“I Kororaoi?” Ibukin Kakorakoraia Kairake, Turai 2021, 22–23.
I Kororaoi?
I a tia ni bwainikirinaki inanon te tai ae maan n aron are I kona n uringnga. Te mwakuri anne e roota aron ana taratara te Uea ibukiu?
Kamataata n te tamnei iroun Trent Gudmundsen
Tarakiu irouia aomata, bon akea au kangaanga ni uarerekeu.
Ti nakon te taromauri ao ni kaei ana bootaki ao ana waaki ni kakukurei te Ekaretia. I nakon te reirei ao n takakaro ma raoraou. N au tai ni kairake, I karaoi bwaai ni kabane aika a kakaraoi rooro aikanne. I kabanea au tai ma raraou ao I kaaina te kuaea ao te kirabu ni kaotioti. I kaea te taenti imwiin te anga beeba. Ma iai te bwai ae e rangi n raba iaan te kukurei, ae oti mai itinaniku.
Man te tai are e a kan koro uoua au ririki, I a tia n tangakoaki n tauaki irouia uoman mwaneu aika a ikawai. A tangakoia naba tariu. Ti rangi n uarereke n ataa te bwai ae karaoaki, ma ngke I a ikawai, I a moanna n ataia teutana. I namakina te kerikaaki n tamneiu ao n namakina te aki tau ni maiu n rabwata n tainako ngkana I mena imataia mwaneu.
E Rikirake Nanououau
Imwiin irakin aia kiraati Ataeinnaine ike a reirei iai taekan atakin te buakaka ao te raoiroi, I ata nanon te tamaroa ao te itiaki. I ongora nakoia au taan kairiiri ni butiiai ma ake tabeman n au kiraati bwa ti na teimatoa n tiku ni itiaki.
I aki ataia bwa, “N na kanga n itiaki n te maiu aei?” N aron ae I kona n uringnga, I a tia ni bwainikirinaki n tauaki. E tii roko te iango bwa ai teraa ae e namakina te Uea ibukiu. Ngai bon te ataeinnaine ae tamaroa? I tau ni kareke tangira ma te ataeinimwaane ae raoiroi n au uoote ao n te reirei? Te bwainikirinaki are I a tia ni karekea e aki karikai bwa n na tau nakon te mare n te tembora?
E tabetabe au iango n te bwai anne. Bon akea nanon te bwai anne nakoiu ae N na iangoaki bwa I aki tau ngke te bwai are e riki nakoiu tiaki au rinerine. Bukin tera n na aki kona n namakina te itiaki? I aki tau n ana tangira te Uea? I kainnanoa te rairannano?
I Kataia ni Mwaninga
I koaua raoi bwa I aki ataia. I namakinna bwa N na aki bukinaki, ma n te tai naba anne, I namakina te aki tau ao te kakerikakaki ao te kamamaeaki. Akea nanou ni kan tuangiia au karo ke tabeman riki. I kataia tabeua te tai, ma I namakina te maama ao I aki ataia bwa tera ae N na taekinna. I ti kataia ni mwaninga taekan te bwai are e riki.
Ngke 15 au ririki, tariu ake a uarereke a kunea te iango are akea irou. A taetae nakon te kauntira n te reirei. N te tai ae aki maan imwiina, temanna mwaneu e kabureaki n te maan ae teniua te ririki. Ma I teimatoa, inanon ririki ake imwiina, n rootaki ma aekan maaku aikanne ae I aki itiaki ao n tau.
I Kunea te Ninikori Ni Karekea te Ibuobuoki
Imwiin te tai ae maan, n te bong teuana e ungananou bwa N na nako ni kawara au bitiobi. E kabwarabwara bwa e aki bukinai te Uea n te mwakuri n tautau ake a karaoaki ma te matoa nakoiu ngke I uarereke ao n ataeinnaine. E kakoaua nakoiu bwa bon tiaki au bure. I tei n akea au bure imatan te Uea. I teimatoa n tiku n itiaki!
Man tabeua reirei mairouia taan rabakau ao ibuobuoki mairoun te bitiobi, I a tia ni kona ni mwaninga taekan te bwainikirinaki—ao te maraki ao te karawawataaki aika e karekei—I a aki manga uringii. Ngkai I a bon karekea te maiu ae kakukurei ao n okira arona. I mareaki n te tembora ma te mwaane ae raoiroi, ao ti a karikirakea ara utu ae kakukurei.
N tabetai e a manga roko uringakin kanoan te tai ae nako, e ngae n anne, ao I kona n uringa te maraki are I namakinna ngke I iangoa tau.
I aki ataia bwa ana mwaitira kairake n aomata itinaniku ikekei aika a reke n te kangaanga n aron ae reke irou, n namakina te maama ao te kaokoroaki, ni iangoa taekan itiakia ao a mena iia n ana babaire te Atua.
Nakoia kairake n aomata aikai I kukurei n taekinna, bwa e tangirii ngkami te Uea.
E rangi n nanokawaki te Atua n te bwai ae riki nakoimi.
E ataia bwa tiaki ngkami aika kam na bukinaki.
E ataia bwa ni koauana kam bon bane n itiaki.
E na buokiko ni karekea te ungannano ao te korakora bwa ko na maiuakina te maiu ae kakukurei.