“Bukin Tera Kona Riai ni Kukurei,” Ibukin Kakorakoraia Kairake, Turai 2021, 6.
Nakomai Irai
Bukin Tera Kona Riai Ni Kukurei
Kukurei! E a tia te Uea n anganiko bukina.
E a tia te Uea ni kaoira n taai aika mwaiti. Ao E aki toki ni kaokioki aika a bongana riki. (N aron, mwaitira te tai ae E a tia n atonga ae kangai “Nakomai Irai”?)
Teuana te kakao ae ko na kunea n okiokiraki ni booki aika tabu: “Kukurei.”
Te Uea n tabetai e atonga aei ngkana Ana aomata a kataia ni Iriria m a kaitaraaki ao ni kataaki. Ao ngkana E kaoira bwa ti na riki bwa aomata aika raoiroi, E aki toki n anga bukina bwa E kaungaira bwa ti na kukurei. Te bwai ni katooto, E taku n te tai teuana:
“Kukurei, bwa N na kairiko inanon kawaim. Ami bwai te abanuea ao kakabwaia mai iai bon ami bwai, ao kaubwaina are akea tokina bon ami bwai.” (Reirei ao Berita aika Tabu 78:18).
Ti na tibwatibwa anne:
“Kukurei, bwa [Bukina 1] N na kairiko inanon kawaim. [Bukina 2] Ami bwai te abanuea ao [Bukina 2a] kakabwaia mai iai bon ami bwai, ao [Bukina 3] kaubwaina are akea tokina bon ami bwai” (Reirei ao Berita aika Tabu 78:18).
Ikai are kauringiira te Uea ibukin Ana Kairi ao ana kakabwaia. Akanne tabeua bukina aika tamaroa ni kukurei iai.
Aio te katooto riki teuana:
“Kam na kukurei ataei aika uarereke; bwa [Bukina 1] I mena ibuakomi, ao [Bukina 2] I aki kitani ngkami” (Reirei ao Berita aika Tabu 61:36).
Ao teuana riki:
“Kukurei, ao tai maaku, bwa [Bukina 1] Ngai te Uea I mena iroumi, ao [Bukina 2] [N] na tei ibukimi ” (Reirei ao Berita aika Tabu 68:6).
E kauringiira te Uea bwa E kaan nakoira ao e na buokiira ngkana ti ikakorakora n Iriria ao ni karaoa Ana mwakuri. Ti kona ngkanne n nako iaon kawaira ma te mwioko ao, eng, te kukurei. Imwiin bwaai ni kabane, ana baireTamara are i Karawa bon te “babaire ni kakukurei” (Aramwa 42:8, 16), ao irakin nanon ana tua te Uea bon te maiu “imwiin te aro ae kakukurei” (2 Nibwaai 5:27).
E ngae ngkana kataakira a moanna ni karokoira n te kangaanga, ma ngkana ti tangiria n rimwiin te Uea, E kaungaiira bwa ti na kukurei. Ao E anganiira bukina tabeua aika raraoi.