakuri ni kamaiu ae kororaoi aei rinanon waanakon oin raraana” (Reireima Berita aika Tabu 76:51, 69).
Te Riki ni kororaoi inanaon Iesu Kristo e aki nanonaki bwa ti aki kakaraoi kairua. E nanonaki bwa ti rairi nanora ao ni kataia n tamaroa riki ni katoa bong, ni mwioko iaon te Tia Kamaiu ao te mwaaka man Ana Mwakuri ni Kamaiu ni buokira bwa ti na bitaaki. Ngkai ti karaoa aio, Raoiroina e karokoira nakon te rikirake nakon te kabanea n rietaata n tabo n abanuean te tiretio ike ti na maeka ma Ngaia, Tamara are i Karawa, ao ara utu n aki toki. Ti na karekei naba bwaai ni kabane ake iroun Tamara are i Karawa. E na bon aki riki aio ngke arona bwa akea te Tia Kamaiu.
Iai te Ekaretia Iroura
Beretitenti Oaks e reirei bwaa te Ekaretia e mena ikai ni “buokiia ni kabane Natin te Atua n ataa aia konabwai ni karekea tokiia ae te kabanea n rietaata. Te ekaretia aio e roko ni katauraoia natin te Atua mwaane ao aine ma bwaai ibukin te kawai n rin nako nanon te karietataaki n te abanuea are te teretio.”3 E karaoaki aio rinanon te ongeaba nakon taian otenanti ao berita n te euangkerio.
Otenanti ao berita aikai a tangira te nakoanibonga, are e tauraoi tii inanon Ana Ekaretia te Atua ae koaua. Ni kawai aikai, ao tabeua riki, te Uea ao Ana Ekaretia e buokiira iaon kawaira n riki bwa kabanea n tamaroa n aomata bwa e aonga nanora n tauraoi nakon te bong teuana ni bwaibwai nakon ana bwai ni kabane Tamara are i Karawa ao ni karekea te maiu are akea tokina.
Waaki nako, ao Tai Bwara n Nano!
Te mwananga nakon abanuean te tiretio e kaingainga, ma e bon aki bebete n taainako. Tamara are i Karawa e ataa anne. Ngaia ao Iesu Kristo a tia ni berita bwa a na buokiira ao ni kakorakoraira i aon kawaira nako.
Rawetamnei iroun Getty Images
Ngaia are reitinako, tai bwarannano. E na reke buokara ngkai ti kakorakora ni ira te Tia Kamaiu, ni maiuakina are ti na tau ni karekea ao ni mwakuri iaon kairiri mairoun te Tamnei ae Raoiroi, ao n ataia bwa iia are ti na kona ni katamaroa. Ngkai ti rinanon te maiu ma te onimaki inanon Iesu Kristo ao n rairi nanora ngkana ti kainanoia, Tamara are i Karawa e na buokira ni bitiira nakon ae tamaroa riki.
Te Riki n tau nakon te abanuea ae te teretio e aki kona ni bobonga inanon teuana te mwakuri. Bon otinakon te rinerine n tainako n ira te Tia Kamaiu ao ni mwioko iaon te kantaninga ao bwaai ake a roko man Ana euangkerio.
Ma, ngkana ko kakorakora n iriira te Tia kamaiu ao n tabeaianga bwa ko na roko n te abanuea are te teretio, kanikina ni kabane a kaineti nakon te kaeka ni koaua “Eng! Ko kona n roko iai!” Aio are E iangoia Tamara are i Karawa ibukira! Ao ngkai Beretitenti Oaks e reirei, a kona n reke “ibukin ana tangira te Atua ibukiia natina ao ibukin ana mwakuri ni kamaiu ao manga utin Iesu Kristo, ‘are e kamimitonga te Tama, ao ni kamaeui ni kabane mwakurin baina’ [Reirei ao Berita aika Tabu 76:43].”4