“Fakafehokotakí,” Ki Hono Fakamālohia ʻo e Toʻu Tupú, ʻAokosi 2021, takafi muʻa ki lotó.
Fakafehokotakí
ʻElitia C.
14, Niu ʻIoke, USA
ʻI heʻeku nofo ʻi Niu ʻIoké, ʻoku ou feohi mo ha kakai ʻoku nau kehe meiate au. ʻOku ou saiʻia ke ako ki he meʻa ʻokú ne ngaohi ha taha ke makehé, he ʻokú ne akoʻi mai ʻa e founga ke u tali mo ʻofa ai ʻi honau ngaahi faikehekehé. ʻOku ou tui ʻoku tautautefito ʻene mahuʻinga ke ako fekauʻaki mo e ngaahi founga kehekehe ne tupu hake ai ʻa e kakaí.
ʻI ha vahaʻataimi fuoloa ʻi heʻeku tupu haké, ne ʻikai ke u lotu ʻiate au pē. Ka ʻi ha ʻaho ʻe taha ne hoko ai ha palopalema, peá u fakakaukau, “ʻOku ʻikai ke u ʻilo e meʻa ke faí. He ʻikai ke u lava ʻo fai ʻa e fili ko ʻení ʻiate au pē. Ka ʻoku ou ʻiloʻi ʻe lava ʻa e Tamai Hēvaní ʻo tokoni mai.”
ʻI he taimi ní ʻoku hoko ʻa e lotú ke u ongoʻi ofi ange ai ki heʻeku Tamai Hēvaní. Ko e taimi ʻe niʻihi ʻoku ou lotu pē koeʻuhí ʻoku ou fie talanoa mo Ia! Neongo ʻoku ʻikai haʻaku fehuʻi mahuʻinga pe palopalema lahi, ka ʻoku ou fie talanoa pē ki he Tamai Hēvaní. ʻOku ou ʻiloʻi ʻoku ʻikai ke Ne ʻafio hifo pea houhau ʻi heʻeku ngaahi fehalākí—ko ʻeku Tamaí Ia, pea ʻoku ou fakaʻamu ke ʻi ai haʻaku vā fetuʻutaki mo Ia ʻo hangē ko ia ʻoku ou maʻu mo ʻeku tamai fakamatelié.