Koroi Bwaai n Am Tai ni Kamatebwai Booki Aika Tabu

Iroun te Beretitentii ni Kabuta n te Bootaki n Ataeinimwaane

Korean am iango ngkana ko kamatebwai booki aika tabu e na rangi n ibuobuoki.

“N tainako ngkana I moana warekan booki aika tabu, I matu!” temanna te mitinare e tuanga ana beretitenti n te mition. “E taraa n ae booki aika tabu bon bwatin ni kamatu!”

E kaeka ana beretitenti, “Ko a tia ni koroi bwaai ngkana ko wareware?”

“I tuai,” e taku te mitinare.

“E bebete te matu ke iangoan bwaai riki tabeua n am tai ni wareware,” e taku te beretitenti, “ma e kangaanga ngkana ko koroboki irarikin te wareware!”

Te reirei ae anga te beretitenti n te mition aei e karika te bitaki ae korakora iroun te mitinare ae kekeiaki aei. Ngaia ae ngkana ko kakaea te kawai ae boou ni kanakoraoa am kamatebwai ni booki aika tabu, kataia karaoia. Ngkai ko koroi bwaai aika ko wareki, ko na kunea bwa ko na rangi ni matenanoia raoi ao n nakoraoi am kamatebwai, naba.

Aikai tabeua aron karaoakina aika ti taku bwa a kakawaki.

Te Tari Steven Lund:

I katauraoi beeba irarikiu ngkana I wareware. Ngkai e wirikiriki te Tamnei nakoiu n au tai ni kamatebwai, I koroi wirikiriki aikanne.

I karekea te iango mairoun Unimwaane Richard G. Scott (1928–2015) man te Kooram n Abotoro n te Tengaun ma Uoman are e taku: “Koreia n te tabo ae mano bwaai aika a kakaawaki ake ko reiakin mai iroun te Tamnei. Ko na kunea bwa ngkai ko korei namakin aika kakaawaki, e na mwaiti riki ae e na roko. Aron naba, te oota are ko karekea e na tauraoi rinanon maium” (“To Acquire Knowledge and the Strength to Use It Wisely,” Ensign, Tuun 2002, 32).

I ataia bwa a koaua taeka aikanne. Ngkana I katauraoi taetae ao reirei, iai irou tiaki tii koroboki aika tabu ma bon bwaai naba ake I korei ngkana I wareki.

Te Tari Ahmad Corbitt:

I tangiria ni kamatebwai atuun rongorongo. I wareki booki aika tabu mai moana ni karokoa tokina, ma I tangiria naba ni wareki booki aika tabu ni kaineti ma atuun rongorongo ao ni kamatebwai atuun rongorongo. Te katooto, n na kabongana Bwaai ni Kairi nakon Koroboki aika Tabu ni kakaai kiibu iaon te onimaki ke ikotakiia Iteraera. Ngkanne I aki ti koroi taeka, ma I korea te bwai ae I reiakinna ni kakoaua bwa I bon oota raoi iai. I aki toki ni miimi n aron mwaitin ae I reiakinna riki ngkana I karaoa aei. I rinei naba tabeua kiibu ni kamatenanoi.

Tari Bradley Wilcox:

I kawakina au tieno ni kamatebwai ike I koroi inanona kiibu n oin au taeka. N aron te katooto, “Bon ana kairiribai te Atua te aro n aomata” (Motiaea 3:19) e riki “Ibukin ana kamoamoa ao ana aki rairannano te aomata e rineia bwa e na riki bwa ana kairiribai te Atua, ma te Atua tiaki ana kairiribai. Te Atua bon raoraona ae moan te tamaroa.”

I korea naba te titiraki. A kona n ae taian titiraki aika I a kaman iangoi imwain ae I wareware, ke a kona n riki bwa titiraki aika a kaunganano man te bwai ae I warekia. Teuana mai buakoia, e kateimatoaai.

Mwaakan te Koroboki ni Korean Am Iango

Ngaira n tatabemaniira n ara beretitentii ti kamatebwai booki aika tabu ni kakaokoro, ma ti bane ni koroi bwaai ngke ti kamatebwai!

Te wareware e buokiira ni iangoi raoi nanoni iango ao namakin. Anne ae kakawaki. Ao ngkana ti taetae ke ni koroboki, ti kunei ao ni kamatatai iango ao namakin mai inanora ao imwiina a kabwarabwaraaki nako tinaniku. Ti namakinna bwa e buokiira te bwai anne ni kanakoraoi riki koaua n te euangkerio aikanne.

Temanna te ataeinimwaane e kunea te koaua aei bon ibukina ngke e tuangaki bwa e na anga ana marooro ni bootakin te toa. E a tia n ongo irouia aomata aika mwaiti n anga aia marooro ma e aki kona n uring kabwarabwarakina. Te tai aei e kaokoro. Ngke e korea te kabwarabwara ibukin ana marooro, e aki tii buokia n anga te marooro ae barongaki raoi, ma e uringa taekanan te tai ae maan.

E kona n riki naba anne n am kamatebwai ni booki aika tabu. Ngkana e rootiko te kanimatu ngke ko kauki am boki aika tabu, anne bon te tai n uti. Kataia ni katika te bentira, te been, tareboon, ke te kaombiuta ao ni moana am koroboki. Ko na rangi ni miimi n te kaokoro bwa tera are e kona ni riki!

Mwakan te Tieno ni Kamatebwai

I bon rangi ni miimi bwa I kanga ni kanakoraoa au kamatebwai ao n uring atatai nakon are n na mwaninga.

N te bong teuana I wareware inanon Tataekina au Euangkerio, “Kabongana te tieno bwa e na buokiko ni kamatebwai, ni kamataatai, ao n uringa te bwai ae ko reiakinna” ([2018], xi). I tuai kataa te bwai aei, ma I taku bwa te iango ae raoiroi. I kunea te boki ae uarereke ao ni moana korean te bwai ae I warekia.

E kainnanoa kabanean am iango nako iai, ao anne ae buokai n tiku ni kan ongora ao ni kawakina te rabakau ngkana I kamatebwai. E a tia te koroboki n au tieno ni kamatebwai ni buokai n reiakin koroboki aika tabu n te kawai ae nakoraoi. Te kataneiai aei e a tia n riki bwa te bitaki ni maiu ibukiu.

Unimwaan Calvin, Micronesia Guam Mition

A Kanga Bwaai Ni Kareke Iango Aikai ni Buokiko?

Tera am taneiai ma bwaai aikai ke bwaai ni kareke iango riki tabeua iaon kamatebwaian koroboki aika tabu? Tibwauai iaon bwaai n reitaki, ao imeeri nakoira n te [e-mail].